Tsara dia Tsara Tokoa ny Hanatrehana Fivoriana Foana!
1 Nandritra ny am-polony taona maro, dia maro tamin’ireo rahalahy malalantsika any Eoropa Atsinanana no norarana tsy hanao fivoriana ampahibemaso. Alao sary an-tsaina ny fifaliany rehefa nofoanana ny fandrarana, ary afaka niara-nivory tamim-pahalalahana izy ireo!
2 Mahakasika ny fitsidihany ny kongregasiona iray, dia nanoratra toy izao ny mpiandraikitra ny fizaran-tany iray: “Ny talata hariva, teo am-piandohan’ny fitsidihako indrindra, no simba ny fitaovana fanafanana. Nijanona teo amin’ny manodidina ny zero degre ny maripana tany ivelany, ary tokony ho teo amin’ny dimy degre Celsius teo monja tao anatiny. Nanao ny palitaony, ny fehitendany ny gan-tanany, ny kasiketiny, ary ny baotiny ireo rahalahy. Tsy nisy afaka nanaraka tao amin’ny Baiboly, satria tsy afaka namadika ireo pejy izy ireo. Rehefa nitsangana teo amin’ny lampihazo aho, nanao ny kompileko, dia jihitry ny hatsiaka, ary nahita ny fofonaiko isaky ny niteny. Ny nampiaiky volana ahy anefa dia ny tsy nandrenesako fitarainana na dia indraim-bava aza. Nilaza ny rahalahy rehetra fa tena tsara sy nahafinaritra ny nanatrika fivoriana!” Tsy nieritreritra akory ny hanapaka izany fivoriana izany aza ireo rahalahy!
3 Izany ve no tsapantsika? Moa ve isika mankamamy ny fahafahana hivory amin-kalalahana any amin’ireo fivoriantsika isan-kerinandro? Sa manamaivana ireo fivoriana isika rehefa tsara ny tarehin-javatra? Mety tsy ho mora ny fanatrehana fivoriana tsy tapaka, ary mety hisy fotoana izay hananantsika antony ara-dalàna tsy hanatrehana izany. Aza hadinoina na oviana na oviana anefa, fa misy amintsika mahita ny maha zava-dehibe ny fivoriana, ary saika manatrika foana na dia eo aza ny fandroson’ny taona, ny fananan-java-manahirana lehibe ara-pahasalamana, ny fananan-kilema ara-batana, ny fananana fandaharam-potoana iasana manasatra, ary ireo andraikitra lehibe hafa. Ohatra tsara tokony hotahafintsika re izany! — Ampitahao amin’ny Lioka 2:37.
4 Aoka hataontsika ho fahazarana ny manohana ny fanompoam-pivavahana marina amin’ny fanatrehana ny fivoriana kristianina rehetra, manomboka amin’ny antokom-pianarana ny boky madinika ka hatramin’ny fivoriambe. Nahoana isika no tokony hihevitra ny fanatrehana ireny fiaraha-mivory ireny ho tena zava-dehibe? Satria baiko avy amin’Andriamanitra ny hiarahantsika hivory. Misy anefa antony lehibe hafa. Mila ny soa entin’ny fampianarana avy amin’Andriamanitra sy ny fanampian’ny fanahy masina izay raisina any amin’ireo fivoriana isika rehetra. (Matio 18:20). Mahazo tanjaka amin’ny fifampaherezana isika rehefa miaraka amin’ireo rahalahintsika. — Heb. 10:24, 25.
5 Tamin’ny fiovan-tarehy, dia niteny toy izao i Petera: “Tompoko, tsara raha mitoetra eto isika”. (Lioka 9:33). Tokony ho toy izany koa no tsapantsika momba ireo fivoriantsika kristianina rehetra. Eny tokoa, tsara dia tsara ny hanatrehana fivoriana foana!