Ny fifandraisana eo amin’ireo mpitsabo sy ireo marary — Fiasana sarobidy iray

TAMIN’NY fiandohan’ireo taona 80, dia hita mazava tsara fa nilaina ny handraisana fanapahan-kevitra hentitra mba hanorenana fifandraisana tsaratsara kokoa eo amin’ny Vavolombelon’i Jehovah sy ny fitsaboana. Koa neken’ny kolejy foiben’ny Vavolombelon’i Jehovah ny hamoronana fandaharana iray izay mikendry ny hamatorana fifandraisana manorina eo amin’ireo mpitsabo sy ireo hôpitaly.

Nisy solontenan’ny foibe maneran-tany, tany New York, tonga tany amin’ny hôpitaly lehibe maro tao an-tanàna. Io fifampiraharahana io, izay tena nankasitrahan’ny mpiasa ao amin’ny hôpitaly, dia nahafahana nanorina ny fototry ny fifandraisana, tsy hoe mba hiteraka fifanoherana, fa mba hiaraha-miasa. Tatỳ aoriana ireny solontena ireny dia tonga tany amin’ireo tanàn-dehibe any Etazonia izay nikarakaran’izy ireo seminera natao hampahafantarana ireo mpitory Vavolombelon’i Jehovah teo an-toerana io fandaharana io. Mba hanatanterahana izany, dia nalamin’izy ireo indrindra izany fivoriana mba hihaonan’izy ireo izany tao amin’ny foibem-paritra ara-pitsaboana. Tamin’ny fandalovan’izy ireo tany Chicago, dia niresaka tamin’ny lehiben’ny mpanoratra ny Gazety momba ny fikambanana Amerikana ara-pitsaboana izy ireo, ary taorian’izany dia nangatahina izy ireo hanoratra lahatsoratra iray momba ny fomba hahafahan’ireo mpitsabo miara-miasa amin’ny Vavolombelon’i Jehovah.a

Tatỳ aoriana dia Vavolombelon’i Jehovah tany amin’ny tany maro hafa koa no nahazo io fampiofanana io, tahaka izany koa ireo toromarika an-taratasy mba hanaovana fandaharana mitovyb. Araka izany, ny seminera iray izay nalamina tany Kanada dia nitarika ny famoronana ny Komitin’ny fifandraisana amin’ny hôpitaly (izay nantsoina tao amin’io tany io tatỳ aoriana hoe Komitin’ny fifandraisana ara-pitsabona) ka ireo mpikambana ao aminy dia nandray fampiofanana. Ny komity tsirairay avy dia voaforon’ireo kristiana nanolo-tena an-tsitrapo — loholona — mahay mifampiraharaha amin’ireo mpitsabo, amin’ireo mpiasam-bahoaka, ary amin’ireo mpiasan’ny hôpitaly.

Fihaonana maro no natao tamina minisitry ny fahasalamana isam-paritra sasantsasany, tompon’andraikitry ny fikambanam-pitsaboana sy hôpitaly, ary manam-pahefana hafa eo amin’ny fitsaboana. Ireny fihaonana ireny dia nanampy tamin’ny fanentanana ny mpiasan’ny fitsaboana hahatsapa kokoa ny zavatra ahin’ny Vavolombelon’i Jehovah sy nametraka fototra mafy ho amin’ireo fifampiresahana manaraka.

Fanampiana azo atao

Taloha ela be no efa nahafantarana fa ny fanazavana hentitra dia afaka nanafoana izay nety ho fampifanatrehana ny kristiana marina iray sy ny mpitsabo iray mpanohana ny fitsaboana amin’ny alalan’ny fampidiran-dra. Tamin’ny fiandohan’ireo taona 60, tao amin’ny foibe maneran-tanin’ny Vavolombelon’i Jehovah, dia natomboka ny fanoratana ny lisitr’ireo mpitsabo ho azo iaraha-miasa izay zatra tamin’ny fomba fitsaboana solony, tsy mila fampiasana ra. Atỳ aoriana, raha toa ny mpitsabo iray na ny hôpitaly iray ka tsy nanaiky, ny komity iray dia afaka manome ny anaran’ireo mpitsabo hafa. Azo atao koa amin’izay ny mamindra ilay marary ary manankina ireo fikarakarana amin’ny antoko-mpiasa amin’ny fitsaboana hafa iray.

Ny vahaolana hafa iray dia ny fahafahan’ireo komitin’ny fifandraisana amin’ny hôpitaly manorina fifandraisana an-telefaonina amin’ireo mpandidy eo an-toerana sy ireo mpiray raharaha aminy havanana. Amin’ny toe-javatra sasantsasany, io karazam-pifandraisana avy hatrany io dia namela mpitsabo hanova ny fomba fitsaboan’izy ireo tsy hahitana fandrahonana tsy ara-drariny ny ain’ilay marary. Araka izany, amin’ny maha-mpanalalana azy eo amin’ilay marary sy ilay mpitsabo, ireo komity dia nianatra ny fahaizana sy ny fomba fanomezan-toky ny an-daniny sy ny an-kilany rehefa toa ilaina ny fampidiran-dra.

Fahombiazana miharihary

I Sonya dia zatovovavy iray marisidrisika, 13 taona, tamin’ny fiandohan’ireo taona 1989, fony izy nampahafantarina fa izy dia voan’ny fivontosan-komamiadana (tumeur cancéreuse) teo ambanin’ny masony. Tsy nanafina na inona na inona tamin’i Sonya sy ny ray aman-dreniny ny maha-sarotra ny fandidiana izay tsy maintsy hatao amin’i Sonya ny vehivavy mpandidy iray. Nitombo haingana ilay fivontosana; koa tsy tokony hangatahana andro àry ilay fandidiana. Azo ninoana fa tsy maintsy hanaraka fomba fitsaboana amin’ny alalan’ny tenan-javatra simika (chimiothérapie) ilay ankizy atỳ aoriana ary, araka ny voalazan’ilay mpitsabo, ireo ray aman-dreniny dia tokony hanome lalana amin’ny fampiasana fampidiran-dra. Kanefa ilay fianakaviana dia tsy afaka nanaiky io toe-javatra farany io noho ny feon’ny fieritreretana, satria mifanohitra amin’ny finoan’izy ireo ara-pivavahana izany. Vonona ny handidy ilay fivontosana ilay mpandidy izay nanara-maso an’i Sonya, satria natoky fa afaka hanala izany tsy misy fampidiran-dra izy. Nampalahelo anefa fa, noho ny fitsipiky ny hôpitaly, dia tsy nahita mpiasa miandraikitra ny fanatoranana mihitsy izy mba hanampy azy.

Lahimatoan’i Michael sy Valerie i Jonathan. Tamin’ny faran’ny taona 1989 — 16 taona izy tamin’izay —, ireo mpitsabo dia nahatsikaritra fa nisy fivontosana lehibe teo amin’ny ariny (rate). Ny fandidiana tsy misy fampidiran-dra dia tsy nanome toky azy ireo loatra, kanefa izy ireo dia nanao izany tamin-kerim-po mba hanajana ny fieritreretana tsara ara-pivavahan’ireo fianakaviana. Mbola vao nihanatanjaka io tovolahy kely io fony nampahafantarina ny fihombon’ny aretiny. Nidina tampoka ny tosi-drany, tahaka izany koa ny isan’ireo liomena (numération globulaire). Nodidiana fanindroany izy ka very ra betsaka, ary nidina tany amin’ny 5,5 ny isan’ny hemôglôbinina, izany hoe eo amin’ny ampahatelon’ny taha ara-dalàna. Tamin’izay ilay mpianatra ho dokotera dia niantsoantso toy izao “Miharatsy dia ratsy ny toe-pahasalaman’ny zanakareo. Tsy hiova hevitra izahay. Raha tsy mahazo ra izy dia hisetra fahafatesana! ” Inona no hatao?

Tamin’ireo toe-javatra roa ireo, dia nampanapa-kevitra ny fisalovanan’ny komitin’ny fifandraisana amin’ny hôpitaly tany Kanada. Nanome toky ny fianakavian’i Sonya ny iray tamin’izy ireo fa, raha toa ka nanjary ilaina izany, dia ho azony atao ny hanao fandaharana mba hamindrana io tovovavy kely io any amin’ny toeram-pitsaboana iray any an-tany hafa. Kanefa tsy nisy na inona na inona azo natao ve mba hahafahan’ilay mpandidy efa teo an-toerana hanao ny fandidiana? Raha ny marina dia niraiki-po aoka izany tamin’i Sonya io vehivavy io ka nikasa ny ho anisan’ireo antokon’ny mpandidy izy, na aiza na aiza toerana hanaovana izany. Kanefa tsy nilaina ny famindran-toerana. Ireo mpikambana tao amin’ny komity dia afaka nandresy lahatra ireo mpiasan’ny fahasalamana teo an-toerana mba hiara-miasa amin’ilay mpandidy. Araka ny filazan’io vehivavy io, rehefa nifoha taorian’ny nandidiana azy, izay naharitra adiny valo sy sasany i Sonya, ny zavatra nataony voalohany dia ny nanontany tamim-pitebitebena raha toa izy nampidiran-dra an-keriny na tsia. Fanamaivanana toy inona ny fandrenesana fa tsy izany no zava-niseho!

Ny momba an’i Jonathan, izay nidina tany amin’ny 5,5 ny tahan’ny hemôglôbinina taorian’ny fandidiana roa, ireo mpitsabo dia nino mafy fa ny fampidiran-dra ihany no afaka hamonjy azy, ary niomana izy ireo ny hampiasa ny fitsarana mba hahazoana lalana hanao izany an-keriny. Kanefa i Jonathan dia nisakana ny firehetan’izy ireo tamin’ny fanehoana finoana mafy orina sy tamin’ny fandraran’ny tenany mihitsy ny fampidiran-dra aminy. Mitantara toy izao izy: “Azoko ilay dokotera, nobanjiniko ireo masony ary dia nilaza taminy aho hoe: ‘RAHA SITRAKAO, tsy mandray ra na izay rehetra vita tamin’ny ra aho!’ ” Tetsy an-danin’izany, ireo kristiana nanam-pahefana tao amin’ny komity dia nandray fandaharana mba handefasana an’i Jonathan amin’ny alalan’ny fiaramanidina ho any amin’ny toeram-pitsaboana iray lehibe kokoa. Tamin’ny fotoana nahatongavany, dia teo ny iray hafa tamin’ireo anisan’ny komity, izay efa avy niresaka tamin’ireo mpitsabo. Ny ampitso maraina, dia tsy niovaova intsony ny tahan’ny hemôglôbinin’io tovolahy kely io. Nitombo ara-dalàna ny isan’ny liomenany ary, tapa-bolana taorian’ny fandidiana azy voalohany, dia niverina tany an-tranony izy.

Mihamaro amin’ireo mpandidy sy ireo anisan’ny mpiasan’ny fahasalamana no vonona ny hiara-miasa amin’ireo komitin’ny fifandraisana amin’ny hôpitaly ao amin’ny Vavolombelon’i Jehovah. Misy antony maro hahazoana manantena àry fa io fandaharana io dia hahita fahombiazana hatrany.

[Fanamarihana ambany pejy]