Ny Fiheveran’ny Baiboly
Tena Misy ve ny Demonia?
NANDRITRA ny taonjato faha-17 sy faha-18, dia nisy fanenjehana tamin-kadalana nitohitohy nanenika ny faritra maro tany Eoropa, natao hanenjehana ireo mpilalao ody. Nizaka fampijalijaliana nahatsiravina ny maro tamin’ireo nolazaina fa mpilalao ody. Ny sasany tamin’ireo nampangaina tamin’ny fomba diso dia niaiky ho nilalao ody, mba tsy hampijaliana azy ireo intsony fotsiny. Maro tsy tambo isaina no novonoina noho ny honohono na ny ahiahy fotsiny.
Na dia toa niorina tamin’ny Soratra Masina aza ireo zavatra natao mba hanoherana ny filalaovana ody — endrika iray amin’ny demonisma, nandritra izany fe-potoana izany — dia tsy isalasalana fa feno firehetana tafahoatra. Tsy nanankinana andraikitra hampijalijaly na hamono mpilalao ody na mpanao spiritisma hafa, ny Kristiana. (Romana 12:19). Inona no fihetsika fahita mahazatra amin’izao andro izao?
Fihetsika moramorainy
Tsy mihevitra ny fanao mifandray amin’ny spiritisma toy izany ho mampidi-doza ny ankamaroan’ny olona ao amin’ny Tontolon’ireo Fivavahana Lazaina fa Kristiana, amin’izao andro izao. Noho ny fahalianana ta hahafanta-javatra, dia mety hanandranandrana ny fanandroana, ny majika, ny fisikidianana, ary ny filalaovana ody ny olona sasany, kanefa tsy demonisma no fiheverany ireny fanao mifono asan’ny maizina ireny. Indraindray, dia misy mpampiala voly sy mpanao fanatanjahan-tena malaza ary mpanao politika manaiky ampahibemaso fa nifandray tamin’ny hery miafina, izy ireo. Mampiseho ny mpilalao ody sy ny mpamosavy ho “olona manintona somary tsy mahazatra fotsiny, izay manan-kery mahagaga tsy mitondra fahavoazana ho an’iza na iza”, ny boky sy sarimihetsika sasany, hoy ny encyclopédie iray. Mety hanindrahindra foto-kevitra momba ny asan’ny maizina ny zavatra natao hampiala voly sy hampianarana ny ankizy.
Mety hitarika ho amin’ny tsy finoana ny fisian’ny demonia ny fihetsika moramorainy sy tsy miraika toy izany manoloana ny demonisma. Mino ve ianao fa misy sy miezaka amim-paharisihana hitondra fahavoazana ho antsika ny demonia? Rehefa heverina tokoa, ny ankamaroan’ny olona amin’izao andro izao dia hilaza fa mbola tsy nifampikasoka tamin’ny demonia na vavolombelon’ny asany mihitsy ny tenany. Tena misy ve ny demonia?
Misy olana saro-bahana entin’ny tsy finoana ny fisian’ny demonia
Miatrika olana saro-bahana ireo izay milaza fa manaiky ny Baiboly, nefa misalasala ny amin’ny fisian’ny demonia. Tsy tena mino ny Baiboly izy ireo raha tsy mino fa tena misy ny demonia. Nahoana? Satria fampianarana ao amin’ny Baiboly, Tenin’Andriamanitra, ny hevitra ny amin’ny zavaboary ara-panahy ratsy fanahy, manan-kery ambony noho ny an’ny olombelona.
Ny Genesisy, boky voalohany ao amin’ny Baiboly, dia mitantara ny fomba nampiasan’ny zavaboary manan-tsaina iray bibilava iray mba hamitahana an’i Eva, sy hitarihana azy hikomy tamin’Andriamanitra. (Genesisy 3:1-5). Ny Fanambarana na Apokalypsy, boky farany ao amin’ny Baiboly, dia mampahafantatra an’io mpamitaka ratsy fanahy io ho “ilay menarana ela”, na “devoly sy Satana, izay mamitaka izao tontolo izao”. (Apokalypsy 12:9). Nahataona anjely hafa hikomy i Satana. (Joda 6). Antsoina hoe demonia ireny anjely nietry ireny, ao amin’ny Baiboly. Mampihatra ny heriny etỳ amin’ny manodidina ny tany izy ireo, ary tezitra mafy amin’Andriamanitra sy amin’ireo izay manompo azy. — Apokalypsy 12:12.
Manan-kery hitaona sy hampitondra fahavoazana ary hampita hevitra amin’ny olombelona i Satana sy ny demonia. (Lioka 8:27-33). Efa nandinika ny toetoetran’olombelona hatramin’ny an’arivony taona maro izy ireo. Hainy ny fomba fanararaotana ny fahalemen’olombelona. Misy tatitra ao amin’ny Baiboly ny amin’ny lehilahy sy vehivavy ary ankizy azon’ny demonia, na nofeheziny tanteraka. (Matio 15:22; Marka 5:2). Afaka mahatonga aretina na kilema ara-batana, toy ny fahajambana, izy ireo. (Joba 2:6, 7; Matio 9:32, 33; 12:22; 17:14-18). Afaka manajamba ny sain’ny olona koa izy ireo. (2 Korintiana 4:4). Miasa tsy an-kijanona ny demonia, toa an’i Satana, mpitarika azy ireo, izay toy “ny liona mierona mitady izay harapany”. (1 Petera 5:8). Mirakitra fitantarana maro momba ny fisian’ny demonia ny Baiboly. Raha mino ny Baiboly ianao, dia hanaiky koa ny fisian’ny zavaboary tsy hita maso ratsy fanahy.
Mpamitaka ratsy fanahy
Raha misy anefa ny demonia mahery amin’izao andro izao, nahoana no tsy miteraka horohoro tsy an-kijanona eto amin’izao tontolo izao izany? Nahoana no tsy tsapa miharihary kokoa ny maha-eo azy sy ny zavatra ataony? Mamaly toy izao ny Baiboly: “Satana aza mampiova ny endriny ho tahaka ny anjelin’ny mazava.” (2 Korintiana 11:14). Mpamitaka ny Devoly. Aseho matetika amin’ny endriny mamitaka hoe tsy manimba, na mahasoa mihitsy aza, ny asan’ny demonia. Noho izany, dia sarotra ny mahafantatra azy io.
Manohy mampijaly ny olona amin’ny fomba maro samihafa i Satana sy ny demoniany, toy ny nataony tamin’ny andron’ny Baiboly ihany. Ny sasany amin’ireo Kristiana marina ankehitriny dia nanao ny asan’ny maizina, teo aloha; ary afaka manaporofo izy ireo fa mampihorohoro ny fanafihan’ny demonia. Amin’izao andro izao, angamba amin’ny ambaratonga lehibe kokoa noho ny hatramin’izay, dia mampiasa ny heriny ambony noho ny an’ny olombelona ny demonia mba hitaomana ny olona hanaraka fanao mifono asan’ny maizina tsotra izao. Tsy tokony hohamaivanina ny heriny. Kanefa, mahavita zavatra bebe kokoa izy ireo amin’ny famitahana olona hiala amin’Andriamanitra noho ny amin’ny fampihorohoroana azy ireo. “Mamitaka izao tontolo izao” i Satana sy ny demonia, hoy ny Baiboly. (Apokalypsy 12:9). Ny hanimba tsikelikely ny fahasalamana ara-panahy amin’ny fomba an-kolaka sy am-pitaka no fikasan’izy ireo.
Tena misy ny demonia. Amin’ny fomba hafa inona indray no azo anazavana ny fahitana miharihary aoka izany fa lian-dra sy dodona handringana ny olona, amin’izao andro izao? Maniry hiaina ao anatin’ny filaminana sy ny fahasambarana ny olombelona, raha ny ara-dalàna. Manindrahindra ny fanaovan-dratsy anefa ny demonia, ary manan-kery hitaona sy hanimba ny sain’ny olombelona.
Kanefa, i Jehovah dia Andriamanitra tsitoha — mahery kokoa noho ny demonia. Manatanjaka sy miaro antsika amin’ny “fanangolen’ny devoly” izy. (Efesiana 6:11-18). Tsy mila ny hanana tahotra mampivarahontsana ny demonia isika, satria mampanantena toy izao Andriamanitra: “Ka dia maneke an’Andriamanitra hianareo; ary manohera ny devoly, dia handositra anareo izy.” — Jakoba 4:7.
[Sary nahazoan-dalana, pejy 18]
Sipa Icono