Mampiofàna Tena Amin’ny Fametrahana ny Fifikirana Amin’Andriamanitra ho Zava-kendrenao
1 Ny Sekolin’ny Fanompoana Teokratika dia mampiofana antsika miandalana mba ‘hampiasa ny tenin’ny fahamarinana amin’ny fomba mety’. (2 Tim. 2:15, NW). Anisan’ireo mandray anjara amin’izany ve ianao? Raha tsy mbola manao izany ianao, ka mahafeno fepetra, nahoana raha misoratra anarana dieny izao mba handraisana soa avy aminy?
2 Ny lafiny lehibe iray amin’io sekoly io dia ny fandaharana amin’ny famakiana Baiboly isan-kerinandro. Ny fandaharanao amin’ny fianaranao manokana dia tokony hahatafiditra ny famakiana ireo toko ao amin’ny Baiboly asaina hovakina. Izany dia hahatonga anao hanapitra ny famakiana ny Baiboly manontolo amin’ny farany.
3 Manomboka amin’ny fandaharana amin’ny sekoly amin’ny 1993, ny famakiana Baiboly hataon’ny mpianatra faha-2 dia hovakina manontolo, ka tsy hisy fanapahana azy eny antenatenany. Izany dia midika fa ilay mpianatra hanao ity anjara ity dia tsy hanome fanazavana afa-tsy amin’ny teny fampidirany sy amin’ny teny famaranany ihany. Ilay rahalahy notendrena hamelabelatra ireo hevi-dehibe amin’ny famakiana Baiboly dia tokony hametra ireo fanazavana homeny momba ireo andinin-teny natao ho an’ny anjara faha-2. Amin’izay, dia ho afaka hamelabelatra amin’ny fomba feno ny fanazavany momba ilay famakiana Baiboly ilay mpandahateny hanao io anjara io.
4 Ilay mpiandraikitra ny sekoly dia hanamarika ny taratasy Torohevitra Momba ny Lahatenin’ireo manao ny anjara faha-2 sy faha-3 ary faha-4. Tsy voatery hanaraka ny filaharana ao amin’izany taratasy izany izy. Azony atao kosa ny hifidy zavatra hotandremana voafaritra tsara mifandray amin’ny lafin-javatra ilàn’ilay mpianatra hihatsarana. Tsy ilaina ny manamarika ny taratasy Torohevitra Momba ny Lahatenin’ilay mpandahateny manao ny anjara voalohany. Azo atao kosa ny manome azy torohevitra mitokana, rehefa ilaina izany. Ny mpiandraikitra ny sekoly dia tsy hanambara amin’ny mpanatrika alohan’ilay anjara izay lafin-javatra hotandreman’ilay mpianatra. Rehefa vita ilay anjara vao hilaza izany miaraka amin’ireo torohevitra ilaina izy, araka ny toromarika eo ambanin’ny lohatenikely hoe TOROHEVITRA SY FANAMARIHANA ao amin’ny Fandaharana Amin’ny Sekolin’ny Fanompoana Teokratika Amin’ny 1993. (Jereo koa kmE 12/82 p. 3.)
5 Izay rehetra mahafeno fepetra dia tokony hanararaotra amin’ny fomba feno ireo fandaharana ara-panahy ataon’i Jehovah, anisan’izany ny fampiofanana atolotry ny Sekolin’ny Fanompoana Teokratika. Izany fampiofanana izany dia afaka mitarika ho amin’ny fanompoana mamokatra. — 1 Tim. 4:7.