“Tanteraho Tsara ny Fanompoanao”
1. Nahoana i Paoly no ohatra tsara ho antsika?
1 Nahavita tsara ny fanompoany ny apostoly Paoly ka tsy nisalasala nanoro hevitra an’i Timoty hoe: “Tanteraho tsara ny fanompoanao.” (2 Tim. 4:5) Nahavita dia misionera telo, ohatra, izy tamin’ny taona 47 ka hatramin’ny taona 56. Imbetsaka ny Asan’ny Apostoly no milaza fa nanatanteraka tsara ny fanompoany i Paoly. (Asa. 23:11; 28:23) Ahoana no hanahafantsika azy?
2. Inona no azontsika atao mba ho vitantsika tsara ny fitoriana isan-trano?
2 Rehefa mitory isan-trano: Misy olona mbola tsy nandre ny vaovao tsara mihitsy, satria tsy mety tratra an-trano. Nahoana raha miezaka mankany an-tranony amin’ny fotoana mety hahitana azy? Ny hariva na ny faran’ny herinandro, ohatra, ny lehilahy vao tena tratra an-trano. Mila iverenana foana koa ny trano iray raha tsy nisy olona tao. Tokony hitoriana daholo mantsy ny trano tsirairay. Ary ahoana raha tsy mety mahita olona ao amin’ilay trano mihitsy ianao? Anoraty taratasy ilay olona na antsoy amin’ny telefaonina. Mety hisy vokany tsara izany.
3. Rahoviana avy ianao no afaka mitory?
3 Rehefa mitory tsy ara-potoana sy eny amin’ny toerana be olona: Mampahafantatra ny “tena fahendrena” amin’izay rehetra te hihaino azy ny mpanompon’i Jehovah. Mitory “eny an-dalambe”, ohatra, izy ireo na amin’izay “eny an-tany malalaky ny tanàna.” (Ohab. 1:20, 21) Manararaotra mitory ve ianao rehefa manao ny asa aman-draharahanao? ‘Mifantoka tanteraka’ amin’ny fanompoana ve ianao, ka mitory isaky ny afaka manao izany? (Asa. 18:5) ‘Manatanteraka tsara ny fanompoanao’ ianao, raha izany no ataonao.—2 Tim. 4:5; Asa. 10:42; 17:17; 20:20, 21, 24.
4. Nahoana ianao no mila mivavaka sy misaintsaina?
4 Mety hoe saro-kenatra na matahotahotra na manana olana hafa anefa ianao, ka lasa tsy sahy mitory. Matokia fa mahatakatra an’izay mahazo anao i Jehovah. (Sal. 103:14) Inona àry no azonao atao mba ho sahy hitory? Mivavaha amin’i Jehovah. (Asa. 4:29, 31) Rehefa mianatra samirery sy misaintsaina ny Tenin’Andriamanitra koa ianao, dia ataovy izay tena hahatsapanao fa sarobidy ny vaovao tsara. (Fil. 3:8) Hazoto hitory ianao amin’izay!
5. Inona no azontsika atao mba hanatanterahana ny faminanian’i Joela?
5 Naminany i Joela fa ‘hiroso hatrany’ ny vahoakan’Andriamanitra alohan’ny andron’i Jehovah, dia ilay andro lehibe sady mampahatahotra. Hitory foana izy ireo na inona na inona hitranga. (Joela 2:2, 7-9) Miezaha mafy àry hamita tsara an’io asa tsy hiverina intsony io!