Aoka isika hiverina hitsidika ireo olona amin’ny fikendrena ny hanomboka fampianarana Baiboly
1 Rehefa avy nahita olona liana iray isika tamin’ny fanaovana fitsidihana voalohany, dia ilaina ny fanaovan-javatra amin’ny fomba feno mba hihazonana ho velona izany fahalianana izany. Mety hitarika mivantana ho amin’ny fifanakalozan-kevitra ara-baiboly sy fampianarana Baiboly mamonjy aina ny fanaovana fiverenana mitsidika. Diniho ireto fanipazan-kevitra ireto mba hanaovana fiverenana mitsidika mandaitra.
Amin’ny faran’ny fitsidihana voalohany, dia azonao atao ny mametraka ny fototry ny fiverenana mitsidika amin’ny fanontaniana toy izao:
◼ “Efa nanontany tena ve ianao hoe nahoana no misy fivavahana be dia be toy izao?” Amin’ny fiverenanao dia afaka milaza toy izao ianao: “Fony aho nitsidika anao farany, dia nataontsika ilay fanontaniana hoe nahoana no misy fivavahana be dia be toy izao. Misy antony maro ny amin’izany. Ho tiako ny hamaky aminao zavatra mahaliana izay hitako tamin’ny fandinihako an’io fanontaniana io.” Avadiho eo amin’ny pejy faha-262 ny boky Fanjohian-kevitra ary vakio ilay fizarana eo ambanin’ny lohatenikely hoe “Nahoana no misy fivavahana be dia be toy izao?”
2 Izay hataon’ilay Fanjakana.
Mba hanombohana fiverenana mitsidika iray, dia azonao atao ny manontany hoe:
◼ “Inona no hataon’ny Fanjakan’Andriamanitra?” Azo vakina aloha ny Apokalypsy 21:3, 4. Rehefa avy eo, dia sokafy eo amin’ny pejy faha-178 ny boky “Ho tonga anie ny Fanjakanao” ary vakio ny fehezanteny roa voalohany eo amin’ny fehintsoratra faha-11. Azonao lazaina fa amin’ny fitsidihanao manaraka dia hodinihina ny hoe “Iza no ho vahoakan’ilay Fanjakana?”
Mba hanombohan-dresaka dia afaka milaza toy izao ianao:
◼ “Noho ny toe-piainana ara-toekarena misy ankehitriny, dia olona maro no manontany tena raha ho afaka hanana fomba fijery manorina ny amin’ny hoavy izy. Hitako ho tena mampahery izay lazain’ny Baiboly momba ny hoavy. Mamelà ahy hizara aminao ny fampanantenana omen’Andriamanitra ao amin’ny Isaia 65:21, 22, 25.” [Vakio ary hazavao fohy ilay andinin-teny.] Avy eo dia sokafy eo amin’ny pejy faha-23 ny boky “Ho tonga anie ny Fanjakanao”. Asehoy ny fomba fanaovana fianarana Baiboly ataontsika, amin’ny fampiasana ny fehintsoratra faha-6 ka hatramin’ny faha-8. “Amin’ny herinandro ho avy, dia ho tiako ny handinika indray miaraka aminao ny fanontaniana ny amin’ny hoe: Inona no fototry ny tontolo vaovao ampanantenain’ny Baiboly?”
3 Ampiasao amim-pahendrena ny fotoana sisa tavela mba handraisana anjara amin’ny fanambarana feno izay atao ankehitriny any amin’ny firenena rehetra amin’ny tany. (Ampitahao amin’ny Asan’ny Apostoly 20:21, NW.) Ny fanaovana fiverenana mitsidika amin’ny fikendrena ny hanomboka fampianarana Baiboly dia mety hidika ho fiainana mandrakizay ho an’ireo olona itoriantsika.