Tsy Fako Tsotra Fotsiny!
TAMIN’NY zoma 24 Martsa 1989, ilay sambo mpitondra solitany atao hoe Exxon Valdez dia nidona tamin’ny harambato iray tao amin’ny Helodranon’ny Prince William any Alaska. Vokatr’izany, dia solitany mbola tsy voadio teo amin’ny 42 tapitrisa litatra no nifantsitsitra tao anaty rano. Nahatandindomin-doza ny fiveloman’ireo mpanjono teo an-toerana ilay voina, nandoto moron-tsiraka an-jatony kilaometatra maro sy nandringana vorona an’arivony maro ary zavamananaina minono velona anaty ranomasina.
Izay nitranga tamin’ny Exxon Valdez dia manohy mampientam-po an’ireo olona sahiran-kevitra ny amin’ny tontolo iainana. Misy anefa “fihanaka solitany” mbola mamitaka kokoa mitranga isan’andro. Ary angamba aza izany mitranga eo amin’ny manodidina akaiky anao!
Araka ny Consumer Reports, ny olona izay ny tenany ihany no manolo ny menaka amin’ny maoteran’ny aotomobiliny, dia manary menaka efa nampiasaina eo anelanelan’ny 750 tapitrisa litatra sy 1, 5 arivo tapitrisa litatra isan-taona eo. Araka ilay filazana, dia “10 ka hatramin’ny 14 isan-jato amin’izany menaka izany ihany no ariana amin’ny fomba mety”. Izany ampahany kely amin’ny menaka efa nampiasaina izany dia ahodina indray ho vokatra hafa mahasoa. Fa inona no mitranga amin’ny ambiny? Angamba arian’ireo tompon’ny fiara toy ny fako tsotra fotsiny izany.
Isan-taona, dia an-tapitrisany litatra maro amin’ny menaka efa nampiasaina no miafara eny amin’ny tany, any anatin’ny sakeli-drano, na any anatin’ny fantson-drano maloto. Firarahana Exxon Valdez 25 fara fahakeliny no ilaina mba hahatonga habetsahana menaka toy izany! Nefa ny menaka efa nampiasaina, ary koa ny menaka hafa efa nampiasaina tamin’ny aotomobilina, toy ny antigel, menaka fanao amin’ny fihisatra ( freins) sy amin’ny boîtes de transmission dia tsy fako tsotra fotsiny. Ratsy lavitra noho izany izy io!
Manao fanamarihana ny Consumer Reports fa raha toa ny menaka ka mahazo ny “rano fisotro, dia mety ho tena ratsy ny vokany: Ny menaka iray [litatra] efa nampiasaina dia hahatonga rano madio iray tapitrisa [litatra] ho tsy azo sotroina, ary ny menaka 0,5 litatra monja dia handrakotra rano 0,4 hektara”.