Be Taona fa Tsy Nanirery

MARO no lasa osa sy manirery rehefa antitra. Tsy mba toy izany anefa i Fernand Rivarol, maty tany Genève, any Soisa, teo amin’ny faha-95 taonany. Nipetra-drery izy satria maty vady, ary efa lasa nanambady ny zanany vavy. Tsy nanirery anefa izy, na dia tsy afaka nivoaka firy ny tranony intsony aza. Nipetraka teo anoloan’ny latabatra tao amin’ny efitra fandraisam-bahiny izy matetika, ary nitelefaonina mba hiresaka momba ny Soratra Masina tamin’ny olona.

Maro ny zavatra nampihetsi-po teo amin’ny fiainany. Nisy fotoana, ohatra, nigadrany. Fa nahoana? Nipoaka tany Eoropa ny Ady Lehibe II, tamin’ny 1939. Vao lasa Vavolombelon’i Jehovah izy sy ny vadiny tamin’izay, ary nazoto erỳ. Nifikitra mafy tamin’ny fampianaran’ny Baiboly i Fernand, ka tapa-kevitra ny tsy hanisy ratsy na iza na iza. Namoy ny asany izy noho izany, ary nogadraina imbetsaka. Dimy taona sy tapany raha atambatra ny fotoana nigadrany. Tafasaraka tamin’ny vadiny sy ny zanany vavikely izy nandritra izany fotoana izany.

Hoy i Fernand, rehefa nitodika ny lasa: “Olona maro no nihevitra fa niala tamin’ny asa iray azo antoka aho, ka namela ny vady aman-janako hiady irery. Halan’ny olona aho, ary noheveriny ho toy ny mpanao heloka bevava. Rehefa mieritreritra ireny fotoan-tsarotra ireny anefa aho, dia ny fomba nanohanan’i Jehovah sy nanampiany anay no tena tsaroako. Taona maro izay no lasa, saingy mbola matanjaka toy ny tamin’izany ihany ny finoako azy.”

Izany finoany izany no nandrisika an’i Fernand hitelefaonina, mba hiresaka amin’ny olona ny fanantenany ao amin’ny Soratra Masina. Nandefasany boky na gazety ara-baiboly avy eo izay nihaino tsara. Nantsoiny indray ilay olona tatỳ aoriana, mba hahalalana raha tiany ilay boky na gazety nalefany. Nisy olona namaly azy an-taratasy indraindray mba hankasitraka azy, ka tena faly izy.

Mety hisy olona hiresaka aminao momba ny Soratra Masina koa eny akaikinareo, toy ny nataon’i Fernand. Nahoana raha mihaino izay lazainy mba hahalalanao ny zavatra inoany? Tian’ny Vavolombelon’i Jehovah foana ny miresaka aminao ny zavatra inoany.