Fizarana 10—Fitarihana Fampianarana Baiboly Mandroso
Ampiofano Hitory Isan-trano ny Mpianatra
1 Afaka manomboka mitory miaraka amin’ny fiangonana ny mpianatra ny Baiboly, rehefa hitan’ny anti-panahy fa mahafeno fepetra ho mpitory tsy vita batisa izy. (Jereo ny boky Voalamina mba Hanao ny Sitrapon’i Jehovah, p. 79-81.) Ahoana no hanampiantsika ilay mpianatra hitory isan-trano?
2 Miaraha manomana: Tena ilaina ny manomana tsara. Asehoy an’ilay mpianatra ireo fomba fampiseho ao amin’ny Fanompoantsika Ilay Fanjakana sy ny boky Fanjohian-kevitra. Ampio izy hifidy fomba fampiseho tsotra sy mety amin’ny faritaninareo. Ampirisiho izy hampiasa Baiboly foana, dieny vao manomboka mitory.—2 Tim. 4:2.
3 Tena mila manao fanazaran-tena ny mpitory vaovao. Asehoy azy mandritra ilay fanazaran-tena ny fomba hahaizany handanjalanja, rehefa mamaly izay zavatra lazain’ny olona matetika eny amin’ny faritany. (Kol. 4:6) Omeo toky izy fa tsy voatery ho fantatry ny mpitory daholo ny valin’ny fanontaniana mety hapetraky ny olona. Tsara kokoa matetika, ny milaza fa hanao fikarohana, ary hiverina hiresaka an’ilay izy amin’ny manaraka.—Ohab. 15:28.
4 Miaraha mitory: Fomba fampiseho niarahanareo nanomana ampiasaina, rehefa mitory isan-trano voalohany ianareo. Ampirisiho izy hijery ny fomba anaovanao izany, ary asaivo manao izy avy eo. Mety ho tsara kokoa indraindray ny mampandray anjara kely azy fotsiny, toy ny hoe mamaky sy manazava andinin-teny iray. Asio fiheverana ny maha izy azy sy ny fahaizany. (Fil. 4:5) Derao foana izy, rehefa mampiofana azy miandalana amin’ny lafiny samihafa amin’ny fitoriana ianao.
5 Tena ilaina hampiana hanana fandaharam-potoana tsara ny mpitory vaovao iray, mba hitoriany tsy tapaka isan-kerinandro raha azo atao. (Fil. 3:16) Manaova fandaharam-potoana hentitra mba hiarahana hanompo aminy, ary ampirisiho izy hiaraka amin’ny mpitory hafa be zotom-po. Hanampy azy ny fiarahana amin’ireny mpitory ireny sy ny ohatra omen’izy ireny. Hihamahay izy ary hahita fifaliana rehefa mitory isan-trano.