Aoka Ianao Haneho ny Toe-tsain’ny Mpisava Lalana
1 Afaka maneho ny toe-tsain’ny mpisava lalana ny mpitory ilay Fanjakana rehetra, na mpisava lalana izy na tsia. Tena maniry hankatò ilay baiko mba hitory sy hanao mpianatra izy ireo. (Matio 28:19, 20; Asa. 18:5) Miahy ny olona izy ireo, ka mamoy zavatra sasany mba hanatanterahana ny fanompoany. (Matio 9:36; Asa. 20:24) Vonona hanao izay rehetra azony atao ny mpanompon’i Jehovah mba hanampiana ny olona hianatra ny fahamarinana. (1 Kor. 9:19-23) Andeha isika handinika ny ohatry ny mpanompon’i Jehovah iray naneho izany toe-tsaina izany, dia i Filipo mpitory ny vaovao tsara.
2 Nitory sy nampianatra: Nanana andraikitra lehibe teo anivon’ny fiangonana tamin’ny taonjato voalohany i Filipo. (Asa. 6:1-6) Ny asa lehibe indrindra nataony anefa dia ny fitoriana ny vaovao tsara, ary tena nazoto nanao izany izy. (Asa. 8:40) Tsy maintsy miantsoroka ny andraikitra nanendrena azy ny anti-panahy sy ny mpanampy amin’ny fanompoana. Afaka maneho ny toe-tsain’ny mpisava lalana koa anefa izy ireo, ka miezaka ny hafana fo sy ho loha laharana amin’ny fanompoana. Tena hampirisika ny fiangonana haneho ny toe-tsain’ny mpisava lalana izany!—Rom. 12:11.
3 Nihamafy tampoka ny fanenjehana taorian’ny nahafatesan’i Stefana, ka nikorontana be ny fiainan’ny mpianatra. Mbola nitory foana anefa i Filipo, ary nandray anjara lehibe tamin’ny fanombohana ny fitoriana tamin’ny Samaritanina izy. (Asa. 8:1, 4-6, 12, 14-17) Afaka manahaka ny ohatra navelany isika, ka hitory ny vaovao tsara hatrany, na dia iharam-pitsapana aza. Tsy hanavakavaka koa isika, fa hitory amin’ny olona rehetra hitantsika.—Jaona 4:9.
4 Tena nahay nampianatra ny Tenin’Andriamanitra i Filipo. Hita izany ao amin’ilay fitantarana momba ny niovan’ilay tandapa etiopianina ho Kristianina. (Asa. 8:26-38) Maneho ny toe-tsain’ny mpisava lalana koa isika, rehefa miezaka hahay hampiasa ny Baiboly sy handresy lahatra amin’ny alalan’izy io. (Asa. 17:2, 3) Toa an’i Filipo, dia mitory ny vaovao tsara isika any amin’izay mety hahitana olona, sy rehefa afaka manao izany.
5 Fianakaviana sy fiangonana: Azo inoana fa nisy vokany tsara teo amin’ny zanany vavy, ny toe-tsain’i Filipo sy ny ohatra nomeny. (Asa. 21:9) Toy izany koa fa hotahafin’ny ankizy ny ray aman-dreny, raha mampifantoka ny fiainany amin’ny asan’ilay Fanjakana. Vizana ny ray aman-dreny amin’ny faran’ny herinandro, nefa raha mazoto mitory izy, dia mety hisy vokany lalina eo amin’ny zanany izany.—Ohab. 22:6.
6 Nampiantrano an’i Paoly sy Lioka i Filipo. Kristianina be zotom-po izay niasa mafy teo amin’ny fanompoana an’i Jehovah izy ireo. (Asa. 21:8, 10) Ahoana no ampisehoantsika fa mankasitraka sy manohana an’ireo mpitory be zotom-po isika ankehitriny? Azontsika atao ny miara-miasa aminy mandritra ny tapak’andro maraina na hariva, amin’ny andro tsy dia isian’ny mpitory hafa mivoaka manompo. (Fil. 2:4) Afaka manasa azy hiara-mikorana amintsika any an-trano koa isika, mba hifampahery aminy. Enga anie isika rehetra haneho ny toe-tsain’ny mpisava lalana, na inona na inona toe-javatra misy antsika.
[Fanontaniana]
1. Inona no atao hoe toe-tsain’ny mpisava lalana?
2. Ahoana no anahafan’ny anti-panahy sy ny mpanampy amin’ny fanompoana ny zotom-pon’i Filipo tamin’ny fanompoana?
3. Ahoana no hanehoantsika ny toe-tsain’ny mpisava lalana na dia iharam-pitsapana aza?
4. Mpampianatra nahay i Filipo. Ahoana no azontsika anahafana azy?
5. Ahoana no anampian’ny ray aman-dreny ny zanany mba hanana ny toe-tsain’ny mpisava lalana?
6. Ahoana no ampisehoantsika fa mankasitraka ny mpisava lalana eo anivon’ny fiangonantsika isika?