Fotoan-tsarotra Izao

MILAZA ny Baiboly fa handia “fotoan-tsarotra tsy mora setraina” ny olona. “Andro farany” no ilazany an’io fotoana io. (2 Timoty 3:1-5; 2 Petera 3:3-7) Io fe-potoana io koa no noresahin’i Jesosy Kristy, rehefa namaly ny fanontanian’ny mpianany momba ny “fifaranan’ny rafitr’ity tontolo ity” izy. (Matio 24:3) Miaina amin’ny andro farany ve isika izao? Ampitahao amin’izay nolazain’ny Baiboly ny tatitra vao haingana voalaza eto ambany, ary ianao ihany no aoka hanatsoaka hevitra.

Faminanian’ny Baiboly: ady iraisam-pirenena—Lioka 21:10; Apokalypsy 6:4.

Tatitra vao haingana: “Maherin’ny avo telo heny ny isan’ny maty noho ny antony mifandray amin’ny ady tato anatin’ny 100 taona, raha oharina amin’ny tamin’ireo 1 900 taona talohan’izay, izany hoe hatramin’ny fotoana nahaterahan’i Kristy.”—Fikambanana Mpandinika An’izao Tontolo Izao.

Faminanian’ny Baiboly: tsy fahampian-tsakafo sy aretina—Lioka 21:11; Apokalypsy 6:5-8.

Tatitra vao haingana: Tombanana ho 863 tapitrisa ny olona tsy ampy sakafo tamin’ny 2004. Manan-tombo fito tapitrisa izany raha oharina amin’ny tamin’ny 2003.—Sampan-draharahan’ny Firenena Mikambana Momba ny Sakafo sy ny Fambolena.

Olona arivo tapitrisa eo ho eo no mipetraka ao amin’ny tanàna mahantra. Olona 2 600 tapitrisa no tsy manana kabine ary fanariana fako sy rano maloto. Olona 1 100 tapitrisa kosa no tsy manana rano fisotro madio.—Fikambanana Mpandinika An’izao Tontolo Izao.

Olona 500 tapitrisa no voan’ny tazomoka tamin’ny 2005, nisy 40 tapitrisa no voan’ny VIH-SIDA, ary 1 600 000 no matin’ny tioberkilaozy.—Fikambanana Iraisam-pirenena Momba ny Fahasalamana.

Faminanian’ny Baiboly: fanimbana ny tany—Apokalypsy 11:18.

Tatitra vao haingana: “Karazana biby sy zavamaniry maro samihafa no mety ho lany tamingana tsy ho ela, noho ny zavatra ataon’ny olona.” “Efa ho ny roa ampahatelon’ny soa azo avy amin’ny natiora no lasa tsizarizary eran-tany.”—Fandinihana ny Tontolo Iainana Amin’ny Taonarivo.

“Hila hikorontana tanteraka ny toetrandro noho ny gazy aelin’ny olona. Mety hisy vokany ratsy dia ratsy ho an’ny tany izany.”—NASA, Fikambanana Goddard Mikaroka Momba ny Habakabaka.

Faminanian’ny Baiboly: torina eran-tany ny vaovao tsaran’ny Fanjakan’Andriamanitra—Matio 24:14; Apokalypsy 14:6, 7.

Tatitra vao haingana: Nandritra ny 2007, dia nanokana ora 1 400 tapitrisa mahery ny Vavolombelon’i Jehovah nitoriana ny vaovao tsaran’ny Fanjakan’Andriamanitra tany amin’ny tany 236. Nahatratra 6 957 854 ny isan’izy ireo.—Diarin’ny Vavolombelon’i Jehovah 2008.

Voalazan’ny Baiboly mialoha, araka ny hitantsika teo, fa misy ny antony mahabe fanantenana, na eo aza ny vaovao ratsy rehetra. Niresaka momba ny ‘vaovao tsaran’ny Fanjakan’Andriamanitra’ i Jesosy. Inona moa ny Fanjakan’Andriamanitra? Inona no ifandraisan’izy io amin’ny fanantenan’ny olombelona hoavy tsara kokoa? Inona no soa hoentin’izy io ho anao?

[Teny notsongaina, pejy 5]

Nilaza mialoha ny zava-mitranga hitantsika ankehitriny ny Baiboly