Tsy Tena Nisy ny Evôlisiôna

Asehon’ny valin’ny fitsapan-kevitra fa Amerikanina maro no mino fa noforonin’Andriamanitra nivantana ny olombelona voalohany, fa tsy nivoatra avy tamin’ny endri-piainana ambany akory. Nahoana anefa no betsaka erỳ ireo mpampianatra siansa any Amerika milaza fa tena nisy ny evôlisiôna tsy misaina sy niseho araka ny kisendrasendra? Anisan’ny antony mahatonga izany ny hoe “mifehy ny sampan-draharahan’ny siansa any amin’ny oniversite maro (...) ireo mpandala fatratra ny fampianaran’i Darwin”, hoy i Phillip E. Johnson, mpampianatra lalàna ao amin’ny Oniversiten’i Kalifornia, any Berkeley.

Manazava toy izao i Johnson: “Tamin’ny toe-javatra sasany dia norarana ny mpampianatra biôlôjia tsy hilaza tamin’ny mpianatra fa tena mampisalasala ilay filazana hoe afaka namorona sady tena namorona ny zava-mahatalanjona amin’ny biôlôjia ny fiasan’ny tenan-javatra tsy manan-tsaina.”

Nanao izao fanamarihana izao i Murphy O’Dean, izay sady mpahay siansa no injeniera: “Aleon’ny ‘siansa momba ny evôlisiôna’ mirona ho amin’ny finoana tsy marim-pototra hoe ‘tsy maintsy ho marina ny evôlisiôna’, toy izay hanilika teôria iray tsy mifanaraka amin’ny zava-misy.” Na odian-tsy hita, na hamaivanina ny fifanoheran’ny porofo ananana sy ny tsy fahampiam-porofo.

Fa nahoana? Hoy i Michael Behe, biôlôjista momba ny môlekiola, ao amin’ilay boky hoe Darwin’s Black Box: “Tsy maniry fotsiny izao ny hisian’ny zavatra hafa ao ambadik’izao tontolo izao ny olona maro, anisan’izany ny mpahay siansa ambony sy hajaina fatratra maro. Tsy tian’izy ireo ny hisian’ny fisiana ambony noho ny olombelona hisy heriny eo amin’izao tontolo izao.” Ny siansa marina anefa dia tsy minia tsy mahalala ny fifanoheran’ny porofo ananana mba hampandrosoana ireo hevitra tiany kokoa. Tsy ny mpahay siansa rehetra koa no mino ny evôlisiôna.

Nanontany toy izao an’i Carlo Rubbia, izay nahazo ny Loka Nobel momba ny Fizika, ilay gazetiboky brezilianina hoe Veja: “Mino an’Andriamanitra ve ianao?” Na dia tsy niaiky ny amin’ny Andriamanitra velona iray aza izy, dia tena nitsotra toy izao: “Arakaraka ny andinihanao ny natiora, no ahatsapanao fa tena milamina be daholo ny zavatra rehetra ao aminy. Mitaky fahiratan-tsaina lehibe aoka izany ilay izy, hany ka rehefa mandinika fotsiny fisehoan-javatra araka ny natiora aho, dia tonga amin’ny fanatsoahan-kevitra fa misy ny Mpamorona.”

Izany fanamarihany izany dia mampahatsiahy antsika ireto tenin’ny apostoly Paoly momba an’Andriamanitra ireto: “Ny fombany tsy hita, dia ny heriny mandrakizay sy ny mah’Andriamanitra Azy, dia miseho hatramin’ny nanaovana izao tontolo izao, fa fantatra amin’ny zavatra nataony”. — Romana 1:20.