Mitory Amim-pahasahiana ve Ianao?
1 Na dia nosamborina sy norahonan’ireo mpanohitra aza i Petera sy i Jaona, dia nanohy nanambara ny hafatra momba ilay Fanjakana tamim-pahasahiana izy ireo. (Asa. 4:17, 21, 31). Midika ho inona ho antsika amin’izao andro izao ny hoe mitory amim-pahasahiana?
2 Fanaovana fanambarana amim-pahasahiana: Ny teny mitovy hevitra amin’ny hoe “sahy” dia ny hoe “tsy manan-tahotra”, izay midika hoe “tsy mahalala tahotra mihitsy ary manana fahatanjahan-tsaina sy fiaretana”. Ho an’ny Kristianina marina, ny hoe mitory amim-pahasahiana dia midika hoe tsy matahotra ny miteny, isaky ny misy toe-javatra mety mba hilazana ny vaovao tsara amin’ny hafa. (Asa. 4:20; 1 Pet. 3:15). Midika izany fa tsy menatra ny vaovao tsara isika. (Sal. 119:46; Rom. 1:16; 2 Tim. 1:8). Araka izany, ny fahasahiana dia toetra iray ilaina mba hanatanterahana ny fanirahana antsika hitory ny vaovao tsaran’ilay Fanjakana, amin’izao fotoan’ny farany izao. Izy io dia manosika antsika hilaza ny vaovao tsara amin’ny olona, na aiza na aiza mety hahitana azy ireo. — Asa. 4:29; 1 Kor. 9:23.
3 Fahasahiana any an-tsekoly: Mirona hatahotra na ho menatra ve ianao ka manjary sarotra aminao ny fitoriana amin’ny mpiara-mianatra aminao? Tsy mora izany indraindray; tena mety ho sarotra mihitsy aza, raha ny marina. Kanefa, hanatanjaka anao i Jehovah raha mivavaka mba hanana fahasahiana hitoriana amin’ny hafa ianao. (Sal. 138:3). Hanampy anao hampahafantatra ny tenanao ho Vavolombelon’i Jehovah sy hahatohitra ny fanarabiana ny fahasahiana. Vokatr’izany, dia mety hamonjy ireo izay mihaino anao ny fitorianao any an-tsekoly. — 1 Tim. 4:16.
4 Fahasahiana any am-piasana: Fantatra ho Vavolombelon’i Jehovah ve ianao any am-piasana? Ny hany fomba ahafahan’ny mpiara-miasa aminao mandre ny vaovao tsara dia mety ho ny fitorianao amin’izy ireo. Hanampy anao hahazo andro tsy fiasana mba hanatrehanao ireo fivoriana kristianina sy ireo fivoriambe koa ny fahasahianao.
5 Fahasahiana rehefa ao anatin’ny fisedrana: Tena zava-dehibe ny fisikinantsika fahasahiana rehefa miatrika fanoherana isika. (1 Tes. 2:1, 2). Manampy antsika hihazona mafy ny finoantsika izy io, rehefa iharan’ny fandrahonana, ny fanarabiana, na ny fanenjehana mivantana isika. (Fil. 1:27, 28). Manatanjaka antsika hiorina mafy izy io, rehefa ao anatin’ny fanerena hampandefitra ny fifikirantsika amin’ny fari-pitsipik’i Jehovah, ilay Andriamanitsika, isika. Manatanjaka antsika hihazona ny fitiavantsika fihavanana izy io, rehefa mihantsy fifandirana ny hafa. — Rom. 12:18.
6 Na inona na inona zava-manahirana atrehin’ny tenantsika manokana, dia enga anie isika haneho fikirizana eo amin’ny fitoriana amim-pahasahiana ny vaovao tsara. — Efes. 6:18-20.