Ny resadresa-poana — ahoana no hisorohana ireo vokany manimba

HISY ny resadresa-poana raha mbola hisy olona koa etỳ ambonin’ny tany. Na dia ao anatin’ny tontolo vaovao tanteraka ampahafantarina amin’ny alalan’ny Baiboly aza, dia azo inoana fa hanana ny toerany ny resadresa-poana. (2 Petera 3:13)a. Raha ny marina, ireo resaka tsotra sy tsy ara-potoana momba ireo namana sy ireo olom-pantatra dia sady fiasana iray mba hifampiresahana manana ny maha-izy azy no fomba iray hananana fifandraisana tsara tsy tapaka amin’ireo mpiara-belona amintsika.

Na dia izany aza, dia tsy misy na inona na inona manamarina, na ny resadresa-poana manimba na ny fanendrikendrehana. Manimba ny resaka aely toy izany ary mamela soritra; afaka manimba fifandraisana tsara, mandoto laza ary manapotipotika fiainana mihitsy aza izy io. Raha izany no izy, inona no azo atao mba hijanonana ao anatin’ny faritra mety sy tsy hahatongavana amin’ny resadresa-poana manimba? Ahoana no hisorohana ny hahitan’ny tenanao fahavoazana? Ny Baiboly dia manome sasany amin’ireo torohevitra faran’izay tsara mbola tsy nisy toy izany, momba io raharaha io. Aoka isika handinika ny sasany amin’izany:

Fehezo ny lelanao: Lazaina fa “ny firesahana dia fomba iray fampiasana ny saina, fa ny resadresa-poana kosa dia fampiasana ny lela fotsiny”. Raha ny marina, dia matetika kokoa ireo resaka manimba no taratry ny fironana hiteny tsy amim-piheverana fa tsy tena finiavana hanao ratsy. Ny sasany tsy mahatam-bava momba ireo raharahan’ny hafa; manao laza masaka izy ireo, mampitombo ary manaratsy tsy misy fieritreretana kely akory ny ho vokany. Mampiharihary ireo fahadisoan’ireo namany, ny vadiny na ireo zanany izy ireo, ka tsy mahafantatra akory ny ratsy ataony amin’izy ireo.

Manome izao torohevitra manaraka izao àry ny Baiboly: “Ny teny maro tsy ilaozan’izay ota; fa izay mahatana ny molony no hendry.” (Ohabolana 10:19). Raha lazaina amin’ny teny hafa, dia mieritrereta alohan’ny hitenenana. Alohan’ny hilazana na inona na inona momba ny olona iray, dia manontania tena hoe: ‘Ho sahy hamerina izany eo anatrehany ve aho? Inona no hoeritreretiko raha izaho no nolazaina fa nanao izany?’ (Matio 7:12). Toy izao no vakina ao amin’ny Salamo 39:1: “Hitandrina ny làlako aho ka tsy hanota amin’ny lelako; hasiako fehim-bava ny vavako”.

Aoka hiaiky isika fa misy toe-javatra izay saika tsy ahafahana mifehy ny lelan’ny tena. Ohatra, misy antony lehibe mahatonga anao hieritreritra fa nanao ratsy lehibe taminao ny olona iray, taminao na tamin’ny fianakavianao. Tsy manana porofo ianao, kanefa mahatsapa fa mila manao zavatra. Ho fanendrikendrehana ve raha toa ianao ka milaza ny fiahiahianao amin’ny olona iray manana fahefana na amin’ny namana iray izay itokianao? Ho azo atao ve ny hiampanga anao ho manendrikendrika satria ianao nitady torohevitra? Miharihary fa tsia! Eken’ny Baiboly ny maha-ara-drariny ny resaka tsiambaratelo. Mazava ho azy fa ny fikarakarana raharaha sarotra toy izany dia mitaky fahaiza-mandanjalanja sy fahaiza-manavaka. — Ohabolana 15:22.

Aza manongilan-tsofina amin’ny fifosana: Tsy ireo zatra manao resadresa-poana ihany akory no tokony homen-tsiny; ireo izay mahita fahafinaretana amin’ny fihainoana azy ireo koa dia anisan’ny tompon’andraikitra amin’izany. Ny fihainoana fotsiny dia mety hoheverina ho toy ny fankasitrahana mangina ary manampy amin’ny fampielezana resaka manimba. Milaza ny Ohabolana 17:4 hoe: “Ny mpanao ratsy mampandry sofina amin’ny molotra mandainga; ary ny mpandainga mihaino ny lela mampidi-doza.”

Noho izany, rehefa mivaona ka tsy voafehy ny resaka momba ny olon-kafa iray, dia angamba tokony hanana fahasahiana ianao hilaza hoe: “Zavatra hafa resahina.” Ary raha toa ireo namanao ka miseho ho manana fahazarana manely tsaho, dia angamba koa ianao tokony hihevitra ny hitady fiarahana hafa. ‘Izay mampiely fifosana dia manambara ireo tsiambaratelo koa, hoy ny Baiboly. Andosiro àry ireo olona be resaka.’ (Ohabolana 20:19, Français courant). Hahagaga tokoa raha tsy ho tonga anton-dresaka tsy ho ela koa ianao.

Aza mamaly amin’ny fomba mihoa-pampana ny resadresa-poana: Tia ny miresadresa-poana ny ankabeazan’ny olona raha mbola tsy izy no atao anton-dresaka. Kanefa alao sary an-tsaina hoe miely ny tantara lainga na siosio ratsy momba anao. Indraindray dia azo atao ny mitady izay niandohany ary manitsy amim-pahatoniana ny zavatra. Kanefa inona no hatao raha tsy izany no mitranga?

Tsy mahavita na inona na inona ny fahatezeranao. Eny, “izay malaky tezitra dia manao adaladala”, hoy ny fampitandreman’ny Baiboly (Ohabolana 14:17). Toy izao àry ny torohevitra azontsika avy amin’i Solomona: “Aza raisina am-po ny teny rehetra izay voalaza (...). Satria fantatry ny fonao tanteraka fa ny tenanao aza dia efa mba nanozona ny sasany matetika koa.” (Mpitoriteny 7:21, 22, MN). Anisan’ny fiainana ny resadresa-poana, ary azo inoana fa tamin’ny fotoana iray na hafa, dia efa voatarika handray anjara tamin’izany ianao. Tokony hampisafoaka anao àry ve io zava-misy io? Misy fomba hanadinoana izany haingankaingana ve? Misy “andro ihomehezana”, ary angamba ny fomba tsara indrindra mba hampitsaharana ny tsaho dia ho ny fanaovana izany ho fihomehezana sy ny hanehoana amin’izany fa mahalala vazivazy ianao. — Mpitoriteny 3:4.

Aza mandraraka menaka amin’ny afo: Raha tsy mitsahatra miely ilay tsaho, dia manontania tena raha toa ianao ka tsy manao izay hahatonga ny hafa hanao resadresa-poana, angamba amin’ny fananana fitondrantena mampisalasala izay mahatonga fiahiahiana. Diniho ireto toe-javatra manaraka ireto:

◻ Na dia manao tsara ny asany aza ny vehivavy iray, dia heverin’ireo mpiara-miasa aminy ho kamo sy tsy mendrika itokiana loatra. Avy aiza no niavian’io laza ratsiny io? Voalohany indrindra, dia maneho tsy fitandremana sy tsy firaikana izy, izay azo adika mora foana ho toy ny hakamoana. Manaraka izany, tena tsy mendrika ho an’ny toeram-piasany ny fisehoany ivelany. Ary farany, dia tsy ampy fahamalinana izy rehefa mahazo fiantsoana an-telefaonina ho azy manokana, miteny mafy loatra ka misarika ny sain’izay rehetra ao amin’ny birao. Miteraka resadresa-poana izany.

◻ Ataon’ny olona anton-dresaka eo amin’ny tanàna keliny ny mpivarotra iray. Mandeha ny siosio fa mamitaka ny vadiny izy. Miaro tena araka izay fara heriny izy. Inona àry no anton’io tsaho io? Ny lazany ho mifankazatra loatra amin’ireo vehivavy mpividy entana ao aminy.

◻ Nolazaina fa manana fitondrantena ratsy ny tovovavy iray. Manamafy ny sasany fa manana sakaiza maro izy ary mampiasa zava-mahadomelina toy ny ‘cocaïne’. Tsy marina izany rehetra izany. Kanefa, dia fantatra fa mifanerasera amin’olona izay manaram-po amin’ny zava-mahadomelina izy. Fanampin’izany, dia hafahafa ny fomba ny fiakanjony, ny taovolony ary ny fomba fampiasany ireo zavatra fanosotra amin’ny tarehy.

Raha toa àry ianao ka iharan’ny fanendrikendrehana, nahoana no tsy manontany tena sao sanatria ny fitondrantenanao, ny fomba fihetsikao eo anatrehan’ny hafa, ny fitafianao na ny toetoetranao ivelany amin’ny ankapobeny, ka manamarina ny voalazan’ireo mpanaratsy anao? Angamba ho azonao atao ny hampitsahatra ireo tsaho amin’ny fanovana kely ny fomba fiainanao. “Raha tsy misy kitay intsony, dia maty ny afo”, hoy ny voalazan’ny Baiboly. (Ohabolana 26:20). Etsy an-danin’izany, raha toa ka eo ho eo ihany ny fahamendrehanao, dia hisy marina tokoa loza izay hitarika anao amin’ny fanaovan-dratsy ary hanova ilay tsaho fotsiny ho marina. — Jereo Galatiana 6:7, 8; 1 Korintiana 10:12.

‘Aoka ianao hitandrina ireo raharahanao manokana’

Anisan’ny fiainana ny resadresa-poana. Na dia izany aza anefa, dia tsy maintsy fantarina ny heriny manimba. Ho voasorokao tokoa ny fahorian-tsain’ny hafa sy ny an’ny tenanao koa aza, amin’ny fampiharana ity torohevitra feno fahendrena ity: “Na inona na inona marina, na inona na inona manan-kaja, na inona na inona mahitsy, na inona na inona madio, na inona na inona mahate-ho-tia, na inona na inona tsara laza, raha misy hatsaram-panahy, ary raha misy dera, dia hevero [hatrany, MN] izany (...); ary ho aminareo ny Andriamanitry ny fiadanana.” — Filipiana 4:8, 9.

Araka ny asehon’ireo teny ireo, ny tenan’Andriamanitra dia mihevitra ny fomba firesahantsika momba ny hafa. Nanao izao fampitandremana izao i Jesosy Kristy: “Hampamoahina ny olona amin’ny andro fitsarana noho ny amin’ny teny foana izay ataony. Fa ny teninao no hanamarinana anao, ary ny teninao no hanamelohana anao.” — Matio 12:36, 37; Jereo Salamo 52:2-5.

Maniry hitana fifandraisana tsara amin’ny hafa ve ianao, hanana fiadanan-tsaina ary, indrindra indrindra, hankasitrahan’Andriamanitra? “Manohiza (...) miezaka hiaina amim-pahatokiana sy hitandrina ny raharahanareo manokana.” 1 Tesaloniana 4:10, 11, MN). Aoka ianao haneho fiheverana ny hafa, kanefa amin’ny fomba mampiseho fitiavana ary mijanòna ao anatin’ny faritry ny fahamendrehana. Amin’izany dia ho tonga amin’ny fanalavirana ny resadresa-poana manimba sy tsy mahasoa ianao.

[Fanamarihana ambany pejy]

[Sary, pejy 21]

Aza manaiky handray anjara amin’ny resaka manimba

[Sary, pejy 22]

Mitady izay hanaovana resadresa-poana momba anao ve ianao noho ny tsy fahamalinana?