Fanovozan-drano avy Amin’ny Rahona

AVY AMIN’NY MASOIVOHON’NY MIFOHAZA! ANY AMERIKA ATSIMO

NAHAVITA nanavao teknika tranainy arabo fanovozan-drano avy amin’ny zavona, ireo mpikaroka miasa any Silia. “Ireo hazo oliva any amin’ireo efitr’i Oman dia notondrahana nandritra ny taonjato maro tamin’ny ranon-javona mihandrona eo amin’ny ravinkazo ka mitete ao amin’ny fitoeran-drano kely natao teo am-pototr’ireo hazo”, hoy ny fanazavan’ny gazetikely Health InterAmerica. Tsy hazo oliva anefa, fa harato lehibe kosa, no natsangan’ireo mpikaroka, tany amin’ireo faritra ngazana be tendrombohitra izay rakotra zavona tsy tapaka avy any amin’ny ranomasimbe. Mamandrika ireo teten-drano avy amin’ny zavona ireo harato, izay toy ny harato amin’ny lalao vole saingy goavana. Mitete ao amin’ny fantson-drano iray ireo teten-drano ireo, avy eo dia mankao amin’ny fantsona iray mitondra ny rano ho ao amin’ny fitahirizan-drano iray.

Hita fa mahomby ilay teknika any Chungungo, vohitra kely iray any an’efitra amoron-tsiraka avaratr’i Silia. Efatra ambin’ny folo taona lasa izay, hoy ny IDRC Reports, gazetiboky avoakan’ny Foibem-pikarohana Iraisam-pirenena Momba ny Fampandrosoana any Kanada, dia tsy nanana loharanon-dranomamy teo an-toerana ireo mponin’i Chungungo. Nisy kamiao nitondra rano 5 000 litatra isan’andro, ary voatery nihafy tamin’ny rano 3 ka hatramin’ny 14 litatra isan’andro ny fianakaviana tsirairay. Amin’izao fotoana izao anefa, noho ireo harato manangon-javona 75 natsangana eny amin’ireo tendrombohitra eo ambonin’ilay vohitra, dia mahazendana fa rano 11 000 litatra no mikoriana mankao Chungungo, ka manome rano 30 litatra isan’andro ho an’ny mponina tsirairay. Milaza ny Dr. Robert Schemenauer, fizisiana momba ny rahona, fa nanatsara ny fahasalaman’ireo mponina ao amin’ilay vohitra ilay fomba famandrihana zavona. “Mihinana legioma sy voankazo avy ao an-jaridainany sy avy any an-tsahany avy ny rehetra.”

Tsy vitan’ny hoe mahasalama ny ranon-javona fa tsy lafo koa. Mitentina tokony ho 75 000 dolara amerikana ny fananganana harato iray, amin’ny ankapobeny, hoy ny Dr. Schemenauer, raha ampitahaina amin’ny an-tapitrisany dolara maro ilaina mba hanorenana tohodrano. Lazain’ireo mpikaroka fa, na dia misy aza toerana karakaina maro hafa maneran-tany afaka mandray soa avy amin’io teknika io, dia tsy rototra akory ireo masoivoho iraisam-pirenena hanaiky ny maha-tsara io fomba famatsian-drano hafa io.

[Sary, pejy 23]

Havia: Harato eo an-tampon-tendrombohitra izay manangona teten-drano avy amin’ny zavona

[Sary, pejy 23]

Ambany: Ilay harato jerena akaiky

[Sary nahazoan-dalana]

Sary: IDRC