Mihasempotra Miandalana Ireo Tanàn-dehibe Goavana
MANERANA ny tany, ireo tanàn-dehibe goavana dia mihamitombo ka manintona olona an-tapitrisany maro mitady asa sy trano fonenana ary ireo zavatra mampiadana atolotry ny fiainana an-tanàn-dehibe. Tsy mahaleo ny sarany anefa ny vidiny. Na dia ny fifohana rivotra any amin’ireny tanàn-dehibe mihamiitatra ireny aza dia mahatonga ny fahasalaman’olombelona ho tandindomin-doza hatrany hatrany.
Ny tatitra iray vao haingana avy amin’ny PNUE (Fandaharan’asan’ny Firenena Mikambana Momba ny Tontolo Iainana) sy avy amin’ny Fikambanana Iraisam-pirenena Momba ny Fahasalamana dia mampiseho fa ny fahalotoan’ny rivotra any amin’ireo tanàn-dehibe 20 goavana indrindra maneran-tany dia niharatsy tanteraka. Any amin’ny toerana sasany, hoy ny Our Planet, gazetiboky iray any Kenya, avoakan’ny PNUE, “ny fahalotoan’ny rivotra dia ratsy ohatra ilay zavon-tsetroka malaza ratsin’i Londres 40 taona lasa izay.” Ireo mponina ao Mexico no tena voa mafy indrindra amin’io lafiny io, kanefa tsy ambaka noho izany ireo olona am-polo tapitrisany maro mipetraka ao amin’ny tanàn-dehibe toa an’i Bangkok, Beijing, Le Caire, sy São Paulo.
Mampidi-doza tokoa ve ny rivotra any amin’ny tanàn-dehibe toy ireny? Ny fatra ambony amin’izay tena miteraka fandotoana, toy ny gaza misy solifara (gaz sulfureux) sy ny oksida-na karbonina (monoxyde de carbone) ary ny firaka, dia mampidi-doza amin’ny fomba maro. Maro karazana ny vokatr’izy ireo eo amin’ny vatana: fahavoazana eo amin’ny fisefoana sy eo amin’ny fo sy ny lalan-dra, fahasimbana eo amin’ny rafi-pitatitra, eny fa na dia ny aretin’ny tsokan-taolana sy ny aty ary ny voa koa aza.
Inona no miteraka ny fandotoana? Ny antony tokana lehibe indrindra any amin’ireny tanàn-dehibe ireny, araka ny Our Planet, dia ny aotomobilina. Koa satria ny isan’ny aotomobilina maneran-tany amin’izao fotoana izao — 630 tapitrisa — dia “antenaina ho avo roa heny ato anatin’ny 20-30 taona ho avy, indrindra fa any amin’ny faritry ny tanàn-dehibe, dia matroka tokoa ny hoavin’ny rivotry ny tanàn-dehibe. Manampy trotraka izany, dia vitsy ny fepetra fisorohana noraisina, satria, araka ny marihin’ilay tatitra, any amin’ny ankamaroan’ny tanàn-dehibe goavana dia tsy takatra firy ny hamafin’ilay zava-manahirana”. Tsy mahagaga àry raha mampirisika mafy ny Our Planet mba hanomezan’ny tanàn-dehibe toy ireny ny laharam-pahamehana voalohany, ireo fepetra ikendrena ny fanadiovana ny rivotra. Raha tsy atao izany dia milaza loza ny hoavy. Araka ny fanombanan’ilay gazety, “ireny tanàn-dehibe ireny dia miatrika hasemporana miandalana arakaraka ny iharatsian’ny toetran’ny rivotra ao aminy”.