Loza Misy Endriny Roa

Avy amin’ny masoivohon’ny Mifohaza! any Meksika

TAO an-tranony vita tamin’ny takela-kazo voalalotra godorao i Godofredo sy i Gisela vadiny, izay samy Vavolombelon’i Jehovah, ary ireo zanaka kelin’izy mivady, rehefa namely ny moron-tsirak’i Oaxaca, eto Meksika, ny rivo-doza Pauline. Nendahin’ny rivotra tsirairay ireo takelaka. Tamin’ny farany, rehefa ampahany tamin’ilay rafitra sisa tavela, dia tena nihanjahanja tsy nisy nialofana teo izy mianakavy kely.

Nanohitra ny rivo-mahery izy mianakavy kely nandritra ny adiny roa mahery: ny zazakely iray valo volana teny an-trotroan’i Gisela, ary ny telo hafa namikitra taminy sy tamin’i Godofredo. Indraindray, dia nidaraboka sy nikodiadia tamin’ny tany izy ireo, noho ny herin’ny rivotra. Tsy nisy naninona ihany izy rehetra tamin’ny farany.

Tany Acapulco, rehefa hitan’i Nelly, Vavolombelon’i Jehovah, fa niditra tao an-tranony ny rano, dia nofohaziny ny ankohonany. Tsy mampino ny hafainganan’ny fiakaran’ny rano, ary nopaohin’ny riaka tany anaty rano i Nelly, nefa nosintonin’ny zanany vavy izy. Namikitra tamin’ny makarakara vy amin’ny varavarankely izy ireo, ary tsy afa-nanoatra fa dia nijery fotsiny ny fiakaran’ny rano hatreo amin’ny tendany. Tamin’izay indrindra no nandrenesan’izy ireo feon-dehilahy iray niantso azy. Mpifanolo-bodirindrina tamin’izy ireo izy io; nanampy azy ireo hivoaka avy tao sy nandray azy ho ao an-tranony izy io. Tao dia nihorohoro izy ireo teo am-pahitana fiarakodia iray nanamontsana tanteraka ilay trano nisy azy minitra vitsivitsy monja talohan’izay.

Namely mafy ny moron-tsiraky ny fanjakan’i Oaxaca tamin’ny rivotra nifofofofo nahatratra 200 kilaometatra isan’ora ny rivo-doza Pauline, ny tolakandron’ny alarobia 8 Oktobra 1997. Avy eo, ny alakamisy 9 Oktobra vao nangiran-dratsy, dia nandrava ny fanjakan’i Guerrero, indrindra fa ny tanànan’i Acapulco ilay rivo-doza, ka nahatonga onja avo nahatratra folo metatra, sy niteraka tondra-drano izay nifaoka ny trano, ny fiarakodia, ny biby ary ny olona. Rehefa lasa ilay tafio-drivotra, dia lakan-drano nahatratra folo metatra mahery ny halaliny no nisolo toerana ireo arabe. Araka ny voalazan’ilay gazety hoe The News, dia tombanan’ny Vokovoko Mena eto Meksika ho 400, fara fahakeliny, ny maty ary 20 000 ka hatramin’ny 25 000 no tsy nanan-kialofana, raha atambatra ny tao amin’ireo fanjakana roa ireo. Tao anatin’iny loza iny anefa dia nisy fampisehoam-pitiavana kristianina nampihetsi-po.

Mihetsika ny vahoakan’i Jehovah

Raha vantany vao re ny vaovao momba ny rivo-doza Pauline, dia nanomboka naharay antso avy tamin’ireo Vavolombelona nanerana ilay tany ny biraon’ny sampan’ny Vavolombelon’i Jehovah eto Meksika. Ta hahalala izay fanampiana azony nomena ireny Vavolombelona ireny. Nisy koa fanampiana natolotry ny avy tany an-tany hafa. Tsy ela dia natsangana ny komitin’ny vonjy rano vaky, ary nisy sakafo, fitafiana, ary zavatra hafa an-taonina maro nozaraina.

Afa-tsy izany koa, dia nisy fitaovam-panorenana novidina, ary nanomboka avy hatrany ny asa fanamboarana ireo trano 360 sy Efitrano Fanjakana maromaro simba na rava. Ireo rahalahy sy anabavy kristianina an’arivony maro dia somebiseby nanolotra fanomezana, nanasokajy azy ireny, nanisy fonony, nitatitra ary nizara ny fanampiana vonjy rano vaky, na nanamboatra ny simba.

Vaky vava ny mpivarotra sasany noho ny asan’ny Vavolombelona, hany ka nanolotra tamin-katsaram-panahy sakafo, fitaovam-panorenana, ary zavatra hafa. Ny sasany nampidina ny vidin’entany tamin’ny Vavolombelona. Nihetsi-po lalina ireo Vavolombelona niharam-pahavoazana raha nahita ny fitiavana naseho azy, indrindra fa rehefa namaky ireo taratasy fankaherezana tao anaty fonosan-tsakafo.

Mampalahelo fa maty noho ilay rivo-doza i José Faustino, Vavolombelona 18 taona, sy olona telo niara-nianatra ny Baiboly tamin’ny Vavolombelona. Nankasitraka ny vavaka natao ho azy sy ny fankaherezana nomena azy tamin’ny alalan’ny kôngregasiôna ny havan’izy ireo, indrindra fa ny ray aman-drenin’i José.

Vokatra tsara vitsivitsy

Taorian’ilay rivo-doza Pauline, dia olona maro no nangataka hianatra Baiboly, anisan’izany ny havana tsy mpinon’ny Vavolombelona, ary mpiray tanàna maro no vonona kokoa hihaino ny hafatra feno fanantenana nentin’ny Vavolombelona. Afa-tsy izany koa, dia nandray anjara tamin’ny fizarana ny sakafo fanampiana ho an’ny ankapoben’olona ny Vavolombelona. Tamin’ny toe-javatra iray, rehefa nanontanian’ny Vavolombelona iray ny lehilahy iray momba ny antony nifidianany ny Vavolombelon’i Jehovah ho mpizara ny sakafo nomen’ny kompaniany, dia izao no navaliny: “Satria fantatro fa olona voalamina sy manao ny marina ianareo. Ankoatra izany, dia ianareo no mahalala tsara hoe iza no tena mila indrindra an’io fanampiana io, satria ianareo mahalala ny olona eo amin’ny faritaninareo.”

Arakaraka ny anatonan’ny farany sy hihabetsahan’ny loza hatrany maneran-tany, dia mampahery foana ny mahita fa miasa ny foto-pitsipiky ny Baiboly, na eo anoloan’ny fahoriana aza.

[Sary, pejy 26]

Ankizy manampy eo amin’ny asa fanorenana indray

[Sary, pejy 27]

Vavolombelona eo am-panamboarana Efitrano Fanjakana vaovao tany Oaxaca, taorian’ny rivo-doza Pauline