Ireo Vavolombelon’i Jehovah — ‘Natolotra ho Amin’ny Fitsarana eo An-toerana’
HATRAMIN’NY fiandohany, dia nahita fanoherana ny Kristianisma. Rehefa nanome toromarika ho an’ny mpianany i Jesosy, dia nampitandrina azy ireo toy izao: “Ary mitandrema hianareo noho ny amin’ny olona; fa hatolony ho amin’ny Synedriona [“fitsarana eo an-toerana”, NW ] sy hokapohiny ao amin’ny synagogany hianareo; ary ho entiny eo anatrehan’ny mpanapaka sy ny mpanjaka hianareo noho ny amiko, ho vavolombelona aminy sy amin’ny jentilisa [“firenena”, NW ].” (Matio 10:17, 18). Any amin’ny ankamaroan’ny tany amin’izao andro izao, ny fanoherana ilay Fanjakana dia maka endrika mamitaka kokoa noho ny onjam-panenjehana nahafaty, izay nipoitra tsy ela taorian’ny famonoana an’i Jesosy. Ao amin’ny tontolo be kojakojany misy antsika, ireo zavatra iadian-kevitra natrangan’ireo mpanohitra dia miitatra lavitra noho ny fitoriana ny vaovao tsaran’ny Fanjakana.
Raharaha momba ny fahazoana zo ara-dalàna hitaiza ny zanaka
Fitsarana iray nitondrana matetika ny Vavolombelon’i Jehovah sasany, dia ny fitsarana misahana ny raharaham-pianakaviana. Tany Aotrisy, tany Belzika, tany Kanada, tany Frantsa, tany Norvezy, tany Etazonia sy tany an-tany hafa, ny antokon’olom-bitsin’ny mpanohitra dia nanandrana nanao ny fivavahana ho ny raharaha lehibe iadian-kevitra rehefa misy fanapahan-kevitra raisina momba ny hoe iza no hahazo ny zo ara-dalàna hitaiza ny zanaka, rehefa misaraka amin’ny Vavolombelon’i Jehovah mahatoky ny vadiny tsy mpino. Satria fotsiny izy ireo Vavolombelon’i Jehovah, ny ray aman-dreny Vavolombelona dia tsy nahazo ny zo ara-dalàna hitaiza ny zanany.
Namoy ny zo ara-dalàna hitaiza ny zanany lahy kely telo taona ny vehivavy Vavolombelona iray ary norarana mihitsy aza tsy hiresaka fivavahana mandritra ny fotoana nahazoany lalana hitsidika azy. Ny Sampan-draharaha Momba ny Lalàna ao amin’ny Fikambanana Watchtower dia nampakatra tamin’ny fitsarana ambony an’ilay raharaha, nefa tsy nahazo rariny teo amin’ilay fitsarana. Nentina teo amin’ny Fitsarana Tampony tao amin’ny fanjakan’i Ohio àry ilay raharaha. Tamin’ny fomba nety, ny 15 Aprily 1992, dia namoaka didy niaro ny fahafahan’ilay Vavolombelona ny fitsarana. Ny rapaoro ofisialy 11 pejy dia namely toy ny kapoka an’ilay lehilahy manam-pahaizana nalaina ho vavolombelona tao amin’ny fitsarana ambony izay, raha ny marina, dia olona voaroaka mihambo ho psikology. Nilaza ny fitsarana fa io lehilahy io dia “nanambara, niorina tamin’ny fomba nitondrany ny foto-kevitra nosoratan’ny tenany, fa fahita kokoa eo anivon’ny Vavolombelon’i Jehovah noho ny eo amin’ny mponina amin’ny ankapobeny, ny aretin-tsaina. Izany fanambarana izany dia fanandramana miharihary hametraka ao anatin’ny lasitra iray ny fivavahana iray manontolo. (...) Io porofo ara-statistika tapany io dia tsy misy heviny”.
Ny fitsarana dia nandidy ny hitsarana indray ilay raharaha tamin’ny filazana hoe: “Tsy azo atao ny mandà ny fahazoan’ny reny iray zo ara-dalàna hitaiza ny zanany, satria fotsiny hoe tsy hampirisika azy hiarahaba saina, tsy hankalaza fety, na tsy handray anjara amin’ny zavatra fanao ivelan’ny fianarana izy. Foananay ny didy navoakan’ny fitsarana ambaratonga voalohany momba ny fahazoana zo ara-dalàna hitaiza ny zanaka sy momba ny fitsidihana azy, satria nampiorenina tamin’ny fomba diso tamin’ny zavatra inoan’ilay [reny] ireo fanapahan-kevitra ireo.” Vokatr’izany, dia afaka nanatrika ny Fahatsiarovana ny fahafatesan’i Kristy tany amin’ny Efitrano Fanjakana niaraka tamin’ny zanany lahy io reny io tamin’ny 17 Aprily teo.
Ny Sampan-draharaha Momba ny Lalàna ao amin’ny biraon’ny sampan’ny Fikambanana Watch Tower any Kanada, dia milaza fa misy raharaha roa mitovy amin’izany ankehitriny mbola tsy tapaka, nentina teo amin’ny Fitsarana Tampony any Kanada. Ny sampana any Aotrisy dia voakasika tamin’ny fandresena niezinezina tamin’ny raharaha iray nentina teo amin’ny Vaomiera Eoropeana Momba ny Zon’Olombelona. Ankoatra izany, i Belzika sy i Frantsa ary i Norvezy dia nanao tatitra momba ny fandresena vao haingana teo amin’ny fitsarana ambaratonga voalohany azon’ireo Vavolombelona nohelingelenina tamin’ny raharaha momba ny fahazoana zo ara-dalàna hitaiza ny zanany, ka tamin’izany dia ny fivavahana no fototry ny famelezana. Araka ny nolazain’i Jesosy, tamin’ny raharaha tsirairay, dia hita fa nanjary fanambarana izany, tsy ho an’ny fitsarana sy ireo mpahay lalàna ihany, fa ho an’ny firenena koa, tamin’ny alalan’ny fisarihana ny saim-bahoaka nentin’ny fampitam-baovao.
Raharaha momba ny ra
Ny raharaha hafa iray natrehin’ireo Vavolombelona, dia ny raharaha momba ny ra. Na dia nisy fandresena vao haingana aza azo teo amin’ireo Fitsarana Tampony any Florida, Illinois, Massachusetts, ary any New York, momba ny fahafahana ara-pivavahana sy fahazakan’izy ireo tena manokana, ary na dia eo aza ny fiezahana tsy mitsahatra ataon’ny Sampan-draharaha Filana Hevitra Momba ny Hopitaly sy ireo komity mifandray amin’ny hopitaly ao amin’ny Vavolombelon’i Jehovah manerana ilay tany, dia mipoitra hatrany ihany io raharaha iadian-kevitra io. Kanefa, dia manjary mahazo fanambarana ireo mpanome fikarakarana ara-pahasalamana, ary ny hopitaly sasantsasany dia miezaka ny hahafantatra haingana sy mazava ireo marary Vavolombelon’i Jehovah.
Ny fitsarana ambaratonga voalohany nivory tao San Diego dia nanaja ny toerana noraisin’ny vehivavy japone Vavolombelona iray monina any Kalifornia. Narary noho izay antsoina hoe anévrysme tao amin’ny atidoha izy ka tsy nahatsiaro tena. Ny Firaketana Ara-pitsaboana teny aminy voaisy sonia tamin’ny fomba nety, ary ny fanambarana nataon’ny vehivavy dokotera mpitsabo ankizy, izay nanadinadina azy lalina momba ny raharaha ny amin’ny ra tamin’izy nitsidika azy tamin’ny asa isan-trano, dia nandresy lahatra ilay mpitsara fa tsy hanaiky handray ra mihitsy ilay Vavolombelona tsy nahatsiaro tena na inona na inona toe-javatra.
Ny raharaha iray nitranga tao Long Island, izay nahitana vehivavy Vavolombelona iray nofatorana ka nampidiran-dra, raha mbola nosamborin’ny polisy ny vadiny, dia nentin’ny Sampan-draharaha Momba ny Lalàna ao amin’ny Fikambanana Watchtower teo amin’ny Fitsarana Ambony tany New York. Nisy didy navoaka niaro ny zo manokan’ny Vavolombelon’i Jehovah, ary ankehitriny dia mitohy ilay raharaha amin’ny alalan’ny fitoriana nentina teo amin’ny fitsarana ary mandeha ny famotorana. Nentina teo amin’ny fitsarana federalin’i Atlanta ny raharahan’ny zazalahy iray 16 taona sy ny reniny ka eo am-pandinihana izany ny fitsarana. Nofatorana ilay tovolahy ka nampidiran-dra nandritra ny adiny valo. Tao amin’ny hopitaly no nandinihana ilay raharaha, mba hahazoan-dalana avy amin’ny fitsarana hanaovana izany, ka nony azo izany dia tsy nampahafantarina an’ilay tovolahy na ny reniny akory. Misy raharaha maro be hafa mbola tsy tapaka entina eo amin’ireo fitsarana ambony ary misy hafa mipoitra isan’andro. Misy fandresena azo, nefa mbola tsy tapitra ny ady atao mba hanajana ny zon’olombelona. Ny Vavolombelon’i Jehovah dia miantehitra amin’i Jehovah Andriamanitra mba hanamarinany ny lalàny momba ny ra amin’ny fotoana voatendriny.
Hatramin’ny 1943, any Etazonia, dia vitsy ny Vavolombelon’i Jehovah nentina teo amin’ny fitsarana eo an-toerana noho ny raharaha ny amin’ny fitoriana. Kanefa, isan-kerinandro dia mandray antso an-telefaonina am-polony maro sy taratasy avy amin’ireo fitambaran-doholona ny Fikambanana Watchtower, mangataka fanampiana noho ny zava-manahirana hitan’ny Vavolombelon’i Jehovah amin’ny fanompoana ataony ampahibemaso. Ny filazana iray avy any amin’ny fanjakan’i Washington dia niafara tamin’ny fomba mahatsikaiky. Ny tompon-trano tezitra iray dia nanidy ny fefin’ny tanànany mba tsy hahafahan’ny fiara izay nisy Vavolombelon’i Jehovah hivoaka, ary niantso ny polisy izy. Ny kiakiakany feno hatezerana sy ny fandrahonana fampiasan-kery nataony dia nanosika azy ireo hiandry amim-pahamalinana tao anatin’ny fiara. Rehefa tonga teo ny fiara nitondra ny polisy, dia nisaotra ny Vavolombelona ireo polisy, fa tsy nisambotra azy noho ny fidirana tao amin’ny tanànan’olona nefa tsy nahazo lalana. Nahiahin’ny polisy ho mpigadra nandositra mantsy ilay tompon-trano, nefa tsy afaka niditra tao amin’ny tanànany izy ireo mba hanaporofoana izany. Koa satria ankehitriny dia izy mihitsy no nanasa azy ireo hiditra tao an-tanànany, dia afaka nanamarina ny momba ny maha-izy azy ireo, ka nitondra azy sy ilay vehivavy niara-niaina taminy tany an-tranomaizina, kanefa ny Vavolombelona kosa dia nanohy ny asa fitoriana sy fampianarana.
Ny toe-javatra dia mampiseho fa hisy ady ara-pitsarana maro kokoa hatao ho an’ny tombontsoan’ilay Fanjakana. Ny Fikambanana Watchtower dia mankasitraka ny fiahiana sy ny fiheverana ary ny vavaka ataon’ny Vavolombelona maro be manerana an’izao tontolo izao mba hahazoana ny fitarihan’i Jehovah mifandray amin’ireo raharaha ara-pitsarana sarotra hita noho ny fanatanterahana ny asan’Andriamanitra amin’izao andro izao. Nilaza tamin’ny firenen’Isiraely i Jehovah fa tsy hamabo ny Tany Nampanantenaina indray mandeha izy ireo fa hotanterahina “tsikelikely” izany. (Deoteronomia 7:22). Toy izany koa ny amin’ny fanekena ny zon’ny vahoakany amin’izao andro ankehitriny izao; mandroso tsikelikely izany. Nefa na misy fandresena na tsia, dia azo antoka fa na aiza na aiza hanolorana ny vahoakan’i Jehovah eo anatrehan’ny governora, ny mpanjaka, ny fitsarana, na izay fahefana hafa rehetra, ny ho vokatr’izany dia fanambarana ho azy ireny sy ho an’ireo firenena.
Amin’ny hoavy tsy ho ela, dia hanamarina tanteraka ny tenany i Jehovah, tsy amin’ny raharaha mahafaoka ny ra sy ny fahazoana zo ara-dalàna hitaiza ny zanaka ihany, fa amin’ny raharaha ara-dalàna mahafaoka ny fiandrianany koa. Amin’izay, ny vahoakany dia ho afaka amin’ireo mpanohitra rehetra ary hiaina finaritra eo ambany fanapahan’ilay Fanjakana — satria i Jehovah tia rariny. — Salamo 37:28.
[Teny notsongaina, pejy 12]
Nofatorana ilay tovolahy ka nampidiran-dra nandritra ny adiny valo