Manatòna An’Andriamanitra

“Andriamanitry ny Fampiononana Rehetra”

2 Korintianina 1:3, 4

MATETIKA isika no malahelo na kivy mihitsy, satria mijaly, diso fanantenana, ary manirery. Mety hieritreritra àry ianao hoe: ‘Iza no afaka hanampy ahy?’ Resahin’ny apostoly Paoly ao amin’ny 2 Korintianina 1:3, 4, fa mpampionona azontsika itokisana i Jehovah Andriamanitra.

Antsoina hoe “Rain’ny fangorahana” izy, eo amin’ny andininy faha-3. Inona no dikan’izany? Ilay teny grika nadika hoe ‘mangoraka’, dia midika koa hoe mahatsapa ny fijalian’ny hafa.a Milaza ny boky iray momba ny Baiboly, fa mety hidika koa hoe “malahelo” na “tena miahy” io teny io. Manosika an’Andriamanitra hanao zavatra ny “fangorahana.” Manjary te hanatona azy tokoa isika, noho io toetrany io!

“Andriamanitry ny fampiononana rehetra” i Jehovah, hoy i Paoly. Voalaza fa io teny io dia manana heviny hoe “manambitamby olona mijaly na malahelo, ary manampy na mampahery azy.” Hoy ny Baibolin’ny Mpanazava Teny (anglisy): “Mampionona ny olona mijaly isika, rehefa mampahery azy mba hahazakany ny fahoriany.”

Mety hanontany àry ianao hoe: ‘Ahoana no ampiononan’Andriamanitra sy ampaherezany antsika, mba hahazakantsika fahoriana?’ Ny tena ampiasainy dia ny Baiboly sy ny vavaka. Milaza i Paoly fa tia antsika Andriamanitra ka nanome ny Teniny, mba ‘hananantsika fanantenana amin’ny alalan’ny fampiononana avy ao amin’ny Soratra Masina.’ Rehefa mivavaka mafy koa isika, dia mahatsapa “ny fiadanan’Andriamanitra izay lehibe lavitra noho ny eritreritra rehetra.”—Romanina 15:4; Filipianina 4:7.

Amin’ny lafiny inona avy no ampiononan’i Jehovah ny olony? Milaza i Paoly fa “mampionona antsika amin’ny fahoriantsika rehetra” izy. (2 Korintianina 1:4) Na inona na inona zava-tsarotra, tebiteby, na fijaliana iaretantsika, dia manatanjaka antsika izy mba hahazakantsika izany. Tsy mampahery ve izany?

Tsy izay nampiononin’Andriamanitra ihany anefa no mandray soa. Milaza i Paoly hoe mampionona antsika izy mba “hahaizantsika hampionona an’izay ao anatin’ny fahoriana isan-karazany, amin’ny alalan’ny fampiononana izay ampiononan’Andriamanitra antsika.” Lasa mangoraka sy vonon-kanampy ny hafa isika, rehefa nampiononina tamin’ny fahoriantsika.

Marina fa mety tsy hanala tanteraka ny fahoriantsika i Jehovah, ilay “Andriamanitry ny fampiononana rehetra.” Azo antoka anefa fa hanatanjaka antsika izy amin’izay olana rehetra mahazo antsika, raha mitady ny fampiononany isika. Mendrika ny hivavahana sy hoderaina tokoa io Andriamanitra mangoraka io!

[Fanamarihana ambany pejy]