Fahatsiarovana ny Nahafatesan’i Kristy Atao Maneran-tany
1 Nandrotsaka fanomezana tondraka ho antsika i Jehovah. Ny tontalim-bokatry ny hatsaram-pony sy ny hatsaram-panahiny miharo fitiavana dia nomena ny filazalazana mazava tsara hoe ny “fanomezany maimaim-poana tsy hay lazaina”. Eny, mahatalanjona aoka izany ny “hatsaram-panahin’Andriamanitra amin’izay tsy mendrika akory”, hany ka tsy haintsika ny milazalaza azy. — 2 Kor. 9:14, 15, NW.
2 Ny fanomezany lehibe indrindra: I Jesosy Kristy, Mpanavotra ny olombelona, no ilay fanomezana lehibe indrindra. Nanome ny Zanany malala sady lahitokany i Jehovah, ho fanehoana ny fitiavany lehibe ny tontolon’ny olombelona. (Jaona 3:16). Mendrika ny hotsarovana maneran-tany izany fitahiana an’izay tsy mendrika akory izany. Rahoviana, ary amin’ny fomba ahoana? Ny takarivan’ny alakamisy 1 Aprily 1999, ny Kristianina maneran-tany dia hahatsiaro ny Sakafo Harivan’ny Tompo, ka hankalaza ny Fahatsiarovana an’ilay sorona lehibe indrindra amin’ny rehetra. — 1 Kor. 11:20, 23-26.
3 Maty ho antsika i Kristy na dia ‘fony mbola mpanota aza isika’, ary afaka mampiseho ny fankasitrahantsika manokana isika amin’ny fankalazana ny Fahatsiarovana ny nahafatesany sy amin’ny fanasana ny hafa mba hiara-manatrika amintsika io fisehoan-javatra faran’izay lehibe io. — Rom. 5:8.
4 Ilay fisehoan-javatra lehibe indrindra: Ny fankalazana ny nahafatesan’i Kristy dia manasongadina voalohany indrindra ny nanohanany ny fiandrianan’Andriamanitra tamin’ny fomba tsy nisy tomika. Mampahatsiahy antsika koa izy io fa afaka manana toerana madio eo anatrehan’i Jehovah isika, amin’ny fanehoana finoana ny soron’i Jesosy, ka amin’izany dia mahazo antoka ny amin’ny famonjena. (Asa. 4:12). Izy io tokoa no fisehoan-javatra lehibe indrindra ao anatin’ny taona!
5 Ny fitiavantsika ny namantsika dia miseho amin’ny fanasantsika azy ireo mba hiara-mankalaza amintsika ny Sakafo Harivan’ny Tompo. Ny soa azo avy amin’ny avotra dia mbola misokatra ho an’ireo olona an-tapitrisany maro izay mianatra ny hasarobidiny. (Fil. 3:8). Afaka mahazo ilay fanantenana mafy orina ny amin’ny fiainana mandrakizay, ireo izay maneho finoana ny soron’i Kristy. — Jaona 17:3.
6 Manome antsika fahafahana manokana mba hampisehoana fankasitrahana ny haben’ny hatsaram-panahin’Andriamanitra amin’izay tsy mendrika akory, ny vanim-potoanan’ny Fahatsiarovana. Io dia fotoana tsara dia tsara mba handraisana anjara amin-jotom-po amin’ny fitoriana ny vaovao tsara momba ny Fanjakan’Andriamanitra. Soa lehibe no miandry ny rehetra izay misaintsaina amim-pahatsorana ny fanomezana maimaim-poana tsy hay lazaina avy amin’i Jehovah, sy mandamina fotoana mba ho tonga any amin’io fankalazana isan-taona ny Sakafo Harivan’ny Tompo io!