Tontosainao Tsara ve ny Fanompoanao?
1 Nampiofana ny mpianany tamin’ilay asa fitoriana hataon’izy ireo i Jesosy, ilay “mpanapaka sy komandy.” (Isaia 55:4; Lioka 10:1-12) Hoy ny apostoly Petera, momba ilay asa nanirahana azy ireo: “Nandidy anay koa izy mba hitory amin’ny olona ka hanazava tsara fa izy no notendren’Andriamanitra hitsara ny velona sy ny maty.”—Asa. 10:42.
2 Nampirisika antsika hanana faritany manokana, Ny Fanompoantsika Ilay Fanjakana Jona 2005. Hafiriana no tokony hitazonan’ny mpitory faritany iray? Hitan’ny mpitory sasany fa misy faritany mety amin’ny toe-javatra misy azy. Mety kokoa amin’ny mpitory sasany, ohatra, ny faritany eny akaikin’ny tranony. Toerana tsy misy fiakarana indray angamba no tian’ireo kilemaina, na osaosa. Tsara raha omena faritany mety aminy ny mpitory toy ireny mba hanampiana azy.
3 Tsara kokoa raha tsy tazonina ela be ny faritany, fa averina rehefa vita. Mahita vokatra tsara isika matetika, rehefa miovaova ny olona mitory ao amin’ny faritany iray. Samy manana ny toetrany mantsy ny mpitory, ka tsy mitovy ny fomba andraisan’ny olona azy ireo. Mety hahita olon-kafa ny mpitory be taona na tanora kokoa. Mety tsy hitovy amin’ny an’ilay nitory teo aloha mantsy ny fomba fitoriny na ny fotoana ahatongavany. Ho tontosa tsara ny fanompoantsika, raha mpitory samihafa no mitory amin’ny faritany iray. Afaka mandamina izany rehetra izany ny mpiandraikitra ny fanompoana, mba hanatratrarana io tanjona io.
4 Mety hisy mpitory te hihazona faritany maharitra ela, noho ny toe-javatra misy azy. Raha izany no izy, dia tokony hisy mpitory vitsivitsy hasaina hiasa an’ilay faritany miaraka aminy, tsindraindray. Afaka mandamina izany ny mpiandraikitra fianarana boky. Mety ho nahita olona liana na nianatra Baiboly ireny mpitory ireny. Mety ho izy ireo ihany no hitsidika an’ilay olona, na homeny an’ilay tompon’ny faritany izany, raha izy no tsara toerana kokoa hanampy azy.
5 Ny zava-dehibe dia hoe: Ahoana no hanatratrarana ny olona rehetra ao amin’ilay faritany? Tiantsika ho voasa tsara mantsy ny faritanintsika rehetra.