Mpiandraikitra ny Fanompoana: Fanampiana Ara-potoana
1 Ankoatra ny fanampiana tena tsara omena tsy tapaka amin’ny alalan’ny Fianarana ny Bokin’ny Kongregasiona, dia misy fandaharana manokana natao hanampiana antsika tsirairay. Mazàna ny mpiandraikitra ny fanompoana no tendrena hitarika Fianarana ny Boky iray, kanefa mandeha any amin’ny fianarana ny boky hafa izy isam-bolana, mba hiara-miasa amin’izy io mandritra ny herinandro. Ny mpanampy azy no misolo ny toerany amin’izay. Lazainy mialoha amin’ny mpitarika an’ilay fianarana ny boky ny fitsidihany, mba hiomanan’izy ireo handray soa feno amin’ilay herinandro.
2 Mandritra io herinandro manokana io, dia atao mandritra ny 45 minitra ny fianarana ny boky. Hanana 15 minitra avy eo ilay mpiandraikitra ny fanompoana mba hanaovana lahateny mampahery sy hanomezana torohevitra voafaritra tsara hanampiana antsika hanatsara ny fitoriantsika. Zava-dehibe ny fanatrehan’ny mpitory rehetra sy ny olona liana vao haingana azy io.
3 Tokony handray anjara feno amin’ny fanompoana ny mpitory rehetra ao amin’ilay fianarana ny boky mandritra io fitsidihana manokana io, indrindra fa amin’ny faran’ny herinandro. Azo atao ny fitoriana takariva amin’io herinandro io, raha mety. Anisan’ny zava-kendren’ny mpiandraikitra ny fanompoana ny hiara-manompo amin’ny mpitory maro araka izay azo atao. Ho afaka hiaraka amin’ny sasany amintsika any amin’ny fiverenana mitsidika sy ny olona ampianarintsika angamba izy. Afaka mangataka fanampiana aminy izay rehetra mila fanampiana sy fampaherezana amin’ny fanompoana. Mandray soa koa isika raha manatrika ny fivoriana alohan’ny fanompoana tarihiny ho an’ny fianarana ny boky amin’io herinandro io.
4 Maka fotoana ny mpiandraikitra ny fanompoana mba hiresahana amin’ilay mpitarika, mahakasika ny asan’ilay fianarana ny boky. Averina dinihina ny fandaharam-panompoana mahazatra, mba hahazoana antoka fa mety amin’ny rehetra ilay izy. Raha misy mila fanampiana na fampirisihana mba hanompo tsy tapaka, dia azon’ilay mpiandraikitra atao ny miresaka manokana aminy sy manome soso-kevitra amin-katsaram-panahy, mba handrosoany. Afaka manao fandaharana mba hitsidika mpitory tapatapaka miaraka amin’ilay mpitarika ny fianarana ny boky ny mpiandraikitra ny fanompoana. Azony atao koa ny miara-mandinika amin’ilay mpitarika ny tatitra momba ny fampianarana Baibolin’io fianarana ny boky io. Mety ho azon’izy ireo atao angamba ny miara-mampianatra ny mpianatr’ireo mpitory sasany, sy manome fampaherezana ara-panahy.
5 Mety hahalana kokoa ny fitsidihan’ny mpiandraikitra ny fanompoana raha maro ny Fianarana ny Bokin’ny Kongregasiona. Noho izany, dia tokony hanao ezaka bebe kokoa ny rehetra mba handray soa feno amin’ilay fitsidihany. Mariho ireo soso-kevitra omena mandritra ny fitsidihana, mba hanatsarana ny fanompoanao, ary miezaha mafy hampihatra azy ireny, alohan’ny fitsidihana manaraka. Mazava ho azy fa azo hatonina foana izy, rehefa mila fanampiana isika. Raha vitsy ny fianarana ny boky, dia hiezaka mafy ny mpiandraikitra ny fanompoana hitsidika azy ireny isaky ny enim-bolana, fara fahakeliny.
6 Rehefa mitsidika ny fianarana ny bokinao izy, dia ataovy azo antoka fa manatrika ianao sady miara-manompo aminy.