Areti-mandringana — Famantarana ny Farany Ve?
MOA ve ireo areti-mandringana amin’izao androntsika izao manondro fa akaiky ny faran’izao tontolo izao? Alohan’ny hamaliantsika io fanontaniana io, dia andeha hodinihintsika izay tiana holazaina amin’ilay fitenenana hoe “faran’izao tontolo izao”.
Olona maro no mino fa ny faran’izao tontolo izao dia midika hoe hanapotika ny tany sy ny fiainana rehetra eo aminy Andriamanitra. Kanefa, milaza ny Tenin’Andriamanitra fa ‘nataony honenana no namoronany [ny tany]’. (Isaia 45:18). Ny fikasany dia ny hameno ny planeta amin’ny olona salama sy sambatra, izay haniry mafy ny hanaraka ny fari-pitsipiny marina. Koa tsy midika ho faran’ny tany sy ny mponina rehetra eo aminy àry ny faran’izao tontolo izao. Izy io kosa dia midika ho faran’ny fandehan-javatra ankehitriny sy faran’ireo izay anisan’izy io, ka mandà tsy hanao ny sitrapon’Andriamanitra.
Izany no nasehon’ny apostoly Petera izay nanoratra toy izao: “Rano (...) no nandravana izao rehetra izao [tamin’ny andron’i Noa] tamin’ny nanasaforany azy”. Rehefa noravana izao tontolo izao tamin’ny andron’i Noa, dia ireo olona ratsy fanahy no ringana. Nitoetra ny tany ary toy izany koa i Noa marina sy ny fianakaviany. Araka ny lazain’i Petera manaraka izany, dia hanao zavatra indray Andriamanitra amin’ny hoavy mba hahatonga ny “fandringanana ny ratsy fanahy”. — 2 Petera 3:6, 7.
Misy andinin-teny hafa ao amin’ny Baiboly manohana tsy misy fiovaovana an’io fiheverana io. Ohatra, manambara toy izao ny Ohabolana 2:21, 22: “Ny olona mahitsy no honina amin’ny tany, ary ny tsy manan-tsiny ihany no ho sisa mitoetra ao; fa ny ratsy fanahy kosa hofongorana amin’ny tany, ary ny mpivadika hongotana.” — Jereo koa ny Salamo 37:9-11.
Areti-mandringana sy ny faran’izao tontolo izao
Rahoviana anefa izany no hitranga? Nametraka izany fanontaniana izany tamin’i Jesosy ny efatra tamin’ireo mpianany. Nanontany toy izao izy ireo: “Inona no ho famantarana ny fanatrehanao sy ny an’ny fifaranan’ny fandehan-javatra [na, “ny faran’izao tontolo izao”, araka ny ilazan’ny fandikan-tenin’ny Baiboly sasany azy]?” Namaly i Jesosy hoe: “Hisy firenena hitsangana hamely firenena, ary hisy fanjakana hitsangana hamely fanjakana; ary hisy mosary sy horohorontany amin’ny tany samy hafa.” (Matio 24:3, 7, NW ). Ao amin’ny fitantarana mifanitsy amin’izany ao amin’ny Lioka 21:10, 11, dia nanampy teny i Jesosy hoe: “Hisy (...) areti-mandringana any amin’ny tany samy hafa, ary hisy zava-mahatahotra sy famantarana lehibe avy any an-danitra.” — Izahay no manao sora-mandry.
Mariho fa tsy nilaza i Jesosy hoe ny areti-mandringana no hany hampiseho fa akaiky ny farany. Tsia, fa nanonona ady lehibe sy horohoron-tany ary mosary koa izy. Ao amin’ny faminaniany be tsipiriany, hita ao amin’ny Matio 24 sy 25, Marka 13 ary Lioka 21, i Jesosy dia nanambara mialoha zavatra maro hafa izay tokony hitranga. Tsy maintsy hiara-mitranga ireo rehetra ireo, alohan’ny hanaovan’Andriamanitra zavatra mba hamaranana ny faharatsiana eto an-tany. Misy porofo mahery fa miaina ao anatin’izany fe-potoana izany isika ankehitriny.
Ilay paradisa ho avy
Ny hoavy dia tsy hitondra ny fanafoanana ny taranak’olombelona, na amin’ny alalan’ny areti-mandringana na amin’ny alalan’ny fandraisan’Andriamanitra anjara. Mampanantena ny hanova itỳ tany itỳ ho paradisa i Jehovah Andriamanitra. (Lioka 23:43). Anisan’ny zavatra hafa, dia hofoanany ireo aretina izay mamely ny taranak’olombelona.
Omena antoka ny amin’izany isika rehefa mandinika ny fanompoan’i Jesosy Kristy, izay nanome taratry ny toetran’ny Rainy tamin’ny fomba tanteraka. Nahazo fahefana avy tamin’ny Rainy any an-danitra i Jesosy, ka nanasitrana ireo izay nandringa, jamba, moana na kilemaina. (Matio 15:30, 31). Nanasitrana ireo izay voan’ny habokana koa izy. (Lioka 17:12-14). Nanasitrana vehivavy nitsi-dra sy lehilahy maty tanana ary lehilahy nanirano izy. (Marka 3:3-5; 5:25-29; Lioka 14:2-4). Namerina indray ny fahasalaman’ny “mararin’ny androbe ary ny mararin’ny paralysisa” izy. (Matio 4:24). Intelo nanangana ny maty mihitsy aza izy! — Lioka 7:11-15; 8:49-56; Jaona 11:38-44.
Ireny fanasitranana mahagaga ireny dia manome antony hatokiana ny fampanantenan’Andriamanitra fa amin’ny hoavy omaniny, dia ‘tsy hisy amin’ny mponina hilaza hoe: Marary aho’. (Isaia 33:24). Tsy hanaisotra ny fahasalamana sy ny ain’ny olona intsony mandrakizay ny areti-mandringana. Velom-pankasitrahana erỳ isika satria samy ananan’ilay Mpamorona antsika be fitiavana na ny fahaizana na ny faniriana hanaisotra tanteraka mandrakizay ny aretina sy ny rofy! — Apokalypsy 21:3, 4.
[Sary, pejy 9]
Nomen’Andriamanitra fahefana hanasitrana ny marary i Jesosy
[Sary, pejy 10]
Hanaisotra ny aretina sy ny rofy i Jehovah ao amin’ilay Paradisa an-tany ho avy