Aoka Ianareo ho Tafaray Tsara
1 Impiry moa ianao no talanjona noho ny nanamboarana ny vatan’olombelona tamin’ny fomba tsara dia tsara? (Sal. 139:14) Miara-miasa ny rantsambatana tsirairay eo amin’ny vatana. ‘Akambana sy ampiraisina tsara noho ny fifanompoan’ny isan-tonony’ ny rehetra eo anivon’ny fiangonana. I Kristy no mitarika azy ireo sady Lohany. (Efes. 4:16a) Noho izany, dia afaka mampiasa ny vahoakany tafaray mba hanatontosa asa mahatalanjona i Jehovah.
2 “Niray saina” ireo Kristianina tamin’ny taonjato voalohany rehefa nikarakara ny zavatra nilain’ny tsirairay teo amin’ny ara-panahy sy ara-nofo. (Asa. 2:44-47) Niara-niatrika fanenjehana mafy izy ireo ary nandresy izany noho ny fanohanan’i Jehovah. (Asa. 4:24-31) Nanambara ny hafatra momba ilay Fanjakana izy ireo na taiza na taiza nalehany, hany ka niely hatraiza hatraiza ilay hafatra. (Kol. 1:23) Manao ireo asa ireo koa amim-piraisan-tsaina sy ao amin’ny faritra midadasika kokoa ny Kristianina ankehitriny. Inona no mahatonga izany firaisan-tsaina izany?
3 Tafaray noho ny fampianaran’Andriamanitra: Tafaray isika rehetra manerana ny tany noho ny fivavahantsika. Ahoana no hetezan’izany? Manaiky ilay fitaovana ampiasain’i Jehovah mba hanomezana ‘hanina ara-panahy amin’ny fotoana’ isika. (Matio 24:45) Mankasitraka ireo lehilahy nataony “fanomezana” hampianatra ny fiangonana koa isika. Hitombo ny fahatakarantsika ny Tenin’Andriamanitra, rehefa manaiky amim-panetren-tena ny fandaharan’i Jehovah mba hanomezana sakafo ara-panahy isika. Hanjary hanana faniriana mitovy isika amin’izay, dia ny hanara-dia an’i Jesosy amin’ny maha mpianany antsika. Tsy maintsy manohy mianatra ny Tenin’Andriamanitra isika, ary ho tapa-kevitra ny hiezaka mafy mba ho tonga “amin’ny firaisan’ny finoana.” (Efes. 4:8, 11-13) Mamaky Baiboly isan’andro ve ianao ka mampandroso ny firaisan-tsaina ara-panahy eo amintsika?
4 Tafaray noho ny fifaneraserana amin’ny Kristianina hafa: Mampifandray akaiky antsika ny fivoriana kristianina. ‘Mifampandinika’ isika any amin’ireny fivoriana ireny. (Heb. 10:24, 25) Tsy izay miseho etỳ ivelany fotsiny anefa no tafiditra amin’izany. Miezaka kosa isika mba hahafantatra tsara ireo rahalahintsika. Toa an’i Jehovah, dia tokony hihevitra azy ireo ho sarobidy isika. (Hagay 2:7) Mihalalina ny fitiavantsika azy ireo ary mihamafy ny firaisan-tsaintsika, rehefa mihaino azy ireo maneho ny finoany isika. Anisan’ireo manatrika tsy tapaka ny fivorian’ny fiangonana ve ianao?
5 Mpiara-miasa eny amin’ny saha: Mampiray antsika eo am-panaovana ny sitrapon’Andriamanitra, ny fitoriana ilay vaovao tsara miaraka amin’ny mpiray finoana amintsika. Tia ireo ‘mpiara-miasa taminy hampandroso ny fanjakan’Andriamanitra’ ny apostoly Paoly. (Kol. 4:11) Manampy antsika hanatanteraka ny asa kristianina nanirahana antsika ny fifanampiana sy ny fitantarana ireo zavatra hita teny amin’ny fanompoana. Manamafy ilay fehy mampiray antsika koa izany.—Kol. 3:14.
6 Hery mampiray ny fanahy masina: Manome antsika ny fanahiny i Jehovah raha milofo manao ny sitrapony isika. Manampy antsika handamina ireo tsy fifanarahana sy hiara-monina amim-piraisan-tsaina izany. (Sal. 133:1) Manosika antsika ‘hitana ny firaisana avy amin’ny Fanahy amin’ny fehim-pihavanana’ koa izany. (Efes. 4:3) Afaka manao ny anjarantsika avy isika tsirairay, mba hampisy firaisan-tsaina eo amin’ny mpanompon’Andriamanitra. Mila maneho ny vokatry ny fanahy àry isika, rehefa mifandray amin’ny hafa.—Gal. 5:22, 23.
7 ‘Mampandroso ny fitiavana’ eo anivon’ny fiangonana isika, rehefa miara-manompo amim-piraisan-tsaina eo ambany fitarihan’i Kristy. (Efes. 4:16b) Ambonin’izany, dia manome voninahitra an’i Jehovah, ilay “Andriamanitry ny fiadanana”, izany.—Rom. 16:20.