Fandaharana Vaovaon’ny Fivoriamben’ny Fizaran-tany
1 Ny fandaharana vaovaon’ny fivoriamben’ny fizaran-tany hanomboka amin’ny Septambra dia hamelabelatra ny loha hevitra hoe “Aoka Ianao Hahatsapa Ilay Fahasambarana Lehibe Kokoa Amin’ny Fanomezana”. (Asa. 20:35). Ny fahasambarana dia voalazalaza ho “ny fahatsapana ho finaritra sy afa-po”. Ny ankamaroan’ny olona amin’izao andro izao dia misambotra izay fahafinaretana rehetra azony alaina avy amin’ny fiainana, ary rehefa mahazo izany izy ireo dia matetika no mihelina izy io. Tsy tena fahasambarana izany. Kanefa, i Jehovah dia mampianatra antsika ny fomba hahitantsika soa mandrakizay. (Isaia 48:17; 1 Jaona 2:17). Ny fandaharana vaovaon’ny fivoriamben’ny fizaran-tany dia hanantitrantitra ny fomba ahafahantsika mahazo fahasambarana lehibe kokoa amin’ny fanomezana eo amin’ny lafiny ara-panahy.
2 Hianatra fomba azo ampiharina ahafahantsika tsy mitandro hasasarana eo amin’ny fanompoana isika. Ny sasany amin’ireo lahateny hataon’ny mpiandraikitra mpitety faritany dia mitondra ny lohateny hoe: “Fahazoana Sakaiza Amin’ny Alalan’ny Harena Tsy Marina”, “Hajao ny Fandaharan’Andriamanitra Momba ny ‘Fanomezana Voaforona Lehilahy’ ”, ary “Aoka Ianao Hahatsapa Ireo Lafiny Maro Amin’ny Tena Fahasambarana”. Ireo izay maniry hatao batisa amin’ny fivoriambe dia haniry hiresaka amin’ny mpiandraikitra mpitantan-draharaha mba hahafahan’izy io handamina ny hisian’ny loholona hiara-mandinika an’ireo fanontaniana amin’ny batisa amin’izy ireo. Hitondra fahasambarana lehibe ho an’ireo izay hatao batisa ny fanompoana an’i Jehovah amin’ny fananana fifandraisana madio aminy.
3 Ny fanekena araka ny tokony ho izy ny fahefan’i Jehovah koa dia mitondra tena fahasambarana sy filaminan-tsaina. Mila mahalala izany ny olona rehetra. Noho izany, ny lahateny ampahibemaso amin’ny fivoriamben’ny fizaran-tany dia hamelabelatra ny loha hevitra hoe “Aoka Ianao ho Tafaray Amin’ny Vahoaka Sambatr’Andriamanitra”. Ataovy azo antoka ny hanasa izay rehetra nampiseho fahalianana tamin’ny fahamarinana mba ho tonga amin’io lahateny io. Tsy nahita filaminan-tsaina marina sy fahasambarana maharitra izy ireo teo ambanin’ny fanapahan’olombelona ao amin’itỳ tontolo itỳ, izay mipetraka eo amin’ny herin’i Satana. (Mpit. 8:9). Kanefa fifaliana toy inona moa no ho hitany amin’ny fifaneraserana amin’ny vahoaka sambatr’i Jehovah! — Sal. 144:15b, NW.
4 Na dia eo aza ny toe-javatra miharatsy eo amin’itỳ fandehan-javatra itỳ, dia tsy handiso fanantenana na oviana na oviana an’ireo izay mahatsapa ilay fahasambarana lehibe kokoa amin’ny fanomezana amin’ny lafiny ara-panahy, ilay Andriamanitra sambatra. (1 Tim. 1:11, NW ). Hasehon’ny fandaharana vaovaon’ny fivoriamben’ny fizaran-tany ny fahamarinan’izany. Aza avela handalo fotsiny izy io!