Hoavy Mamirapiratra ho An’ny Ankizy
TAO amin’ilay Fivoriana An-tampony Iraisam-pirenena ho An’ny Ankizy, dia niresaka tamim-pitokiana ny amin’ny hoavy ireo filoha maro teo amin’izao tontolo izao. Nanambara mialoha izy ireo fa hisy “vanim-potoana vaovao” ho an’ny ankizy, “fiezahana vaovao atokana hanomezana izay zavatra ilain’ny ankizy”. Izy ireo dia niresaka ny amin’ny “ ‘fiombonan-kevitra vaovao’ hanomezana ‘aina ny fikambanan’izao tontolo izao tafaray sy tapa-kevitra’ ” mba hanampiana ny ankizy.
Tsara dia tsara ireo teny ireo. Nefa mbola ho hita hoe hatraiza ireo firenena no ho vonona handroso mba hanatanteraka ny zava-kendreny. Mendrika homarihina fa tao anatin’ny dimy volana taorian’ilay fivoriana an-tampony, dia nisy ady nifanaovan’ireo firenena tao amin’ny Hoala Persika, izay hita fa iray tamin’ireo nandaniam-bola be indrindra — 6,1 alina tapitrisa dolara — ary nitondra fanimbana mbola tsy nisy toy izany teo amin’ny tontolo iainana. Taorian’izay, dia mponina irakiana sy kaoesiana ana hetsiny maro no nafindra toerana. Olona an’arivony maro no maty — olona an-jatony isan’andro tamin’ny fotoana iray — noho ny hanoanana, ny toetr’andro mamirifiry, ny tsy fahampian-tsakafo, ary ny aretina. Olona 8 amin’ny 10 teo ho eo tamin’izany no vehivavy sy ankizy.
Loza nambara mialoha
Fantatr’ireo mpianatra ny Tenin’Andriamanitra fa nambara mialoha efa ho roa arivo taona lasa izay, ny zava-manahirana mampahory ny ankizy eo amin’izao tontolo izao. Toy izao no naminanian’ny Baiboly momba izao “andro farany” izao:
◻ “Hisy (...) areti-mandringana”. — Lioka 21:11.
◻ “Hisy mosary”. — Matio 24:7.
◻ ‘[Ny olona dia] hanimba ny tany’. — Apokalypsy 11:18.
◻ “Hisy firenena hitsangana hamely firenena, ary hisy fanjakana hitsangana hamely fanjakana”. — Marka 13:8.
◻ “Hisy fotoan-tsarotra tsy mora setraina. Satria ny olona ho tia ny tenany, (...) tsy hanana firaiketam-po voajanahary”. — 2 Timoty 3:1-3, NW.
Nanambara mialoha koa ny Baiboly fa tsy ho ela dia ho tonga ny fotoana hiheveran’ireo firenena fa eo am-panaovana fandrosoana ampy izy ireo eo amin’ny fandaminana ny zava-manahirana ny olombelona, ka hanambarany hoe: “Fiadanana sy filaminana!” — 1 Tesaloniana 5:3, NW.
Hoavy mamirapiratra
Kanefa, izany fanambarana izany, raha ny marina, dia ho famantarana ny fotoana handraisan’Andriamanitra an-tanana ny raharahan’olombelona. Amin’ny alalan’ny Fanjakany any an-danitra, dia hanafoana izao fandehan-javatra ankehitriny izao izy ary hametraka tontolo vaovao iray hisian’ny tena fiadanana sy filaminana maharitra, ho an’ny ankizy ary ho an’ny olon-dehibe koa. — Ohabolana 2:21, 22; Daniela 2:44; Matio 6:10.
Eo ambanin’ny fandaharana malazan’ny Fanjakan’Andriamanitra, dia “tsy hisy amin’ny mponina ao hilaza hoe: Marary aho”. (Isaia 33:24). Ho anisan’ny zavatra efa lasa ny tsy fahampian-tsakafo: “Hahavoka-bary betsaka ny tany, na dia any an-tampon’ny tendrombohitra aza”. (Salamo 72:16). Na dia ny ady aza dia tsy hisy intsony, satria manome antsika izao fampanantenana izao ny Baiboly: “Mampitsahatra ady hatramin’ny faran’ny tany Izy [Jehovah]”. — Salamo 46:9.
Nefa ahoana ny amin’ny ankizy rehetra — sy ny hafa — izay efa maty noho ny tsy fahampian-tsakafo, ny aretina, na noho ny antony hafa? Ny Teny ara-tsindrimandrin’Andriamanitra dia manambara toy izao: “Hisy fitsanganan’ny marina sy ny tsy marina.” — Asan’ny Apostoly 24:15, NW.
Fony izy tetỳ an-tany, dia nasehon’i Jesosy Kristy fa ny fananganana ny maty ho amin’ny fiainana eto an-tany ao amin’ny tontolo vaovaon’Andriamanitra, dia hahafaoka ny ankizy. Ohatra, rehefa maty ny zazavavy kely iray 12 taona, dia ‘nitomany sy nisaona azy ny olona rehetra’. Nefa tamin’izay, dia nandray ny tànan’ilay zazavavy kely i Jesosy ka nilaza taminy hoe: “Ry zazavavy, miarena.” Manohy toy izao ny fitantarana: “Niarina niaraka tamin’izay izy, ary nasainy nomena hanina”. Nanao ahoana no fihetsiky ny ray aman-dreniny? Milaza toy izao ny Baiboly: “Talanjona aoka izany izy ireo, ravoravo izaitsizy.” — Lioka 8:40-42, 49-56; Marka 5:42, NW.
Tamin’ny fotoana hafa iray i Jesosy dia nifanena tamin’ny filaharan’olona, nahitana mpitondratena, handeha handevina ny zanaka lahitokan-dravehivavy. “Nanatona Izy [i Jesosy] ka nanendry ny tranovorona, dia nijanona izay nilanja. Ary hoy Jesosy: Ry zatovo, hoy izaho aminao: Miarena. Dia niarina ny maty sady niteny, ary dia natolony tamin-dreniny.” Ireo izay teo amin’ny manodidina teo dia nanomboka “nankalaza an’Andriamanitra”. — Lioka 7:11-16.
Araka izany, eo ambany fanapahana marin’ny Fitondram-panjakan’Andriamanitra, ny ankizy, ao anatin’izany ireo izay hatsangana amin’ny maty, dia hanana ny hoavy mamirapiratra indrindra mety hisy. Ho afaka ny hihalehibe ao amin’ny tontolo iray marina sy misy fiadanana kanto sy milamina ary miroborobo aoka izany, izay nantsoin’i Jesosy tamin’ny fomba nety tanteraka hoe “Paradisa”, izy ireo. — Lioka 23:43.
[Sary, pejy 20, 21]
Ao amin’ny tontolo vaovaon’Andriamanitra, dia hihalehibe tsy hanana ahiahy sy ho salama ary ho sambatra ny ankizy