Ny Toetra Mampiavaka ny Mpampianatra Mahay
1. Inona no toetra mampiavaka ny mpampianatra mahay?
1 Inona no mahatonga ny mpitory iray ho mpampianatra mahay? Ny fianarana vitany ve? Sa ny traikefany? Sa ny fahaizany? Tsy izany loatra, fa noho ny toetra iray. Izy io no mampiavaka ny mpianatr’i Jesosy, sady fanatanterahana ny Lalàna, ary toetran’i Jehovah lehibe indrindra. (Jaona 13:35; Gal. 5:14; 1 Jaona 4:8) Tsy inona izany fa ny fitiavana. Maneho fitiavana ny mpampianatra mahay.
2. Nahoana isika no tena tokony ho tia olona?
2 Tia olona: Tia olona i Jesosy, ilay Mpampianatra Lehibe, ka maro no vonona hihaino azy. (Lioka 5:12, 13; Jaona 13:1; 15:13) Raha tena miahy ny olona koa isika, dia hitory foana isaky ny afaka manao izany. Tsy ho kivy isika na eo aza ny fanenjehana, ary na maro aza no tsy miraika. Tena miahy an’ireo olona tsirairay itoriantsika isika, ka izay mampanahy azy no resahintsika. Hanokana fotoana hanampiana ny mpianatra Baiboly tsirairay koa isika, sady hanomana tsara ny fampianarana rehetra.
3. Inona no vokany raha tena tiantsika ny fahamarinana?
3 Tia ny fahamarinana: Tian’i Jesosy ny fahamarinana, sady sarobidy taminy. (Mat. 13:52) Raha tia ny fahamarinana koa isika, dia hafana fo rehefa mitory. Hisy vokany amin’ny olona iresahantsika izany. Hotadidintsika fa tena sarobidy ilay hafatra entintsika. Raha mifantoka amin’izany isika, dia tsy hanahy be loatra hoe tsy mahay mitory.
4. Ahoana no hahatonga anao ho tia olona kokoa?
4 Ampitomboy ny fitiavanao: Ahoana no hahatonga anao ho tia olona kokoa? Saintsaino ny fitiavana nasehon’i Jehovah sy ny Zanany, ary tadidio fa tena mila ny fahamarinana ny olona. (Mar. 6:34; 1 Jaona 4:10, 11) Ho tiantsika kokoa ny fahamarinana, raha mianatra samirery tsy tapaka isika sady misaintsaina. Anisan’ny vokatry ny fanahy koa ny fitiavana. (Gal. 5:22) Mangataha àry amin’i Jehovah mba homeny ny fanahy masina sy hampiany haneho fitiavana bebe kokoa. (Lioka 11:13; 1 Jaona 5:14) Afaka ny ho mpampianatra Baiboly mahay ianao raha maneho fitiavana, na dia tsy nahita fianarana sy tsy manana traikefa na fahaizana be aza.