Nahoana Isika no Mila ny Fianarana Boky?
1 Niara-nivory ny antokona Mpianatra ny Baiboly na Vavolombelon’i Jehovah. Nanjary nantsoina hoe Fianarana Baiboly Iarahan’ireo Mpino ny Arivo Taona ireny fivoriana ireny, tamin’ny 1895. Niorina tamin’ireo boky hoe Fiandohan’ny Arivo Taona (anglisy) ny fianarana tamin’izany. Nantsoina hoe Fianarana Baiboly Ataon’ny Berianina ireny fivoriana ireny, tatỳ aoriana. (Asa. 17:11) Nohazonina ho vitsivitsy ihany mazàna ny mpanatrika ilay fianarana. Ny takariva no nanaovana azy io tany an-tranon’olona, tamin’ny ora nety tamin’ny rehetra. Toy izany no niantombohan’ny Fianarana Boky.
2 Fampaherezana sy fanampiana: Niniana natao vitsivitsy ny mpanatrika ny fianarana boky, mba hanomezan’izy ireo valin-teny bebe kokoa, ka hanehoany ampahibemaso ny finoany. Vokatr’izany, dia hisy “fifampaherezana”, satria hampahery ny hafa ny finoanao, ary hampahery anao kosa ny finoan’izy ireo.—Rom. 1:12.
3 ‘Hanazava ny tenin’ny fahamarinana amin’ny fomba marina tsara’ isika, raha mandinika sy manahaka ny fomba fampianatr’ilay mpiandraikitra fianarana boky. (2 Tim. 2:15) Mariho ny fomba hanazavany ireo andinin-teny iorenan’ny fianarana. Mety ho ny Baiboly ihany no ampiasainy hanaovana famerenana farany, raha toa ka manasongadina ny hevi-dehibe ireo andinin-teny. Manampy antsika hanatsara ny fahaizantsika mampianatra eo amin’ny fanompoana kristianina, ny ohatra tsara omeny.—1 Kor. 11:1.
4 Mitarika ny fianarana isan-kerinandro ny mpiandraikitra fianarana boky, sady fakan-tahaka eo amin’ny asa fitoriana. Miara-miasa amin’ny mpiandraikitra ny fanompoana koa izy, ka mandamina fandaharam-pitoriana mety tsara. Maniry hanampy ny rehetra ao amin’ilay fianarana boky izy, mba hanatontosan’izy ireo tsara ny andraikiny hitory ny vaovao tsara sy hanao mpianatra.—Matio 28:19, 20; 1 Kor. 9:16.
5 Miahy izay hahasoa ny tsirairay eo anivon’ny fianarana boky ilay mpiandraikitra azy io. Hita izany any am-pivoriana sy rehefa miara-manompo amin’ny mpitory izy. Mitsidika ireo rahalahy any an-tranony koa izy, mba hampaherezana azy ireo. Tsy tokony ho menatra hanatona ny mpiandraikitra fianarana boky ny rehetra, na rahoviana na rahoviana ilan’izy ireo fanampiana.—Isaia 32:1, 2.
6 Mifampahereza: Rahalahy sy anabavy vitsivitsy matetika no miara-mivory, any amin’ny tany ameperana ny asan’ny vahoakan’Andriamanitra. Hoy ny rahalahy iray: “Norarana ny asa kristianina nataonay, kanefa nivory foana izahay isan-kerinandro, raha mbola azo natao koa. Nozarazaraina ho antokon’olona 10 ka hatramin’ny 15 izahay. Nampahery anay ireny fivoriana ireny, noho ny fianaranay ny Baiboly, sy noho ny fiarahanay tamin’ireo rahalahy taorian’ilay fianarana. Samy nitantara ny zavatra niainanay izahay, ka nanjary takatray fa nanao ady mafy ny tsirairay taminay.” (1 Pet. 5:9) Enga anie isika rehetra hifampahery toy izany, ka hiara-miasa tsara amin’ny Fianarana Boky misy antsika.—Efes. 4:16.
[Fanontaniana]
1. Ahoana no niantombohan’ny Fianarana Boky?
2. Ahoana no ahafahantsika mifampahery any amin’ireo fianarana boky?
3, 4. Nahoana no manampy antsika hanatontosa ny fanompoantsika ny fianarana boky?
5. Inona no fanampiana raisintsika eo anivon’ny fianarana boky?
6. a) Nahoana no nampahery ny rahalahintsika tany amin’ny tany sasany ny fivoriana, na dia voatery nozarazaraina aza izy ireo? b) Ahoana no nandraisanao soa tamin’ny fianarana boky?