Ny Sakaizantsika Tsara Indrindra dia any Amin’ny Faritra Ara-panahy
MANOME antsika filazalazana mazava tsara ny amin’ireo izay mipetraka any amin’ny faritra ara-panahy ny Baiboly. I Jehovah Andriamanitra no fara tampony any an-danitra. I Jesosy Kristy no manarakaraka an’i Jehovah eo amin’ny hery sy ny fahefana. Ireo anjely mahatoky eo anatrehan’Andriamanitra dia manompo an’Andriamanitra sy ny vahoakany eto an-tany. I Satana sy ireo demoniany dia manohitra an’Andriamanitra sady mamitaka ny olombelona. Ny maty dia matory ao amin’ny fahafatesana mandra-panangan’Andriamanitra azy ireo.
Maniry hahazo ny fanompoam-pivavahantsika ireo demonia
Koa satria tsy manana aina ny maty, dia tsy misy na inona na inona ho azo amin’ny fanolorana fanompoam-pivavahana amin’izy ireny. Tsy manao afa-tsy ny mampandroso ny laingan’i Satana sy ireo demoniany ny fanaovana sorona ho an’ny maty.
Maniry hahazo ny fanompoam-pivavahantsika ve ireo anjelin’Andriamanitra? Tsy izany velively! Manome voninahitra an’Andriamanitra ireo anjely mahatoky, ary mampirisika ny olona hanao toy izany izy ireo. Indroa ny apostoly Jaona no nanandrana nivavaka tamin’ny anjely, kanefa dia niteny mafy azy toy izao izy ireo: “Tandremo, aza manao izao; (...) Andriamanitra ihany no ivavaho”. — Apokalypsy 19:10; 22:8, 9.
Sady maniry ny hotolorana fanompoam-pivavahana no homem-boninahitra i Satana sy ireo demoniany, mifanohitra amin’ireo anjely mahatoky. Izany dia niharihary tamin’ny nakan’i Satana fanahy an’i Jesosy, fony i Jesosy olombelona teto an-tany. Mitantara toy izao ny Baiboly: “Ny devoly nitondra [an’i Jesosy] (...) nankany an-tendrombohitra avo dia avo ka naneho Azy ny fanjakana rehetra amin’izao tontolo izao mbamin’ny voninahiny, dia nanao taminy hoe: Izao rehetra izao dia homeko Anao, raha [miankohoka ianao ka manolotra fanompoam-pivavahana indray mandeha ho ahy, NW ].” — Matio 4:8, 9.
Namaly toy izao i Jesosy: “Mandehana hianao, ry Satana: fa voasoratra hoe: ‘Jehovah Andriamanitrao no [tsy maintsy toloranao fanompoam-pivavahana, NW ], ary Izy irery ihany no hotompoinao’.” (Matio 4:10). Fantatr’i Jesosy ny lalàn’i Jehovah, ary tsy nety nandika izany izy. — Deoteronomia 6:13.
Na dia tsy nahavita nampanolotra an’i Jesosy fanompoam-pivavahana taminy aza i Satana, dia nahomby izy tamin’ny hafa. Mazava ho azy fa olona vitsy no manao fanahy iniana manolotra fanompoam-pivavahana amin’i Satana. Na dia izany aza, dia tamin’ny alalan’ny hafetsifetsena sy ny fitaka, sy ny lainga ary ny tahotra no nanodinan’i Satana sy ireo demoniany, olona maro aoka izany hiala amin’ny fanompoam-pivavahana madio amin’i Jehovah, hany ka nanoratra toy izao ny apostoly Jaona: “Izao tontolo izao (...) dia mipetraka eo amin’ilay ratsy avokoa.” (1 Jaona 5:19). Ireo izay manolotra fanompoam-pivavahana amin’ny fomba mifanohitra amin’ny Tenin’Andriamanitra dia manome voninahitra an’i Satana, fa tsy i Jehovah. Mampitandrina toy izao ny Baiboly: “Izay zavatra aterin’ny jentilisa ho fanatitra, dia ateriny amin’ny demonia, fa tsy amin’Andriamanitra”. — 1 Korintiana 10:20.
Jehovah no tokony hotolorana fanompoam-pivavahana
Tokony hatefa any amin’Andriamanitra irery ihany ny fanompoam-pivavahantsika. Hoy i Jehovah tamin’i Mosesy: “Aza manana andriamani-kafa, fa Izaho ihany. Aza manao sarin-javatra voasokitra ho anao, na ny mety ho endriky ny zavatra izay eny amin’ny lanitra ambony, na izay etỳ amin’ny tany ambany, na izay any amin’ny rano ambanin’ny tany. Aza miankohoka eo anatrehany, ary aza manompo azy; fa Izaho, Jehovah Andriamanitrao, dia Andriamanitra saro-piaro”. — Eksodosy 20:3-5.
Na dia mahatahotra eo amin’ny fahalehibeazana aza i Jehovah, dia azo hatonina izy. Nanoratra toy izao i Jakoba mpianatra: “Manatòna an’Andriamanitra, dia hanatona anareo Izy.” (Jakoba 4:8). Nilaza toy izao ny apostoly Paoly: “Tsy mba lavitra antsika rehetra [Andriamanitra]”. (Asan’ny Apostoly 17:27). Ary nanoratra toy izao ny apostoly Jaona: “Izao no fahasahiana ananantsika eo anatrehan[’i Jehovah]: Raha mangataka zavatra araka ny sitrapony isika, dia mihaino antsika Izy; ary raha fantatsika fa mihaino antsika Izy, na inona na inona no angatahintsika, dia fantatsika fa azontsika izay angatahintsika aminy.” — 1 Jaona 5:14, 15.
Mariho fa nanoratra i Jaona hoe hanome izay angatahintsika i Jehovah raha mangataka “araka ny sitrapony” isika. Mba hahafantarana hoe inona no sitrapon’Andriamanitra, dia tsy maintsy mianatra izay ampianarin’ny Baiboly isika. Ho faly ny Vavolombelon’i Jehovah hanampy anao hahatakatra ny hevitry ny Baiboly.
Arakaraka ny ianaranao bebe kokoa momba an’i Jehovah, dia hahazo fahalalana bebe kokoa momba ireo izay mipetraka any amin’ny faritra ara-panahy ianao. Izany fahalalana izany dia mitondra fahafahana amin’ireo finoanoam-poana sy ireo zavatra inoana ary ireo fomban-drazana izay ampiasain’i Satana mba hitanana ny olona ao anatin’ny tahotra sy ny fanandevozana. Amin’ny alalan’ny fahalalana araka ny marina an’Andriamanitra no hianaranao hitoky aminy mba hanampy anao hanalavitra na handresy ireo zava-manahirana isan’andro eo amin’ny fiainana. Afaka ny ho tonga sakaizan’Andriamanitra ianao. Ary Andriamanitra dia ho hita fa “aro sy hery ho [anao]; Mpamonjy mora azo indrindra amin’ny fahoriana”. — Salamo 46:1.
Hofoanana ireo hery ratsy fanahy
Aza misalasala mihitsy ny amin’ny hoe handresy ireo hery ara-panahy ratsy, ny hery ara-panahy tsara. Efa nisy sahady ady natao tany amin’ny faritra ara-panahy, dia ady izay nanadio ny lanitra tamin’i Satana sy ireo naman-dratsiny. Milaza toy izao ny bokin’ny Apokalypsy: “Nisy ady tany an-danitra: Mikaela [i Jesosy Kristy tafatsangana tamin’ny maty] sy ny anjeliny niady tamin’ilay dragona; ary ilay dragona mbamin’ny anjeliny kosa dia niady, nefa tsy naharesy, sady tsy nisy fitoerana ho azy intsony tany an-danitra. Ary nazera ilay dragona, dia ilay menarana ela, izay atao hoe devoly sy Satana, izay mamitaka izao tontolo izao; dia nazera tamin’ny tany izy, ary ny anjeliny koa niaraka nazera taminy.” — Apokalypsy 12:7-9.
Inona no vokatr’izany ady izany? Manohy toy izao ilay tatitra: “Ary noho izany mifalia, ry lanitra sy hianareo izay monina ao aminy. Loza ho an’ny tany sy ny ranomasina! Fa nidina ho aminareo ny devoly sady manana fahatezerana lehibe, satria fantany fa kely sisa ny androny.” (Apokalypsy 12:12). Afaka nifaly ireo tany an-danitra satria tsy tany intsony i Satana sy ireo demoniany mba hiteraka fikorontanana. Ny fanjerana azy avy tany an-danitra anefa dia nitondra loza be, zava-manahirana lehibe, ho an’izay eto an-tany. Miaina ao anatin’izany fotoan’ny loza izany isika ankehitriny. — 2 Timoty 3:1-5.
Hoavy tsy hisy faharatsiana
Na dia izany aza, dia manolotra fanantenana koa ny Baiboly. Manome toky antsika izy io fa ‘kely sisa ny andron’ny’ Devoly alohan’ny hanaovana izay tsy hahafa-mihetsika azy. Rehefa hitranga izany, dia hitondra fitahiana mahatalanjona i Jehovah ho an’izay rehetra eto an-tany ka mitady ny fisakaizany. Diniho ny vitsivitsy amin’ireo fampanantenany ny amin’ny hoavy:
“Hahavoka-bary betsaka ny tany, na dia any an-tampon’ny tendrombohitra aza”. — Salamo 72:16.
“Ireo voafidiko dia hanaram-po amin’ny asan’ny tànany. Tsy hisasatra foana izy”. — Isaia 65:22, 23.
“Tsy hisy amin’ny mponina ao hilaza hoe: Marary aho”. — Isaia 33:24.
“Dia hampahiratina ny mason’ny jamba, ary hampahaladina ny sofin’ny marenina. Dia hitsambikina tahaka ny diera ny mandringa, ary hihoby ny lelan’ny moana”. — Isaia 35:5, 6.
“Ary hofafan[’Andriamanitra] ny ranomaso rehetra amin’ny masony; ary tsy hisy fahafatesana intsony, sady tsy hisy alahelo, na fitarainana, na fanaintainana; fa efa lasa ny zavatra taloha.” — Apokalypsy 21:4.
“Ny marina handova ny tany ka honina eo aminy mandrakizay.” — Salamo 37:29.
I Jehovah irery ihany, ilay Andriamanitra marina, no afaka manatanteraka fampanantenana lehibe toy izany. Tsy misy na inona na inona hanakana azy tsy hanatanteraka ny fikasany. “Tsy hisy tsy ho tanteraka ny teny rehetra ataon’Andriamanitra.” — Lioka 1:37.
[Sary, pejy 9]
Raha vao tonga sakaizan’Andriamanitra ianao, dia hanampy anao hiatrika ireo zava-manahirana eo amin’ny fiainana izy