Mankasitraka ny Fahalalahana Ara-pivavahana ve Ianao?

Avy amin’ny masoivohon’ny Mifohaza! any Estonia

TANÀNA fitodian-tsambo sy fanaovana vakansy i Pärnu, eto Estonia izay tany baltika kely, repoblika teo aloha tao amin’ny Firaisana Sovietika. Manana mponina maherin’ny 50 000 ilay tanàna. Manana fahalalahana hanaraka ny fivavahana izay fidiny ny olona ankehitriny — fahalalahana izay tsy nananan’izy ireo taona vitsivitsy lasa izay. Tamin’ny 17 Jona 1995, ny Pärnu Leht, gazety eo an-toerana, dia nanamarika fa manana fivavahana 11 i Pärnu, ary koa fa nikasa hamoaka fitohitohizan-dahatsoratra momba azy ireo ilay gazety.

Nanazava toy izao ilay lahatsoratra voalohany: “Anombohanay azy ilay kongregasiona izay toa nisy akony teo amintsika rehetra ny asany — ny Vavolombelon’i Jehovah — izay manao ireo fivoriany ao amin’ny efitrano malalaky ny ozinina iray fanamboarana labiera, ankehitriny. (...) Tamin’ny 1931 ny Mpianatra ny Baiboly no nanomboka niantso ny tenany hoe Vavolombelon’i Jehovah, ary izany no anarana entiny hatramin’izao andro izao. Misy Vavolombelon’i Jehovah maherin’ny dimy tapitrisa manerana ny tany rehetra. Ao Tallinn ny foiben’ny Vavolombelon’i Jehovah eto Estonia.”

Nanohy ny teniny toy izao ilay lahatsoratra: “Naorina teto Pärnu ilay kongregasionan’ny mpitorin’i Jehovah, herintaona sy tapany lasa izay. Teo am-piandohany dia nisy mpikambana 25; ankehitriny dia nitombo ho 120 izy ireo (...).

“Tena manorina ny zavatra manaitra ny saina voalohany. Sariaka, mitafy madio sy milamina, sy malala-tsaina ny olona — mpivady tanora ny ankamaroany. Mahazendana fa voafehy tsara aoka izany ireo ankizy, satria tsy mora ho an’ny ankizy kely iray ny mipetraka eo amin’ny toerana iray mandritra ny adiny iray sy sasany — nefa nanao izany izy ireo.”

Nilazalaza ny maha-samy hafa ny Vavolombelon’i Jehovah amin’ny fivavahana hafa ilay gazety ka nanazava toy izao: “Manantitrantitra ny amin’ny Paradisa ho avy izy ireo. Afa-tsy izany koa, dia mendrika homarihina fa mahalala tsara ny Baiboly ilay kongregasiona, ary manonona azy io izy ireo isaky ny fotoana azo anaovana izany.” Ho famaranan-teny, dia hoy ilay lahatsoratra: “Nanao ny fanapahan-keviny ireo olona 120 ireo, izay mpitorin’i Jehovah; ary mahazo antoka izy ireo fa izany no fanapahan-kevitra mety. Ny finoany sy ny fanambarana azy io no ifantohan’ny fiainany.”

Tsy ny rehetra tao Pärnu no faly tamin’io lahatsoratra voalohan’ny fitohitohizan-dahatsoratra natolotra momba ny fivavahana ao amin’ilay tanàna io. Tamin’ny 8 Jolay 1995, dia nanao tatitra toy izao ny Pärnu Leht: “Tianay ny hamoaka fangatahana an-tsoratra iray voarainay avy tamin’ny fiangonana efatra, mifandray amin’ilay fiantombohan’ny fitohitohizan-tsoratra vaovao iray.” Io fangatahana an-tsoratra, na taratasy, nalefa tany amin’ilay gazety io dia nosoniavin’ireo solontenan’ny Fiangonana Ortodoksa eto Estonia, ny Fiangonana Loteriana Evanjelika Estoniana, ny Fiombonan’ny Kristiana sy ny Batista Evanjelika Estoniana, sy ny Fiangonana Metodista Estoniana.

Naneho ny tsy fahafaliany toy izao ireo solontena ara-pivavahana efatra ireo: “Toa faran’izay hafahafa aminay ny hoe nanomboka ilay fitohitohizan-dahatsoratra tamin’ny lahatsoratra iray momba ny Vavolombelon’i Jehovah ianareo.” Ambonin’izany, dia hoy izy ireo: “Mifandray amin’ilay fitohitohizan-dahatsoratra, dia ho tianay ny hanambara fa heverinay fa tsy azonay atao ny mamela ny Pärnu Leht hanao fanadinadinana aminay.”

Namarana ny teniny toy izao ireo solontena ara-pivavahana: “Ao anatin’ny fiaraha-monina iray misy olona maro sanganehana noho ny fanerena manafintohina avy amin’ireo fivavahana sy antokom-pinoana vaovao isan-karazany izay mampiely ‘fitiavana zavatra ara-panahy’, dia hitanay fa ilain’ireo zavatra vita an-tsoratra ny maneho fiheverana ny tarehin-javatra ara-pivavahana eto an-toerana sy ny ho afaka hanavaka an’ireo fiangonana malaza ara-tantara amin’ireo antokom-pinoana sy fihetsiketsehana mpanohana fiheverana tafahoatra. Tokony hanome fahazavana mitari-dalana mazava tsara ny amin’izany ireo mpikambana ao amin’ny Konsilin’ireo Fiangonana Estoniana, izay misolo tena an’ireo fiangonana kristiana ahitana fiaraha-miasa eokiomenika.”

Kanefa, teo aorian’io taratasy io, dia nanome izao hevitra mampisaintsaina izao ilay mpanoratra ao amin’ny Pärnu Leht: “Ny zava-drehetra heverintsika fa marina dia mety ho tsy marina. Ary ny fomba fijerin’Andriamanitra sy ny fiheverany momba an’ireo kongregasiona isan-karazany dia mety tsy hitovy amin’ny fomba fijerin’ireo fiangonana manan-kaja efatra ireo, na ny mifamadika amin’izany. Tsy misy amintsika tsy mety diso, na dia ireo fiangonana manana fanao naharitra taonjato maro aza.”

Manao ahoana ny fihevitrao momba ny fihetsika miova eo anoloan’ny fivavahana atỳ amin’ireo repoblika teo aloha tao amin’ny Firaisana Sovietika? Matoky izahay fa mankasitraka ny fahalalahana ara-pivavahana anananay eto ny olona hatraiza hatraiza mitady ny fahamarinana.

[Sarintany, pejy 23]

(Jereo ny gazety)

FAILANDY

Helsinki

Ranomasina Baltika

ESTONIA

Tallinn

Pärnu

LETTONIE

Riga

LITUANIE

Vilnious

ROSIA

Saint-Pétersbourg

Moscou

BIÉLORUSSIE

Minsk

[Sary, pejy 24]

Ny kongregasionan’ny Vavolombelon’i Jehovah ao Pärnu