Fiovana Mahafaly Momba ny Tilikambo Fiambenana!
1 Naharay an’izao fampandrenesana mahafaly izao ny fiangonana, teo am-piandohan’ity taona ity: Hisy karazany roa Ny Tilikambo Fiambenana, manomboka amin’ny Janoary 2008. Ny iray gazety ho an’ny besinimaro, ary ny iray ho antsika Vavolombelon’i Jehovah! Mety hanontany tena àry ianao hoe: ‘Inona no tsy hampitovy an’ireo gazety roa ireo? Inona no hahatsara kokoa azy ireo? Hisy zava-baovao ve amin’izy ireo?’
2 Fahasamihafana: Hantsoina hoe Gazety ho An’ny Besinimaro, ilay Tilikambo mivoaka isaky ny voalohan’ny volana. Natao indrindra ho an’ny besinimaro ny lahatsoratra rehetra ao amin’izy io. Hantsoina hoe Gazety Fianarana kosa ilay mivoaka isaky ny faha-15 amin’ny volana, ary tsy hatolotra eny am-pitoriana. Ho hita ao ny lahatsoratra fianarana rehetra mandritra ny volana sy ny lahatsoratra hafa tena mahasoa ny Kristianina vita fanoloran-tena. Tsy natao hahaliana ny Vavolombelona ihany ny Gazety ho An’ny Besinimaro, fa natao indrindra koa ho an’ny olona tsy Vavolombelona nefa manaja ny Baiboly. Mbola hisy ihany ny Mifohaza! izay natao ho an’ny olona rehetra, anisan’izany ireo tsy mino an’Andriamanitra sy ireo tsy Kristianina.
3 Nahoana no tsara kokoa?: Tsy voatery hohazavaina intsony mba ho azon’ny olona tsy Vavolombelona ny teny sasany toy ny hoe “mpisava lalana”, ao amin’ny Gazety Fianarana. Havantana amin’ny Vavolombelon’i Jehovah sy ny mpianatra Baiboly efa mandroso ny fanazavana ao anatiny. Ahoana indray ny amin’ilay Gazety ho An’ny Besinimaro? Havantana amin’ny olona tsy Vavolombelona ny foto-kevitra sy ny fomba fanoratra an’ireo lahatsoratra ao anatiny. Inoana àry fa hahafinaritra azy ireo ny hamaky an’ilay gazety manontolo. Mazava ho azy fa hahasoa ny Vavolombelon’i Jehovah rehetra koa ny famakiana azy io. Tilikambo iray sy Mifohaza! iray ihany no hatolotsika isam-bolana. Noho izany, dia hanana iray volana be izao isika mba hanatsarana ny fomba fanolorantsika.
4 Zava-baovao: Kasaina hasiana zava-baovao vitsivitsy ao amin’ny Gazety ho An’ny Besinimaro. Anisan’izany ny fanazavana amin’ny fomba tena tsotra ireo fampianarana fototra ao amin’ny Soratra Masina. Haseho ao koa ny fomba anampian’ny Baiboly ny fianakaviana. Hisy lahatsoratra hampirisika ny tanora hianatra Baiboly. Hahitana lahatsoratra iray hanasongadina andalan-teny voafaritra tsara, izay mampianatra momba ny toetran’i Jehovah, ao amin’ny gazety tsirairay.
5 Mivavaka izahay mba hotahin’i Jehovah izao fandaharana vaovao momba Ny Tilikambo Fiambenana izao. Enga anie ka hihamaro hatrany ny olona mendrika handre ny vaovao tsara, amin’ny alalan’io gazety io sy ny Mifohaza!—Matio 10:11.