Fanehoana Tsy Fanavakavahana eo Amin’ny Fanompoantsika
1 “Tsy mizaha tavan’olona Andriamanitra”, hoy ny nambaran’i Petera, fa “izay olona matahotra Azy ka manao ny marina no ankasitrahany.” (Asa. 10:34, 35). Tanterahina hatrany amin’ny fanekena feno izany fahamarinana ambara mazava izany ny fanompoantsika amin’izao andro izao. Zava-dehibe àry ny hanaovantsika ny fiezahana rehetra mba handresena izay fefy rehetra manakantsakana antsika tsy hahatratra ny olona amin’ny vaovao tsara.
2 Rehefa mitory isan-trano any amin’ny faritra sasany isika, dia tsy mahalana no ahitantsika olona izay tsy miteny na tsy mahatakatra ny fiteny ampiasaina ao amin’ny kongregasionantsika. Misakana olona sasany tsy handray soa feno avy amin’ny hafatr’ilay Fanjakana torintsika ny fefy momba ny fiteny. Anisan’ireny olona ireny, ny marenina, izay mampita hevitra amin’ny alalan’ny baiko moana. Inona no azo atao mba handresena ny fefy momba ny fiteny izay misakana antsika tsy hahatratra ireny olona ireny amin’ny vaovao tsara amin’ny fomba mandaitra?
3 Ny Fikambanana dia handefa taratasy hofenoina ampy S-70a, Taratasy Kely Fanohizana ny Fifandraisana Amin’ireo Miteny Vahiny, any amin’ireo kongregasiona rehetra eto Madagasikara. Ny zava-kendren’io taratasy kely io dia ny mba hahazoana antoka fa ny olona izay monina ao amin’ny faritanin’ny kongregasiona, nefa tsy mahay ny fiteny eo an-toerana, ao anatin’izany ireo olona mampiasa baiko moana, dia homena fahafahana handre ny hafatr’ilay Fanjakana amin’ny fiteniny.
4 Rehefa mahita olona marenina na tsy mahazo ny fiteny ampiasaina ao amin’ny kongregasiona ianao ao amin’ny faritany, dia tokony hameno mazava iray amin’ireny taratasy kely ireny. Tokony hatao izany na dia tsy mampiseho fahalianana amin’ny fahamarinana aza ilay olona. Mety ho tsy ho afaka ny hahazo foana ny anaran’ilay olona ianao, nefa tokony hosoratanao ny adiresiny sy ny fiteny ampiasainy. Mety ho azo alatsaka ao anatin’ny vata fasiana filazana asa ao amin’ny Efitrano Fanjakana ilay taratasy. Ny mpitantsoratra dia hanangona ireo taratasy kely, hanamarina sy hijery raha mazava izy ireny, ary handefa azy ireny any amin’izay kongregasiona na antokon’olona akaiky indrindra, izay mikarakara ny olona miteny amin’ilay fiteny nosoratana.
5 Amin’ny toe-javatra sasany dia mety ho tsy ilaina izany. Ohatra, mety mahafantatra ny olona miteny frantsay mipetraka ao amin’ilay faritany ny kongregasiona miteny frantsay. Etsy an-kilany, ny olona izay miteny amin’ny fiteny iray dia mety hiparitaka ao amin’ny faritra lehibe. Mety ho voatery hiasa faritany midadasika ny kongregasiona na antokon’olona mampiasa ny fiteny toy izany ka hankasitrahany ny fanampiana amin’ny fitadiavana ireo olona mety ho azony ampiana.
6 Raha tsy misy mihitsy kongregasiona na antokon’olona afaka ny hanao fanambarana ao amin’ilay faritra manontolo amin’ilay fiteny ilaina, dia mety hisy mpitory ao amin’ny iray amin’ireo kongregasiona eo an-toerana, izay mahay ilay fiteny sy afaka ny hikarakara ilay fitsidihana. Raha tsy mahita olona mahay ilay fiteny mihitsy na dia taorian’ny nakana hevitra tamin’ny mpiandraikitra ny tanàna aza, ireo rahalahy eo an-toerana dia tokony hanao izay tsara indrindra azony atao mba hisy fanambarana homena. Ilay bokikely hoe Mifalia Amin’ny Fiainana Eto An-tany Mandrakizay! dia hita ho tena nahasoa tao anatin’ny toe-javatra toy izany.
7 Tokony ho mailaka hampiasa ireo taratasy kely fanohizana ny fifandraisana araka izay ilana izany ny mpitory tsirairay. Raha tsy manana taratasy hofenoina S-70a ampy ny kongregasiona, dia azo soratana eo amin’ny ravin-taratasy kely ny fanazavana ilaina ary averina araka izay nolazaina tetsy ambony. Amin’ny fanaovana fiezahana amim-pahatsorana mba hahatratrarana ny olona rehetra amin’ny vaovao tsara na inona na inona fiteniny, dia hanome taratry ny fitiavan’i Jehovah Andriamanitsika, “Izay tia ny olona rehetra hovonjena ka ho tonga amin’ny fahalalana ny marina”, isika. — 1 Tim. 2:4.