“Miambena Hatrany”

NIAMBINA teo amin’ny vavahadin’ny tanàna sy ny fidirana tao amin’ny tempoly, ary indraindray teo am-baravaran’ny tranon’olona ny mpiandry vavahady fahiny. Sady niambina izy no nijery raha nihidy tsara ny vavahady tamin’ny alina. Andraikitra be izany, satria niankina tamin’ny fampitandremany ny amin’ny loza nananontanona ny fiarovana ny tanàna.

Fantatr’i Jesosy Kristy tsara ny asan’ireny mpiandry vavahady, na mpiandry varavarana ireny. Indray mandeha dia nampitoviny tamin’ny mpiandry varavarana ny mpianany. Nampirisihiny àry izy ireo hiambina hatrany, satria efa nanakaiky ny faran’ny tontolo jiosy. Hoy izy: ‘Koa mitandrema hatrany sy miambena hatrany, fa tsy fantatrareo hoe rahoviana ny fotoana voatondro. Izany dia toy ny lehilahy iray nandeha any an-tany hafa, ka niala tao an-tranony ary nandidy ny mpiandry varavarana hiambina hatrany. Koa miambena hatrany àry, fa tsy fantatrareo hoe rahoviana no ho avy ny tompon-trano.’—Marka 13:33-35.

Efa 125 taona mahery koa izao ny gazety Ny Tilikambo Fiambenana no nampirisika ny olona ‘hiambina hatrany’, araka ny tenin’i Jesosy. Amin’ny fomba ahoana? Izao no hita eo amin’ny pejy faha-2 amin’ity gazety ity: “Arahiny ny zava-mitranga eran-tany, izay manatanteraka ny faminanian’ny Baiboly. Milaza vaovao tsara mampionona ny olon-drehetra koa izy, dia ny hoe efa haringan’ny Fanjakan’Andriamanitra ireo mampahory ny namany, ary hovany ho paradisa ny tany.” Gazety ara-pivavahana miely be indrindra izy ity, satria maherin’ny 26 000 000 no zaraina maneran-tany, amin’ny fiteny 150. Tahaka ny mpiandry vavahady fahiny ny Vavolombelon’i Jehovah, ka mampiasa azy ity hampirisihana ny olona hatraiza hatraiza mba ‘hiambina hatrany’, satria efa hiverina hampihatra didim-pitsarana amin’ity tontolo ity ilay Tompo, dia i Jesosy Kristy.—Marka 13:26, 37.