“Mandra-pahoviana no Iantsoako Vonjy?”

Nitomany i Jayne sady niteny hoe: “Tsy zakako intsony ny fanaintainako!” Voan’ny kansera izy, ary efa nihombo be ilay izy. Tsy afa-nanoatra ny havana aman-tsakaizany! Nivavaka ho an’i Jayne no hany azony natao. Tena nihaino azy ireo ve Andriamanitra?

MAHITA ny fijaliantsika Andriamanitra. Hoy izy ao amin’ny Baiboly: “Mbola miara-mitoloko sy miara-mijaly foana ny zavaboary rehetra.” (Romanina 8:22) Fantany fa olona an-jatony tapitrisa no mijaly sy ory, toa an’i Jayne. Fantany koa fa 800 tapitrisa isan’andro no mandry fotsy. Hitany ireo olona an-tapitrisany miaritra herisetra ao an-tokantrano sy ireo ray aman-dreny manahy momba ny hoavin-janany. Asa raha efa nieritreritra ianao hoe: ‘Mbola hanafoana ny fijaliana ve Andriamanitra? Tsy mba te hanampy ny zavaboariny ve izy, satria na isika olombelona aza te hanampy ny fianakaviantsika?’

Tsy ianao irery no efa nieritreritra toy izany. Maherin’ny 2 600 taona izay, dia nanontany an’Andriamanitra i Habakoka mpaminany hoe: “Jehovah ô, mandra-pahoviana no iantsoako vonjy, nefa tsy henoinao? Mandra-pahoviana no iantsoako vonjy aminao noho ny herisetra, nefa tsy vonjenao? Nahoana no ataonao mahita zava-dratsy aho, ary jerenao fotsiny ny faharatsiana? Nahoana no misy fandrobana sy herisetra eo anoloako, ary nahoana no misy fifamaliana sy fifandirana?” (Habakoka 1:2, 3) Feno herisetra sy habibiana tamin’ny andron’i Habakoka. Fandre isan’andro koa izany ankehitriny, ary mampihoron-koditra sy mahavaky fo.

Tsy niraharaha ny fitarainan’i Habakoka ve Andriamanitra? Nihaino an’i Habakoka izy, ary nampionona sy nampahery azy. Nampanantena izy fa hanafoana ny fijaliana. Nampionona an’i Jayne sy ny havany koa ny fampanantenan’Andriamanitra, ka azo inoana fa hampionona anao. Andeha àry hojerentsika hoe: Inona no porofo fa tena miahy antsika Andriamanitra? Ahoana no hanafoanany ny fijaliana, ary rahoviana?