Fandraisana Soa Be Indrindra avy Amin’ny Indeksa 1991-1993
1 Amin’ny maha-Vavolombelon’i Jehovah antsika, dia manana ny tombontsoa lehibe indrindra eto an-tany isika. Misolo tena an’i Jehovah isika eo amin’ny raharaha ara-pitsarana iray manerana izao rehetra izao, izay itsarana an’ireo andriamanitra rehetra ivavahan’ny olona. (Isaia 41:1, 23; 43:12). Mba hanampiana antsika hiaro ny fanantenantsika amin’ny fomba mendrika, dia nanome antsika fitahirizam-boky feno tsara iray i Jehovah. (1 Pet. 3:15). Izany dia ny Indeksan’ny Zavatra Vita An-tsoratry ny Watch Tower 1991-1993, izay fanalahidy lehibe iray hahitana ny fanazavana ilaintsika. Raha mifankazatra amin’ireo lafiny samihafa mampiavaka azy isika, dia hanjary kinga amin’ny fampiasana azy.
2 Ahoana no anampian’ny Indeksa anao hanatanteraka ny fanompoanao sy hanatsara ny fiainanao? Manao izany izy amin’ny fanoroana ny lalana mitarika ho amin’ireo torohevitra sy fanazavana faran’izay tsara efa nomena taloha. Nomanina tamin’ny fieritreretana an’ireo rahalahy maneran-tany ny Indeksa. Na ny ankizy na ny efa zokiolona, na ny mpianatra ny Baiboly vaovao na ny loholona, dia samy hahita fakan-teny ilainy sy hahasoa azy.
3 Ahoana no ahitanao izay ilainao? Raha ny hevitry ny andinin-teny iray na maromaro mifampitohy no mahaliana anao, ny tsara indrindra dia ny manokatra voalohany indrindra ny indeksa araka ny andinin-teny any amin’ny farany. Nisy olona nanonona ny Jaona 10:30 mba hanaporofoana ny Trinite ve teny amin’ny fitoriana? Ny indeksa araka ny andinin-teny dia hitarika anao any amin’ny zavatra vita an-tsoratra manazava ny antony nilazan’i Jesosy ireo teny ireo. Ny indeksa araka ny andinin-teny dia hanatsara ny famakiana Baiboly ataontsika manokana, rehefa mitady fanazavana andinin-teny izay toa mahasanganehana na tsy mazava isika.
4 Ny indeksa araka ny foto-kevitra kosa dia manome tari-dalana hafa hahitana ireo fanazavana mahasoa ireo ihany. Ohatra, mety hila fanazavana momba izay tokony hataonao ianao raha tsy mamela anao hitondra ny zanakao any amin’ny fivoriana ny vadinao. Mba hahitana valiny, dia azonao atao ny mitady ny lohateny hoe “Lehilahy Manambady”, “Vehivavy Manambady”, “Ankizy”, “Fanoherana”, na “Fivoriana”. Momba ny foto-kevitra rehetra, raha tsy hitanao eo amin’ilay lohateny kely voalohany nosokafanao ilay fakan-teny notadiavinao, dia manandrama iray hafa. Manontania tena hoe: ‘Iza no voakasik’ilay izy? Ny toerana iray ve no zava-dehibe eto? Sa ny toetra na ny fahaizana iray? Sa ny fihetseham-po iray? Sa ny zava-kendrena iray?’ Raha mahita lohateny lehibe iray izay toa mety ianao, dia topazo maso aloha ireo fakan-teny hita eo ambaniny. Matetika izy ireo no mampitsitsy fotoana, satria manondro lohateny hafa izay mifanentana kokoa amin’izay ilainao.
5 Isika rehetra dia tokony hahafantatra tsara ilay lohateny lehibe hoe “Jehovah”. Eo ambanin’io lohateny io, ao amin’ny Indeksa 1991-1993, moa ve ianao mahita fakan-teny manazava hoe nahoana i Jehovah no namela ny zava-dratsy hisy mandritra ny fotoana kelikely? Ho hitanao eo koa ny lohatenikely eo afovoany hoe “Anarana”. Natambatra ao avokoa ny fakan-teny rehetra efa nivoaka momba ny anaran’i Jehovah.
6 Ny lohateny tena lehibe hafa dia ny hoe “Vavolombelon’i Jehovah”. Hita miaraka ao ireo fakan-teny momba ny fandaminan’ny Vavolombelon’i Jehovah. Fantatrao ve ny fomba fiheverantsika ofisialy momba ny fianarana ambony, ny politika, ny fitsaboana? Hahita fakan-teny ho an’ny fanontaniana toy izany ianao eo ambanin’ilay lohatenikely eo afovoany hoe “Zavatra inoana”. Tanisaina eo koa ny tantaran’ny Vavolombelon’i Jehovah amin’ny andro ankehitriny any amin’ny tany samihafa. Ary hita eo ambanin’ilay lohatenikely eo afovoany hoe “Fanambarana momba azy ireo” ny lisitr’ireo zavatra nolazain’ny olona momba ny Vavolombelon’i Jehovah.
7 Ny fanazavana momba ny nanatanterahan’ny vahoakan’i Jehovah amin’ny andro ankehitriny ny fanompoany mifandray amin’ilay Fanjakana dia ho hita amin’ny fijerena lohateny lehibe maromaro. Eo ambanin’ilay lohateny hoe “Daty”, dia misy lohatenikely eo afovoany hoe “Fahatakarana hevitra inoana tsara kokoa”. Ireo fakan-teny momba ireo fanazavana lehibe ny fahatakarantsika ny foto-pampianarana sy ny faminaniana ary ny tandindona ara-paminaniana dia nalahatra araka ny taona. Ny hoe “Daty manana heviny ara-paminaniana” dia manaraka azy ireo saika avy hatrany. Izany dia ireo taona fony tanteraka na nanomboka tanteraka ireo faminaniana na tandindona ara-paminaniana voalaza eo.
8 Ireo tantaram-piainan’ny mpanompon’i Jehovah mahatoky dia loharanom-pampaherezana sy fampianarana ho antsika. Afaka manampy antsika hanorina fototra mafy ho an’ny hoavy ao amin’ny zanatsika sy ny mpiara-mianatra Baiboly amintsika izy ireny. Ho hitanao voalahatra araka ny anarana sy ny lohatenin’ireo lahatsoratra eo ambanin’ilay hoe “Fitantarana Fiainan’ny Vavolombelon’i Jehovah” ireny tantaram-piainana ireny.
9 Ny zavatra tsy ananan’iza na iza ankoatra ny Vavolombelon’i Jehovah dia ny fampianarana araka ny Soratra Masina momba ireo fanantenana roa ho an’ireo izay ankasitrahan’i Jehovah — ny ho any an-danitra sy ny ho eto an-tany. Ny lohateny lehibe hahitantsika fakan-teny momba ireo izay nahazo ny “fiantsoana avy any an-danitra” dia ny hoe “Kongregasionan’Andriamanitra”. (Heb. 3:1; Asa. 20:28; 1 Tim. 3:15). Ny lohateny hafa dia hoe “Sisa” sy hoe “144 000”. Ny lohateny roa hoe “Vahoaka Be” sy hoe “Ondry Hafa” no lohateny voalohany mitarika ho amin’ny fanazavana momba ireo izay manana fanantenana fiainana mandrakizay eto an-tany. — Apok. 7:9; Jaona 10:16.
10 Fanompoana eny amin’ny saha: Ny fitiavana an’i Jehovah sy ny mpiara-belona amintsika dia manosika antsika hitory ny vaovao tsaran’ilay Fanjakana. Amin’ny fahaizana manazava tsara ny fahamarinana, dia afaka mandrava “ny fisainana sy ny zavatra avo rehetra izay atsangana hanohitra ny fahalalana an’Andriamanitra” isika. (2 Kor. 10:5). Ny Indeksan’ny Zavatra Vita An-tsoratry ny Watch Tower dia natao mba hanampy antsika amin’io lafiny io.
11 Ny lohateny lehibe miresaka momba ny asa fitoriantsika dia hoe “Fanompoana eny Amin’ny Saha”. Voafaoka ao daholo ny lafiny rehetra amin’io fanompoana io: ny famaliana fanoherana, ny fampianarana Baiboly, ny fanolorana zavatra vita an-tsoratra, ny fihetsitsika manokana, ny fiverenana mitsidika, ny teny fampidirana. Nanohitra ve ny olona iray ka nilaza fa mifanipaka ny Baiboly? Sa izy maniry hahafantatra ny marina momba ny Trinite, ny Afobe, na ny Tsy Fahafatesan’ny Fanahy? Moa ve ny tenanao maniry hanomboka fampianarana Baiboly? Sa ianao mitarika fampianarana iray izay toa tsy mandroso? Moa ve ianao maniry hahazo tombontsoa fanampiny eo amin’ny fanompoana, ka hirotsaka ao amin’ny fanompoana manontolo andro? Hahita lohateny lehibe sy lohatenikely maro mifandray amin’ireo foto-kevitra ireo sy ny hafa koa ianao ao amin’ny Indeksa, izay hanome anao fakan-teny mahafa-po.
12 Afaka mandray soa avy amin’ny Indeksa ny fianakaviana: Ny Indeksa 1991-1993 dia afaka manampy antsika hahita toro lalana momba ny toe-javatra maro samihafa hita ao amin’ny fiainam-pianakaviana. Moa ve ianao mieritreritra ny hanambady? Eo ambanin’ny lohateny hoe “Fanambadiana” ianao dia hahita ny lohatenikely hoe “Fifidianana vady”. Ireo fakan-teny omena ao dia hitarika anao ho amin’ny torohevitra momba io raharaha izay mety ho sarotra io. Ahitana ny lohatenikely hoe “anjara asan’ny lehilahy” sy “anjara asan’ny vehivavy” koa ao, izay manome fakan-teny momba ny fanazavana ilain’ireo maniry hanambady sy ireo efa manambady. Ankoatra izany, ny lohatenikely toy ny hoe “fifampiresahana” sy ny hoe “fahasambarana ao” dia mamela hahita hevitra izay mety hanatsara ny fanambadiana. Rehefa misy zava-manahirana mipoitra, ny lohatenikely hoe “zava-manahirana ao anatiny” dia afaka mitondra anao ho amin’ny torohevitra mandaitra mba handaminana azy ireo.
13 Ahoana no ahafahan’ny ray aman-dreny mitaiza ny zanany “ao amin’ny lalàm-pifehezana sy fanabeazana ara-tsaina izay an’i Jehovah”? (Efes. 6:4, NW ). Azo atao ny mahita torohevitra sy fanipazan-kevitra mahasoa, amin’ny fijerena ireo fakan-teny omena eo ambanin’ny lohateny hoe “Ankizy” sy hoe “Tanora” ao amin’ny Indeksa. Ary ahoana ny amin’ny fandentehana ny lalàn’i Jehovah ao am-pon’izy ireo? Ny lohateny hoe “Fampiofanan-janaka” dia mitarika ho amin’ny fanazavana feno fahaiza-mahatakatra ny lafiny rehetra amin’ny fitaizana zanaka, anisan’izany ny fanampiana azy ireo hamboly fifandraisana manokana amin’i Jehovah sy fitiavana ny fahamarinana. — 1 Pet. 2:2.
14 Na tanora isika na antitra, ny tombontsoantsika ho Vavolombelon’i Jehovah dia mahakasika ny lafim-piainantsika rehetra. Ny Indeksan’ny Zavatra Vita An-tsoratry ny Watch Tower 1991-1993 dia fitaovana tena mahatalanjona manampy antsika hanolokolo ny fankasitrahantsika ny tombontsoantsika. Hitantsika miharihary ny hasarobidin’io boky vaovao io, rehefa mampiasa azy tsara isika mba hahazoana fanampiana eo amin’ny fanompoantsika, ao amin’ny kongregasiona, eo anivon’ny fianakaviana, ary eny amin’ny saha fitoriana.