Ahoana no Hananana ny Tena Firaisan-tsaina Kristianina?
1 Inona no afaka hampiray saina ny olona enina tapitrisa mahery, avy amin’ny tany 234 samihafa, sy mampiasa fiteny 380 eo ho eo? Tsy misy afa-tsy ny fanompoana an’i Jehovah Andriamanitra no hahatonga izany. (Mika 2:12; 4:1-3) Hitan’ny Vavolombelon’i Jehovah amin’ny zavatra iainany, fa tena misy ny firaisan-tsaina kristianina ankehitriny. “Andiany iray” isika sady “iray ihany ny mpiandry”, ka tapa-kevitra fa hanohitra ny toe-tsain’ity tontolo ity, izay mahatonga ny olona hisara-bazana.—Jaona 10:16; Efes. 2:2.
2 Mikasa ny hampiray ny anjely sy ny olona rehetra ao amin’ny fivavahana marina Andriamanitra, ary tsy maintsy ho tanteraka izany. (Apok. 5:13) Fantatr’i Jesosy fa tena lehibe izany fikasan’Andriamanitra izany, ka nivavaka mafy izy mba hiray saina ny mpanara-dia azy. (Jaona 17:20, 21) Inona no azontsika tsirairay atao mba hisian’ny firaisan-tsaina hatrany eo anivon’ny fiangonana kristianina?
3 Fomba hananana firaisan-tsaina: Tsy ho afaka ny hiray saina mihitsy ny Kristianina, raha tsy eo ny Tenin’Andriamanitra sy ny fanahiny. Raha mampihatra izay vakintsika ao amin’ny Baiboly isika, dia tsy ho voasakantsakana ny fanahy masina, fa hiasa eo amintsika. Izany dia hanampy antsika “hitana ny maha iray ny fanahy ao anatin’ny fihavanana, izay fatorana mampiray.” (Efes. 4:3) Manosika antsika hifampizaka amim-pitiavana koa izany. (Kol. 3:13, 14; 1 Pet. 4:8) Manao izay hisian’ny firaisan-tsaina hatrany ve ianao, ka misaintsaina ny Tenin’Andriamanitra isan’andro?
4 Mampiray saina antsika koa ny asa nanirahana antsika mba hitory sy hanao mpianatra. Lasa “mpiara-miasa ao amin’ny fahamarinana” isika, rehefa miara-miasa amin’ny hafa eny amin’ny fanompoana kristianina, sy ‘miara-miezaka hampandroso ny finoana ny vaovao tsara.’ (Fil. 1:27; 3 Jaona 8) Mihamafy ny fitiavana mampiray antsika eo anivon’ny fiangonana, rehefa manao izany isika. Nahoana raha asainao hiara-manompo aminao amin’ity herinandro ity, izay mpitory mbola tsy niarahanao tato ho ato?
5 Voninahitra tokoa ny antsika, satria anisan’ilay tena hany fianakavian’ny mpirahalahy iraisam-pirenena eto an-tany amin’izao andro izao! (1 Pet. 5:9) Tsy ela izay, dia nisy olona maro be nahatsapa izany firaisan-tsaina maneran-tany izany, nandritra ny Fivoriambe Iraisam-pirenena “Omeo Voninahitra Andriamanitra.” Enga anie isika tsirairay hanao izay hisian’io firaisan-tsaina sarobidy io hatrany, ka hamaky ny Tenin’Andriamanitra isan’andro sy handamina amim-pitiavana ny tsy fifanarahana, ary hitory ny vaovao tsara ‘amim-piraisan-tsaina.’—Rom. 15:6.