Zahan’i Jehovah — Nahoana no Mahasoa?
1 Ny olona rehetra dia maniry fahasalamana tsara. Mahatonga ny fiainana hahitam-pahafinaretana betsaka kokoa izany. Kanefa, maro ny olona izay efa manana fahasalamana tsara no mbola manao fizaham-pahasalamana ihany indraindray. Nahoana? Mitady hamantatra ny fisian’izay zava-manahirana ara-pahasalamana rehetra mitombo izy ireo mba hahafahana handray fepetra hitsaboana azy ireny. Mbola zava-dehibe kokoa noho izany aza ny hiarovana ny fahasalamantsika ara-panahy. Ny fankasitrahan’i Jehovah dia miankina amin’ny fitoerantsika ho “salama amin’ny finoana”. — Tit. 1:13, NW.
2 Izao no fotoana mety mba hozahan’i Jehovah. Nahoana? Noho i Jehovah ao amin’ny tempoliny masina, ary eo am-pizahana ny fon’ny olona rehetra izy. (Sal. 11:4, 5; Ohab. 17:3). Tahaka an’i Davida, isika dia mangataka an’i Jehovah mba hanao fizahana feno antsika: “Diniho [“Zahao”, NW] aho, Jehovah ô, ka fantaro; izahao toetra ny voako sy ny foko”. — Sal. 26:2.
3 Isika dia tsy maintsy mitandrina amin’ireo zavatra mandrahona ny fahasalamantsika ara-panahy izay mety ho avy ao anatintsika noho ny nofontsika tsy lavorary. Manoro hevitra toy izao ny Ohabolana 4:23: “Tandremo ny fonao mihoatra noho izay rehetra tokony hotandremana; fa avy ao aminy no ihavian’ny aina.”
4 Ny fahasalamantsika ara-panahy dia mety horahonan’ny tontolo simba sy ratsy fitondran-tena manodidina antsika. Raha mamela ny tenantsika hanatona akaiky loatra itỳ fandehan-javatra ratsy itỳ isika dia mety hanomboka hieritreritra tahaka azy, ka hampitombo ireo fihetsika araka an’izao tontolo izao. Na mety hanaraka fomba fiainan’izao tontolo izao isika ka ho resin’ny fanahin’izao tontolo izao. — Efes. 2:2, 3.
5 I Satana dia mety hampiasa fanenjehana na fanoherana mivantana eo am-piezahana handresy antsika amin’ny lafiny ara-panahy. Matetika kokoa anefa dia mampiasa amin-kafetsena zavatra manintona araka an’izao tontolo izao izy mba hanangolena antsika. I Petera dia mampirisika antsika ‘hahonon-tena sy hiambina’, satria i Satana dia “tahaka ny liona mierona mitady izay harapany”. Ampirisihina isika mba ‘hanohitra azy, ka hitoetra ho matanjaka amin’ny finoana’. — 1 Pet. 5:8, 9, NW.
6 Ilaina ny hiarovana ny fahasalamantsika ara-panahy, ka hihazonana finoana matanjaka amin’ny fanatanjahana azy io isan’andro. Ny apostoly Paoly dia manoro hevitra mba hitsapana ny finoantsika tsy an-kijanona. Toy ny anarahantsika amim-pahendrena ny torohevitra azo ampiharina omen’ny dokotera mahay iray antsika, no ihainoantsika an’i Jehovah koa rehefa mampiseho zava-manahirana mila hahitsy ny fizahana ara-panahy ataony. Izany dia mahatonga hety ny ‘haha-voahitsy’ antsika. — 2 Kor. 13:5, 11, NW.
7 I Jehovah no tena ilay Mpizaha lehibe tokoa. Marina foana ny filazalazany aretina. Fantany tsara izay ilaintsika. Amin’ny alalan’ny Teniny sy “ny mpanompo mahatoky” dia milaza ny sakafo mahasalama ara-panahy tokony horaisina izy. (Matio 24:45; 1 Tim. 4:6). Ny fihinanana tsy tapaka io sakafo ara-panahy mahavelona io, any an-tokantrano sy any amin’ireo fivorian’ny kongregasiona, dia ahafahantsika mitoetra ho salama ara-panahy. Ny fampiasan-tena ara-panahy tsy tapaka eny amin’ny fanompoana ary amin’ny asa kristiana hafa dia mahasoa koa. Noho izany, isika dia mandray tsara ny fizahana tsy tapaka ataon’i Jehovah, matoky fa izy dia hihazona antsika ao amin’ny fahasalamana ara-panahy tsara indrindra.