Sambany Vao Nisy ho An’i Mali

NY VADIKO dia manompo amin’ny maha-mpiandraikitra mpitety faritany ao amin’ny Vavolombelon’i Jehovah eto Mali, tany iray eto Afrika Andrefana izay sady vitsy no miparitaka ny mponina ao aminy. Tafiditra ao anatin’ny Efitr’i Sahara ny tapany avaratra amin’izy io, ary ny ankamaroan’ny sisa amin’ilay tany dia voaforon’ny tany mikitoantoana feno bozaka. Be velarana kokoa noho i Angletera sy i Frantsa ary i Espaina mitambatra i Mali. Raha manana mponina maherin’ny 140 tapitrisa ireo tany ireo, i Mali kosa dia manana mponina folo tapitrisa eo ho eo monja — tokony ho ny 150 amin’izy ireo no Vavolombelona.

I Ziguinchor, tanàna kely atsy Sénégal mifanila amin’i Mali, no toeram-piainganay. Tamin’ny Novambra 1994 dia nandeha fiaramanidina avy tao nankany Dakar izahay, avy eo dia nankany amin’ny renivohitr’i Mali, dia i Bamako, tanàna lehibe iray misy mponina mahery lavitra ny antsasa-tapitrisa. Avy tao Bamako izahay dia nandeha, na taxi-brousse, na aotobisy, na lamasinina, nankany amin’ny tanàna kely kokoa, toa an’i Ségou, i San, sy ny tanàna tranainin’i Mopti. Nijanona tamin’ny tsirairay tamin’ireny toerana ireny tokony ho herinandro izahay mba handraisana anjara tamin’ny fanompoana kristiana niaraka tamin’ireo Vavolombelona vitsy tany.

Tamin’ny Desambra dia niverina tany Bamako izahay mba hanatrika fivoriamben’ny distrika, izay nisy tampon’isan’ny mpanatrika 273. Ravoravo toy inona moa izahay nahita olona vaovao 14 natao batisa! Ny ampitson’ilay fivoriambe, dia nandeha aotobisy izahay nankany amin’ny tanàna kelin’i Sikasso, izay nandaharana ny hitokanana tamin’ny faran’ny herinandro nanaraka, ilay Efitrano Fanjakana voalohany teto Mali naorin’ny Vavolombelon’i Jehovah.

Tena Zava-tsarotra

Ny kongregasiona ao Sikasso dia voaforon’ny Vavolombelona 13 monja, izay mpisava lalana, na mpanompo manontolo andro, ny dimy amin’izy ireo. Rehefa tonga izahay ny alatsinainy, dia may ny handre izay nomanin’izy ireo ho amin’ilay fitokanana izahay. Nilaza taminay izy ireo fa niankina tamin’i Mike vadiko izy ireo mba handamina izany! Koa taorian’ny namahanay ny entanay, dia nandeha nijery ilay Efitrano Fanjakana izahay. Rehefa nahita azy io izahay, dia nientam-po noho ny nahafahan’ireo Vavolombelona vitsy an’isa monja ireo nanorina an’io trano io. Kanefa, mbola nisy zavatra be dia be tokony hatao. Tsy nisy lambam-baravarana, tsy voaloko ny ivelany, ary tsy nisy soratra hoe: “Vavolombelon’i Jehovah — Efitranon’ny Fanjakan’Andriamanitra”.

Fantatray fa ao anatin’ny andro vitsivitsy, dia mpitsidika 50 fara fahakeliny no ho tonga avy any Bamako mba hanatrika ilay fitokanana. Nisy olona teo an-toerana koa nasaina. Tsy nanana afa-tsy loholona tokana monja, dia i Pierre Sadio, ilay kongregasiona. Rehefa nanontany azy izahay hoe ahoana no nanantenany hamitana ilay efitrano alohan’ny asabotsy, andron’ilay fitokanana, dia nanatona akaiky kokoa mba hihaino ny valin-teniny ireo namana. “Heveriko fa hanampy antsika hamita azy io ara-potoana i Jehovah”, hoy ny valin-teniny.

Nisy zavatra be dia be aoka izany tsy maintsy natao tao anatin’ny fe-potoana fohy toy izany! Niahotrahotra aho nanontany raha azoko natao ny nanampy tamin’ny fanomanana ireo lambam-baravarana. Niseho teo amin’ny endrik’ireo nanodidina ahy ny tsikitsiky be nilaza fahamaivamaivanana. Avy eo i Mike dia nanolo-kevitra ny amin’ny hampanaovanay soratra hatao eo amin’ny rindrina anoloana amin’ilay efitrano. Tsy ela dia niara-niteny avokoa izahay. Samy taitaitra aoka izany ny rehetra. Ho tena zava-tsarotra ny hamitana ara-potoana ireo tsipiriany farany teo amin’ilay efitrano!

Fikenonkenonana tamin’ny raharaha

Niolomay nankany an-tsena izahay rahavavy kristiana mba hifidy ilay lamba. Taorian’izay izahay dia nahita mpanjaitra hanao ireo lambam-baravarana. “Manana efatra andro ianao hamitana azy ireo”, hoy izahay taminy. Mba hanisiana zavatra mandravaka, dia nanolo-tena an-tsitrapo hanao makrame tsara tarehy fanantonan-javamaniry hatao eo amin’ny rindrina anoloana amin’ilay efitrano i Mike. Koa nandeha indray àry izahay, ka tamin’itỳ indray nitoraka itỳ dia nitady ny tady nilaina hanaovana ilay fanantonan-javamaniry, ary nitady tavim-boninkazo koa.

Natao koa ny fandaharana mba hanomanan’ny olona iray ilay soratra ho an’ny Efitrano Fanjakana. Tao anatin’ilay efitrano sy tao ivelany, dia nisy fikenonkenonana tamin’ny raharaha. Nisy mpiara-monina maromaro niangona mba hijery. Be dia be aoka izany ny zavatra tokony hatao! Ahoana no hanomezanay sakafo an’ireo mpitsidika 50? Aiza izy ireo no hatory? Nitotototo izahay nandritra ilay herinandro manontolo mba hanomanana, kanefa toa tsy nisy zavatra nandeha nisosa tsara.

Nifoha maraina be izahay ny zoma, ny andro talohan’ilay fitokanana. Feno fahataitairana ilay rivo-piainana satria tokony ho avy ireo mpitsidika avy tany Bamako. Rehefa ho mitataovovonana dia tonga ilay soratra ho an’ny Efitrano Fanjakana. Rehefa nesorin’i Mike ny sarony, dia nisento tamim-pahatalanjonana ireo anadahy. Na dia ireo mpitazana liana ta hahafanta-javatra aza dia mba nijery tamim-pankasitrahana. Niandry tamim-pahadodonana izahay raha mbola napetaka teo amin’ny rindrina anoloana ilay izy. Niharihary izao fa tsy trano tsotra fotsiny itỳ. Izy io no ‘Efitrano Fanjakana An’ny Vavolombelon’i Jehovah’.

Teo akaiky teo, tao amin’ny tranon’ny mpisava lalana iray, dia nisahirana nahandro sakafo ireo rahavavy. Nihoatra ny rano tao anaty vilany be mainty iray rehefa nangotraka ny sakafo. Vao avy nanesotra an’ireo sinin-doko sy borosy fandokoana tamin’ny ilan’ilay efitrano indrindra izahay raha nanakoako ny antsoantso hoe: “Indreny ry zareo! Indreny ry zareo!” Tonga nihazakazaka avy tao amin’ilay efitrano ireo namana, ny hafa avy tao an-trano. Zendana ireo mpiray monina tamin’izany rehetra izany. Nitsinjatsinjaka be ireo anadahy. Fandraisana toy inona moa no azon’ireo namana rehefa nivoaka ny aotobisy izy ireo! Nahatsiaro tena ho nirehareha aoka izany aho fa anisan’ny Vavolombelon’i Jehovah!

Nijery an’ireo mpitsidika nanodidina ahy — dia ireo namana avy tamin’ireo foko teo an-toerana, ary koa avy tatsy Burkina Faso sy i Togo — aho. Nisy Amerikana, Kanadianina, Frantsay, sy Alemanina koa tonga. Nanao fety be izahay ny alin’iny. Nanao afo lehibe izahay mba hanazavana ny tokotany. Ta hanongo tena aho mba hahazoana antoka fa tena nanana tombontsoa tokoa anisan’ny teo amin’ilay fisehoan-javatra. Rehefa nihalina ny andro, dia nanomboka niala tamim-pahalainana ho any amin’ny fonenanay avy izahay.

Olona hatramin’ny 20 no nilasy tao amin’ny trano iray. Afaka milaza aho fa sarotra izany ho an’ny sasany. Hitako ny rahavavy iray teo an-toerana nanampy mpitsidika frantsay iray nankao amin’ny toeram-pivoahana tany alatrano. Havan’ny iray tamin’ireo misionera ilay vehivavy mpitsidika, fa tsy Vavolombelona akory. Rehefa niverina izy ireo, dia hoy izy: “Mahantra be ianareo, kanefa tena be fitiavana sy hatsaram-panahy tokoa ianareo.” Te hilaza aho hoe: “Tsia, tsy mahantra izy ireo. Manankarena avokoa ny vahoakan’i Jehovah rehetra!” Raha ny marina, aiza koa ianao no afaka mahita antokon’olona misy karazany maro toy izao, miaina amim-pihavanana sy amin’ny fomba mirindra?

Fitokanana nampihetsi-po

Fohy ilay alina, ary tonga haingana ilay andro fitokanana. Taorian’ny fivoriana ho amin’ny fanompoana eny amin’ny saha tao amin’ny Efitrano Fanjakana, dia nivoaka hanasa ny olona tao an-tanàna ho amin’ilay fitokanana ireo Vavolombelona. Nijanona aho mba handamina ireo voninkazo sy zavamaniry. Nikenonkenona nahandro sakafo ho an’ny takariva ireo rahavavy teo an-toerana.

Tamin’ny farany, tamin’ny efatra ora, dia tonga ny fotoana hanaovana ilay fitokanana. Olona 92 tamin’ny fitambarany no nanatrika teo, kanefa tsy feno hipoka ilay efitrano. Taitaitra aoka izany aho, hany ka sarotra ny nipetraka tsara. Nilaza ny tantaran’ilay asa tao Sikasso i Pierre Sadio. Rehefa voatendry teo izy, dia tsy nisy afa-tsy izy sy ny vadiny ary ny zanany roa. Tena sarotra ny fiainana, kanefa nitahy ny fanompoany i Jehovah rehefa nandeha ny fotoana. Mpisava lalana manokana izao ilay olona voalohany tonga Vavolombelona tao Sikasso. Avy eo i Pierre dia nanazava ny fomba nahafahan’ireo Vavolombelona vitsy an’isa nanorina. Nanakarama mpandatsa-biriky iray izy ireo, ary, isaky ny alahady, dia niasa manontolo andro teo amin’ilay tetik’asa fanorenana ny kongregasiona manontolo.

Izao i Mike dia nanadinadina Vavolombelona izay niasa tamin’ilay efitrano. Nanontaniany tsirairay izy ireo raha efa nihevitra fa ho tonga io andro io ary inona no tsapan’izy ireo rehefa nijery ilay Efitrano Fanjakana feno olona. Ny ankamaroany dia nanjary kendakenda feo aoka izany noho ny fihetseham-po, hany ka saika tsy vitany ny fitenenany. Teo amin’ireo Vavolombelona nanatrika teo, dia tsy nisy tsy nanganohano ny ranomasony.

Avy eo ny lahateny fitokanana dia nataon’i Ted Petras avy amin’ny biraon’ny sampan’ny Vavolombelon’i Jehovah atsy Sénégal. Natao ny vavaka fitokanana, ary nitehaka naharitra ela ireo anadahy. Taorian’izay i Mike dia nanasa an’izay rehetra nanampy tamin’ny fanorenana ilay efitrano mba handroso teny aloha. Nitsangana teo izy ireo, miramirana ny tarehiny, nirotsaka teo amin’ny takolany ny ranomasom-pifaliana. Rehefa nihira ny hira famaranana izahay, dia nahatsiaro tena ho faly be aoka izany aho. Namela ahy hanana anjara tamin’ny fanandraman-javatra nahatalanjona indrindra ny naha-misionera ahy. Ho matiantoka be mihitsy izahay raha nijanona tany an-trano tany Etazonia.

Fiarahana nafana fanampiny

Taorian’ilay fitokanana, dia nisy sakafo maivana natolotra. Nilahatra niloloha lovia fisaka lehibe nisy pastèques ireo rahavavy. Izy ireo dia narahin’ny anadahy roa, izay nanao satroky ny mpahandro tamin’io fotoan-dehibe io sady nitondra lovia fisaka lehibe nisy mofomamy. Noravahana tamin’ny fomba narevaka tamina didim-boasary sy voasarimakirana manify ireo mofomamy fisaka. Feno korana aoka izany ilay rivo-piainana manontolo.

Nanainga ireo mpitsidika rehefa avy notolorana sakafo. Avy eo ireo Vavolombelona dia nandroso ho ao amin’ny trano iray teo akaiky mba hamonjy ny sakafo hariva. Nipetraka teo alatrano avokoa izahay teo ambany taratry ny volam-penomanana, sady nisy afo nidedadeda nanazava ilay tokotany. Taitaitra sady reraka aoka izany noho ny raharaha nandritra ilay andro aho, hany ka tsy nahalany ny sakafoko. Nomeko ny zazavavy kely iray ny fen’akoho efa nihinanako. Nijery ny lovianay ireo mpisava lalana teo an-toerana, ary raha nisy zavatra tavela, dia notaperiny. Tsy nisy sisan-tsakafo izany teo. Mihanta be loatra izahay any Etazonia.

Rehefa nadiva hifarana ilay takarivanay, dia nampahatsiahy an’ireo izay tonga avy tany Bamako ny anadahy iray fa haka azy ireo amin’ny 9.15 maraina ilay aotobisy. Nipetraka nanerana ilay tokotany ireo anadahy ny ampitso maraina, niandry ny fahatongavan’ilay aotobisy. Tamin’izay izahay dia nihira hira iray farany hoe: “Misaotra, Jehovah ô!” Nanomboka nikoriana ny ranomaso, ary raha vantany vao nahavita izahay, dia tonga taza-maso ilay aotobisy. Nifamihina avokoa ny anadahy sy ny rahavavy rehetra.

Nitsangana teo izahay nanofahofa tanana raha mbola nanainga moramora ilay aotobisy. Nanofahofa tanana avokoa ny tao anatin’ilay aotobisy mandra-paha-tsy tazana azy intsony. Taorian’izany, dia nitodika nifampijery izahay izay tavela. Fitokanana nahatalanjona marina tokoa sady herinandro nahatalanjona tokoa iny. — Nisy nanome.

[Sary, pejy 15]

Efitrano Fanjakana voalohany naorin’ny Vavolombelon’i Jehovah tany Mali

[Sary, pejy 16]

Nandeha aotobisy io antokon’olona falifaly io