Ampianaro ny Zanakao

Nahoana i Jesosy no Tsy Nandeha avy Hatrany?

REN’I Jesosy fa narary mafy i Lazarosy namany akaiky. Olona nirahin’i Maria sy Marta, anabavin’i Lazarosy, no nilaza izany taminy. Nipetraka tao Betania ry zareo, ary avy ao ilay olona no nirahiny. Nino izy mirahavavy fa afaka nanasitrana ny anadahiny i Jesosy, na dia lavitra be aza no nisy azy ireo, izany hoe tany ampitan’ny Reniranon’i Jordana. Fantatr’izy ireo fa efa nanasitrana olona avy lavitra i Jesosy, talohan’izay.—Matio 8:5-13; Jaona 11:1-3.

Tsy nandeha avy hatrany i Jesosy rehefa nandre an’ilay vaovao mampalahelo. Hoy ny Baiboly: “Mbola nijanona roa andro tany amin’izay nisy azy ihany izy.” (Jaona 11:6) Fantatrao ve hoe nahoana i Jesosy no tsy tonga dia nankany amin’i Lazarosy?...a Andeha hodinihintsika.

Hoy i Jesosy tamin’ny apostoliny, rehefa fantany fa maty i Lazarosy: “Andao indray ho any Jodia.” Hoy anefa ny apostoly: “Vao haingana ange ny Jodianina no nitady hitora-bato anao e! Dia hankany indray ve ianao?” Nanazava i Jesosy hoe: “Matory i Lazarosy namantsika, fa handeha ho any aho hamoha azy.”

Hoy ny apostoly: “Tompo ô, ho sitrana izy raha matory.” Hoy i Jesosy: “Maty i Lazarosy.” Tsy maintsy ho gaga ny apostoliny rehefa niteny izy hoe: ‘Noho ny aminareo, dia faly aho satria tsy tany. Fa andao isika ho any aminy.’

Nilaza tamin-kerim-po toy izao i Tomasy: ‘Andao isika handeha, mba hiara-maty amin’i Jesosy.’ Fantatr’i Tomasy fa hitady hamono an’i Jesosy indray ny fahavalony, ary mety hamono ny apostoly koa. Nandeha ihany anefa izy ireo. Tonga tao Betania, tanànan’i Lazarosy, izy ireo, roa andro teo ho eo tatỳ aoriana. Telo kilaometatra avy eo Jerosalema i Betania.—Jaona 11:7-18.

Fantatrao ve hoe nahoana i Jesosy no faly noho izy tsy tonga aloha kokoa?... Efa nisy olona natsangany tamin’ny maty teo aloha. Ora vitsivitsy taorian’ny nahafatesan’izy ireny no nananganany azy. (Lioka 7:11-17, 22; 8:49-56) Efa andro maromaro kosa i Lazarosy no tao am-pasana ka tsy nisy afaka nilaza hoe tsy tena maty izy.

Nihazakazaka nitsena an’i Jesosy i Marta anabavin’i Lazarosy, rehefa reny fa nanakaiky an’i Betania i Jesosy. Hoy i Marta: “Tompo ô, raha teto ianao dia tsy maty ny anadahiko.” Nanome toky azy i Jesosy hoe: “Hitsangana ny anadahinao.” Nihazakazaka nankany amin’i Maria rahavaviny i Marta, ary nilaza taminy mangingina hoe: “Ao ny Mpampianatra, ary antsoiny ianao.”

Nankany amin’i Jesosy avy hatrany i Maria. Narahin’ny vahoaka izy satria noheverin’izy ireo fa hankany am-pasana. Nigogogogo nitomany i Maria sy ny vahoaka niaraka taminy, ary “nirotsaka ny ranomason’i Jesosy” rehefa nahita izany. Tonga teo am-pasana izy rehetra avy eo. Vato be no hidin’ilay fasana. Hoy i Jesosy: “Esory ny vato.” Hoy anefa i Marta: “Tompo ô, tsy maintsy maimbo izy izao, satria efa efatra andro izay.”

Nankatò ny olona ka nanala an’ilay vato. Nivavaka i Jesosy avy eo ary nisaotra an’Andriamanitra mialoha, satria fantany fa homen’Andriamanitra hery hananganana an’i Lazarosy izy. ‘Niantso mafy izy hoe: “Ry Lazarosy, mivoaha!”’ Nivoaka i Lazarosy ary “mbola nisy fehim-paty.” Hoy àry i Jesosy: “Vahao izy, ka avelao handeha.”—Jaona 11:19-44.

Azonao amin’izay ve hoe nahoana i Jesosy no tsy nandeha avy hatrany?... Fantany fa ho afaka hampahafantatra bebe kokoa ny momba an’i Jehovah Rainy izy, rehefa niandry. Nahay nifidy ny fotoana hanaovan-javatra izy ka maro no lasa nino an’Andriamanitra. (Jaona 11:45) Inona no ianarantsika avy amin’izany?...

Mety ho hainao koa ny hifidy ny fotoana tsara hitoriana momba ny asa tena lehibe nataon’Andriamanitra sy mbola hataony. Azonao resahina an’izany angamba ny mpiara-mianatra aminao, na ny mpampianatra anao. Ao an-dakilasy mihitsy aza ny ankizy sasany no manararaotra miresaka momba ny fitahiana lehibe hoentin’ny Fanjakan’Andriamanitra ho an’ny olombelona. Tsy afaka manangana ny maty ianao, nefa afaka manampy ny hafa hahalala an’Andriamanitra, izay mahay manangana ny havantsika amin’ny maty, sady tena hanao izany.

[Fanamarihana ambany pejy]

FANONTANIANA:

▪ Nahoana i Jesosy no tsy tonga dia nankany amin’i Lazarosy?

▪ Nahoana i Tomasy no nilaza hoe: ‘Andao isika handeha, mba hiara-maty amin’i Jesosy’?

▪ Nahoana i Jesosy no afaka nanangana an’i Lazarosy?

▪ Inona no azonao atao mba hanahafana an’i Jesosy?