Miomàna ho Amin’ireo Fivorian’ny Kongregasiona ary Ankafizo Izy Ireny
1 Amin’ny maha-fitambaran’ny mpirahalahy antsika, dia miangona amim-pahendrena tsy tapaka ho amin’ireo fivoriantsika isan-kerinandro isika. (1 Tim. 4:15, 16). Ahoana no ahafahantsika mifaly sy manovo soa faran’izay betsaka avy amin’izy ireny?
2 Tokony hisy fotoana hatokana hanomanana tsy tapaka ireo fivoriana. Mety ho afaka handany fotoana bebe kokoa amin’ny fanomanana noho ny hafa ny sasany. Kanefa, na sahirana toy inona aza isika, dia fahendrena ny mahita fotoana sasantsasany hanomanana ireo fivoriana. Handraisan-tsoa manokana ny fiarahan’ny fianakaviana manomana. — Efes. 5:15, 16.
3 Ny Sekolin’ny Fanompoana Teokratika: Mikeleza aina mba haharaka ny fandaharam-pamakiana Baiboly isan-kerinandro. (Josoa 1:8). Jereo ilay zavatra hodinihina, ary ento ireo zavatra vita an-tsoratra ilaina mba hahafahanao hanaraka an’ireo mpandahateny. Eritrereto ny fomba azonao ampiasana izany fanazavana izany eo amin’ny fanompoanao.
4 Ny Fivoriana Momba ny Fanompoana: Jereo ny fandaharana voasoritra ao amin’ny Ny Fanompoantsika Ilay Fanjakana. Vakio ireo lahatsoratra horesahina. Raha lahatsoratra avy ao amin’ny Ny Tilikambo Fiambenana na zavatra vita an-tsoratra hafa no hodinihina, dia tadiavo sy vakio koa izany. Raha hisy fomba fampiseho momba ny fanompoana eny amin’ny saha hanaovana fampisehoana, dia jereo mialoha izany mba hahavonona anao hampiasa azy eo amin’ny fanompoanao.
5 Ny Fianarana Ny Tilikambo Fiambenana: Vakio mialoha ilay lesona, ka mariho ny valin’ireo fanontaniana. Hanampy anao hahazo fahazoan-kevitra tsara kokoa ny fitadiavana ireo andinin-teny voalaza. Hanitatra ny fahalalanao ny fisaintsainana momba ny fomba hifanarahan’ilay lesona amin’izay efa fantatrao. Mikasà handray anjara mandritra ny fianarana, amin’ny fanomanana valin-teny fohy amin’ny fehintsoratra iray na roa fara fahakeliny. Fomba lehibe iray hanaovana “fanambarana ampahibemaso ny fanantenantsika” izany. — Heb. 10:23, NW.
6 Ny Fianarana ny Bokin’ny Kongregasiona: Voalohany, dia diniho ilay zavatra ianarana; hevero ny lohateny sy ny lohatenikelin’ilay toko. Avy eo, rehefa mamaky ianao, dia asio fiheverana ireo hevitra fototra. Jereo ireo andinin-tenin’ny Baiboly manohana ny hevitra. Andramo valiana amin’ny fiteninao manokana ireo fanontaniana. Rehefa avy nanomana ilay lesona ianao, dia avereno ao an-tsainao ilay izy. Andramo tadidina ireo hevi-dehibe sy ireo fomba fanjohian-kevitra. — 2 Tim. 2:15.
7 Ankafizo ireo fivoriana: Mba hankafizana ireo fivoriana amin’ny fomba feno, dia zava-dehibe ny ho marim-potoana mba handraisana anjara amin’ny vavaka fanokafana angatahana ny fanahin’i Jehovah. Handray soa avy amin’ireo hiran’ilay Fanjakana mamelombelona koa ianao. Raha tsy manan-janaka kely na antony hafa ipetrahana any amin’ny faran’ny efitrano ianao, dia tsy isalasalana fa ho hitanao fa, raha mipetraka eny aloha ianao, dia ho kely kokoa ny fanelingelenana ary hahazo soa be kokoa avy amin’ny fandaharana ianao. Ireo ray aman-dreny manan-janaka kely izay tsy maintsy hoentina any ivelany mandritra ny fivoriana dia afaka mampihena ho faran’izay kely ny fanelingelenana amin’ny fipetrahana akaikin’ny lalantsara sy any aoriana.
8 Miezaha hijery ireo andinin-teny vakina. Izany dia hanampy anao hitadidy izay renao. Ny firesahana amin’ny fianakavianao sy ny namanao momba izay ianaranao dia hanampy mba handentehana ilay fanazavana ao an-tsainao. Ny fampiharana ireo fanoloran-kevitra ireo dia hahatonga ireo fivoriana hisy heviny sy hahafinaritra kokoa, ary tena “handrisika [antsika] ho amin’ny fitiavana sy ny asa tsara dia tsara” marina tokoa izy ireny. — Heb. 10:24, 25, NW.