Miderà An’i Jehovah Amin’ny Fitoriana Tsy Ara-potoana
1 Mitady ny fomba rehetra hiderana an’i Jehovah isan’andro ny mpanompony mahatoky. (Sal. 96:2, 3; Heb. 13:15) Fomba iray azontsika anaovana izany ny fitoriana tsy ara-potoana. Mpanompon’i Jehovah maro be ankehitriny no velom-pankasitrahana, satria nisy nanambara taminy ilay hafatra momba ilay Fanjakana, tamin’ny alalan’ny fitoriana tsy ara-potoana.
2 Matetika no misy olon-kafa mandre ilay hafatra momba ilay Fanjakana, rehefa mitory tsy ara-potoana amin’ny olona iray isika. Nahatonga olona maro hafa ho liana, ohatra, ny resaka nifanaovan’i Jesosy sy ny vehivavy samaritanina iray. (Jaona 4:6-30, 39-42) Fony tany am-ponja tany Filipy i Paoly sy Silasy, dia nitory tamin’ilay mpiambina tao, ka nanaiky ny fahamarinana ny ankohonany manontolo.—Asa. 16:25-34.
3 Rahoviana: Rahoviana ianao no afaka mitory tsy ara-potoana? Misy manao izany rehefa miantsena, mandeha amin’ny fitateram-bahoaka, na rehefa miandry any amin’ny dokotera. Ny hafa indray afaka mitory mandritra ny fiatoana any am-piasana na any am-pianarana. Mety hahatonga ny olona hanontany momba ny finoantsika ny fametrahana boky na gazety ara-baiboly iray amin’ny toerana taza-maso.—1 Pet. 3:15.
4 Fomba hanombohan-dresaka: Ren’ny zazavavy kely iray fito taona sy saro-kenatra tany am-pivoriana, fa tena zava-dehibe ny hitorian’ny rehetra. Nasiany bokikely roa àry tao anaty kitapony, rehefa niara-niantsena tamin-dreniny izy. Nanolotra bokikely iray tamin’ny ramatoa iray izay faly nandray izany izy, raha mbola sahirana nandoa vola ny reniny. Rehefa nanontaniana io ankizivavy saro-kenatra io hoe ahoana no nahasahiany nanatona ilay ramatoa, dia namaly izy hoe: “Hoy fotsiny aho hoe: Iray maka bahana, roa fiomanana, telo dia lasa! Ary dia lasa aho!”
5 Mila mafana fo toa an’io zazavavy kely io isika rehetra, raha te hitory tsy ara-potoana. Inona no hanampy antsika? Mivavaha mba ho sahy hiteny. (1 Tes. 2:2) Manomàna fanontaniana iray na fanazavana momba ny foto-kevitra iray mahaliana mba hanombohana ny resaka. Ary matokia fa hitahy ny ezaka ataonao i Jehovah.—Lioka 12:11, 12.
6 Midera an’i Jehovah isika sady faly, rehefa mitory amin’ny olona mifanena amintsika isan’andro. Mety hanampy ny olona handeha amin’ny lalan’ny fiainana mandrakizay koa izany.