Fepetra Takina Amin’ny Mpitory Vaovao sy ny Mpitory efa Za-draharaha
1 Nanontany toy izao i Davida mpanao Salamo: “Jehovah ô, iza no hitoetra ao amin’ny tabernakelinao? Iza no honina ao an-tendrombohitrao masina?” Tamin’ny teny vitsivitsy voafantina tsara, dia namaly toy izao i Davida: “Izay mandeha tsy misy tsiny ary manao izay mahitsy, sady misaintsaina ny marina ny fony”. (Sal. 15:1, 2). Tsy niova ireny fepetra ireny. Izay rehetra, amin’izao andro izao, tonga mba hanolotra fanompoam-pivavahana ao anatin’ny kongregasiona kristiana, dia tsy maintsy miala amin’ireo fanao maloto ara-pitondran-tena sy ny fimamoana. Tsy misy toerana mihitsy eo anivon’ny vahoakan’i Jehovah ho an’ny olona mpila ady, na mahery setra, na mpamitaka. Na mpitory vaovao isika na mpitory efa za-draharaha, dia tsy maintsy mitoetra ho mahatoky amin’ny fihazonana ireo fari-pitsipika ambony amafisina ao amin’ny Tenin’Andriamanitra. — Gal. 5:19-21.
2 Maro be ireo vaovao miaraka amin’ny fandaminan’i Jehovah. Tanora sy be taona tsy an-kanavaka no nanova ny fisainany ka nampifanaraka ny fomba fiainany tamin’ireo fepetra takin’Andriamanitra. Ny ankizilahy iray tany Amerika Atsimo dia nihalehibe tsy nisy fitarihan’ny ray aman-dreny, ka namboly toetra tena niolakolaka. Fony izy 18 taona, dia za-dratsy tamin’ny zava-mahadomelina izy ary efa tany an-tranomaizina noho ny halatra vitany mba hanomezana fahafaham-po ny fahazaran-dratsiny. Noho ny fianarana ny Baiboly, dia nanapaka ny fiarahany tamin’ireo namany taloha izy, nahazo sakaiza vaovao teo anivon’ny Vavolombelon’i Jehovah, ary nanolotra ny fiainany ho an’Andriamanitra tamin’ny farany.
3 Tahaka izany koa, isika dia tsy maintsy tapa-kevitra ny hampifaly an’i Jehovah amin’ny fitondran-tenantsika rehetra “amin’ny rariny sy fahatokiana marina”. (Efes. 4:24, NW ). Manana adidy isika ‘hanary ny toetra taloha miaraka amin’ny fanaony’ ary ‘hitafy ny toetra vaovao, izay nohavaozina tamin’ny alalan’ny fahalalana marina’, raha tiantsika ny hitoetra ao anatin’ny fandaminan’Andriamanitra oharina amin’ny tendrombohitra. — Kol. 3:9, 10, NW.
4 Fitaomana mahery ny Tenin’Andriamanitra: Mety hisy heriny lehibe eo amin’ny fisainantsika sy ny asantsika amin’ny fomba manorina ny toetran’i Jehovah araka izay asehon’ny Baiboly antsika. (Rom. 12:2). Manana hery hanova ny saina sy handinika ny ao am-po ny Teniny. (Heb. 4:12). Mampianatra antsika ny Soratra ara-tsindrimandry fa ny sitrapon’i Jehovah dia mitaky ny hananantsika fiainana mahitsy ara-pitondran-tena sy ny handraisantsika anjara feno amin’ny fanompoana ampahibemaso ary ny tsy hanaovantsika tsirambina ireo fivoriana kristiana.
5 Amin’izao andro sarotra setraina izao, ireo fanerena mitombo dia mety hitaona ny Kristiana iray handika ireo lalàn’Andriamanitra. Raha atao tsirambina ny fianarana manokana, ny fianaram-pianakaviana, ireo fivorian’ny kongregasiona, na ny fanompoana, dia mety ho voavily hiala amin’ny finoana na dia ny Kristiana iray natanjaka teo aloha aza, angamba amin’ny fanaovana fitondran-tena maloto. Izany no antony nanoratan’i Paoly ho an’i Timoty toy izao: “Tandremo hatrany ny tenanao sy ny fampianaranao” ary, “Saintsaino hatrany izay lazaiko.” — 1 Tim. 4:16, NW; 2 Tim. 2:7, NW.
6 Na vaovao isika na efa matotra noho ireo taona maro nahitana fanandraman-javatra, dia tsy maintsy mihazona mazava eo anoloantsika ireo fepetra takin’Andriamanitra sy mahay mandanjalanja tanteraka eo amin’ny fanompoana, ary mihazona ny fanantenantsika ho mafy raha tiantsika ho voatsimbina ny aintsika. (1 Pet. 1:13-16). Zava-dehibe indrindra ny fitandremana isan’andro ireo fepetra ara-drariny takin’Andriamanitra.
7 Ataovy ho zava-kendrena ny ho eny amin’ny asa fanompoana mandritra itỳ volana farany amin’ny taom-piasana 1993 itỳ. Aoka ianao ho tapa-kevitra ny hanampy ny hafa hitombo ao amin’ny finoana ary hampitombo ny fahazoana vokatra eo amin’ny asa fanompoana. (Rom. 1:12). Aoka ny fisainanao hifantoka hatrany amin’ireo zavatra mahitsy, amin’ny tsy fanapatapahana ny fianarana manokana sy ny fianaram-pianakaviana ary ny fanatrehana ireo fivoriana. (Fil. 4:8). Ny fiezahanao hampifaly an’Andriamanitra amin’ny fanarahana ireo fepetra takiny, dia tsy maintsy ho voamarika. — Kol. 3:23, 24.