Handray Soa Ianao Raha Manana ny Faritaninao
1. Inona no azon’ny mpitory atao raha be dia be ny faritanin’ny fiangonany?
1 Mahazo mangataka faritany hitoriana ny mpitory iray, raha be dia be ny faritanin’ny fiangonany. Azo lazaina hoe an’ilay mpitory ilay faritany amin’izay, ary mety ho eny akaikin’ny tranony. Hoy ny boky Voalamina, pejy 103: “Ho afaka hampiasa tsara ny fotoana anompoanao ianao, raha mahazo faritany amin’ny toerana mety. Mety ho tianao koa ny hanasa mpitory hafa hiara-mitory aminao ao amin’ilay faritaninao.”
2. Rahoviana ianao no afaka mitory ao amin’ilay faritaninao?
2 Rahoviana ianao no afaka mitory ao? Raha eny akaikin’ny toeram-piasanao ilay faritany, dia azonao atao tsara ny mitory ao rehefa antoandro na alohan’ny hodiana. Afaka manasa mpitory miasa eny akaiky eny ianao mba hiaraka aminao. Raha eny akaikin’ny tranonao indray ilay izy, dia mety tsara raha miara-mitory ao ianareo mianakavy rehefa hariva. Mazava ho azy fa mila mivavaka ianareo alohan’ny hitoriana, na dia tsy misy fivoriana alohan’ny fanompoana aza. (Fil. 4:6) Tadidio anefa fa mbola mila miara-mitory amin’ny fiangonana ianao, na dia efa mitory amin’ilay faritaninao aza. Ny faran’ny herinandro no fotoana tena tsara hiarahana amin’ny fiangonana, satria betsaka amin’io ny mandeha mitory.
3. Inona no soa ho azonao raha manana faritany ianao?
3 Inona no soa ho azonao? Afaka mitory amin’ilay faritaninao foana ianao, isaky ny malalaka. Tsy vitan’izay fa afaka mitory ela kokoa ianao sady tsy mila mandeha lavitra. Mety ho afaka hanao mpisava lalana mpanampy na maharitra àry ianao. Tsy sahirana koa ianao miverina mitsidika sy mampianatra an’izay olona liana, satria eny akaikinao ihany izy no mipetraka. Maro koa no mahita fa lasa mifankahalala kokoa amin’ny olona ao amin’ilay faritany izy ka lasa atokisan’izy ireo, indrindra raha nahazo nitory elaela tao izy, talohan’ny hanomezana an’ilay izy ho an’ny mpitory hafa. Mangataha àry faritany, fa mety hanampy anao sy ny fianakavianao hanatanteraka tsara ny fanompoana izany.—2 Tim. 4:5.