Valin’ireo Fanontanianareo
◼ Koa satria isika izao manana ny boky Fahalalana Izay Mitarika ho Amin’ny Fiainana Mandrakizay, hafiriana moa no tokony hitarihana fampianarana Baiboly iray any an-tokantrano?
Ny Fanompoantsika Ilay Fanjakana tamin’ny Septambra 1993 dia nanoro hevitra ny hanohizana ny fampianarana Baiboly any an-tokantrano amin’ireo olona liana vao haingana mandra-pahavitan’ny fianarana boky roa. Koa satria isika izao manana ny boky Fahalalana, dia toa fahendrena ny hanaovana fanitsiana amin’io fomba fanaovan-javatra io, araka ny nosoritana tao amin’ny Ny Tilikambo Fiambenana 15 Janoary 1996, pejy faha-13 sy 14.
Ny boky Fahalalana dia natao hanampiana an’ireo izay ‘mirona araka ny mety ho amin’ny fiainana mandrakizay’, hianatra izay ilain’izy ireo ho fantatra mba hanaovany fanoloran-tena ho an’i Jehovah sy hanaovana batisa azy. (Asa. 13:48, NW ). Noho izany, rehefa avy namita io boky vaovao io ny mpianatra iray, dia tsy tokony hilaina ny hianarana boky faharoa miaraka amin’io mpianatra io. Rehefa manomboka manaiky ny fahamarinana ireo olona ampianarinao Baiboly, dia afaka mampirisika azy tsikelikely ianao mba hameno ny fahalalany amin’ny fanatrehana ireo fivorian’ny Vavolombelon’i Jehovah ary koa amin’ny famakiana ny Baiboly sy zavatra vita an-tsoratra kristiana maro samihafa.
Raha mahafantatra tsara ireo fanontaniana ao amin’ny pejy faha-175 ka hatramin’ny faha-218 ao amin’ny boky Voalamina mba Hanatanteraka Tsara ny Fanompoantsika ianao, izany dia mety hahasoa. Na dia tsy tokony hiresaka momba ireo fanontaniana ireo na handinika azy ireo miaraka amin’ilay mpianatra aza ianao, dia mety ho tsara ny hanantitranterana hevitra ao amin’ny boky Fahalalana. Izany dia hahatonga an’ilay mpianatra hanazava araka ny tokony ho izy ireo fahamarinana fototra ao amin’ny Baiboly rehefa mandinika an’ireo fanontaniana miaraka amin’ireo mpilatsaka hatao batisa ny loholona.
Tsy ilaina ny hanampiana ny fanazavana ao amin’ny boky Fahalalana, ka hampidirana zavatra avy any ivelany na fanaporofon-kevitra fanampiny, mba hanohanana fampianaran’ny Baiboly na hanaporofoana ny maha-diso ny foto-pampianarana diso. Izany dia hanalava kokoa fotsiny an’ilay fampianarana. Antenaina kosa ny hahafahana hamita ilay boky haingana ihany, angamba ao anatin’ny enim-bolana eo ho eo. Izany dia manantitrantitra ny ilantsika hianatra amin’ny fomba lalina mialoha an’ilay zavatra hodinihina, mba hahafahantsika hampiseho azy io amin’ny fomba mazava sy fohy. Ilay mpianatra koa dia tokony hampirisihina mafy hianatra mialoha sy hijery ireo andininy voalaza ary hiezaka hanavaka mazava izay ampianarin’ilay boky ao amin’ny toko tsirairay.
Nanamafy ny ilan’ny Vavolombelon’i Jehovah hitarika fampianarana Baiboly mandaitra maro kokoa ao anatin’ny fotoana fohy kokoa ilay Ny Tilikambo Fiambenana. (Jereo Isaia 60:22.) Ny fampiasana amin’ny fomba mandaitra ny boky Fahalalana dia afaka manampy an’ireo vaovao mba hahazo ilay fahalalana izay mitarika ho amin’ny fiainana mandrakizay sy hanao zavatra mifanaraka amin’izy io. — Jaona 17:3.