Hatsarao ny Fanompoanao: Ampio ny Mpianatrao mba Hazoto Hikaroka sy Handalina

Nahoana izany no tena ilaina? Tsy tokony hianina amin’ny fampianarana fototra ao amin’ny Baiboly ny mpianatra, raha te handroso sy hihamatotra ara-panahy. Tsy maintsy mameno ny sainy sy ny fony amin’ny zavatra lalina kokoa izy ireo. (Heb. 5:12–6:1) Mila ezaka anefa izany. Mila mampifandray an’ilay fanazavana vaovao amin’izay efa hainy mantsy izy rehefa mianatra, ary mamantatra hoe nahoana no mahasoa ilay izy. (Ohab. 2:1-6) Hahavita hamaly fanontaniana amin’ny alalan’ny boky sy gazetintsika ny mpianatra, raha mahay manao fikarohana. Raha miezaka mampihatra ny zavatra ianarany izy, dia ho vonona hiatrika ny fitsapana mahazo ny Kristianina.—Lioka 6:47, 48.

Ahoana no hanaovana azy?

Ataovy takany fa zava-dehibe ny mangataka ny fanampian’i Jehovah amin’ny vavaka, isaky ny hianatra Baiboly.—Jaona 14:26; 1 Kor. 2:10.
Vao manomboka mianatra izy, dia efa ampirisiho hanomana mialoha. Asehoy azy ny bokinao, ary ampianaro azy hoe ny teny na fitambaran-teny milaza ny hevi-dehibe ihany no tsipihina.
Asaivo mamaly amin’ny fomba fiteniny izy, amin’izay tsy mamaky fotsiny an’izay voalaza ao amin’ny boky.
Ampirisiho hamaky Baiboly isan’andro izy. Asehoy azy ilay fandaharana famakiana Baiboly ao amin’ny jw.org (na w09 1/8 p. 15), mba hanampiana azy. Tsy maintsy tapa-kevitra aloha izy, raha tsy izay tsy ho zatra hamaky Baiboly isan’andro. Tena handray soa anefa izy raha miezaka manao an’izany.—Sal. 1:2, 3.
Atoroy azy ny fomba fampiasa ny Fanondroana Bokin’ny Vavolombelon’i Jehovah na ny Watchtower Library na ny FITEHIRIZAM-BOKIN’NY Vavolombelon’i Jehovah ao amin’ny Internet, rehefa hikaroka valin’ny fanontaniana ara-baiboly izy. Ampianaro azy ny tarehintsoratra famantarana an’ireo boky fampiasa matetika any am-pivoriana, ohatra hoe ia ho an’ny boky Tahafo.

Andramo izao amin’ity volana ity:

Rehefa vita ny lohatenikely na toko iray, dia asaivo fintinin’ilay mpianatra amin’ny fehezanteny vitsivitsy ilay fianarana. Raha tsy manana mpianatra ianao, dia mianara mamintina an’izay novakinao tao amin’ny Baiboly, na ny fehintsoratra iray ao amin’ny Tilikambo Fiambenana. Hanampy anao hahatakatra ny zavatra ianaranao izany.