FITEHIRIZAM-BOKIN’NY Vavolombelon'i Jehovah
FITEHIRIZAM-BOKIN’NY
Vavolombelon’i Jehovah
Malagasy
  • BAIBOLY
  • ZAVATRA MISY
  • FIVORIANA
  • g98 8/12 p. 12-14
  • Nahoana Aho no Tsy mba Manan-dray Aman-dreny?

Tsy misy video mifandray amin’io.

Miala tsiny fa tsy mety miseho ilay video.

  • Nahoana Aho no Tsy mba Manan-dray Aman-dreny?
  • Mifohaza!—1998
  • Lohatenikely
  • Mitovitovy Aminy
  • Tsy fahadisoanao akory
  • Zavatra mampikorontana anaty, nefa tsy maintsy iainana
  • Fahazoana fanampiana
  • Ampifalio ny fon’ny ray aman-dreninao
    Ny Fomba Hahitana Fiainam-pianakaviana Sambatra
  • Ry Ray Aman-dreny, Tezao Amim-pitiavana ny Zanakareo
    Ny Tilikambo Fiambenana Manambara ny Fanjakan’i Jehovah—2007
  • Ry Tanora Ampifalio ny Ray Aman-dreninao
    Ny Tilikambo Fiambenana Manambara ny Fanjakan’i Jehovah—2007
  • Ry Ray Aman-dreny, Ampio ho Tia An’i Jehovah ny Zanakareo
    Ny Tilikambo Fiambenana Manambara ny Fanjakan’i Jehovah (Fianarana)—2022
Hijery Hafa
Mifohaza!—1998
g98 8/12 p. 12-14

Manontany ny Tanora Hoe...

Nahoana Aho no Tsy mba Manan-dray Aman-dreny?

“Ny hoe tsy misy ray aman-dreny ve? Azoko lazaina hoe tena mampalahelo noho ny antony maro. Tena sarotra izany mihalehibe tsy mba mahazo firaiketam-po sy fitiavan-dray aman-dreny izany.” — Joaquín.

“Ny mafy indrindra tamiko dia ireo fotoana tokony hahatongavan’ny ray aman-dreny sy hanaovany sonia ny bulletin tany an-tsekoly. Tena nalahelo sy nahatsiaro ho manirery aho. Mbola mahatsapa toy izany foana aho indraindray.” — Abelina, 16 taona.

ZAVATRA mampalahelo mitranga amin’izao androntsika izao ny fisian’ny tanora an-tapitrisany maro mihalehibe tsy misy ray aman-dreny. Any Eoropa Atsinanana, dia an’arivony maro no tonga kamboty noho ny ady. Atsy Afrika, ny valanaretina SIDA dia nitondra loza toy izany. Ny ankizy sasany dia nilaozan-dray aman-dreniny tsotra izao. Nisy fianakaviana tafasaraka noho ny ady na ny loza araka ny natiora.

Fahita ny toe-javatra toy izany na dia tamin’ny andron’ny Baiboly aza. Ohatra, misy firesahana miverimberina momba ny toe-javatra mampalahelo mahazo ny kamboty ao amin’ny Soratra Masina. (Salamo 94:6; Malakia 3:5). Nampisaratsaraka fianakaviana koa ny ady sy ny toe-javatra nampalahelo hafa tamin’izany fotoana izany. Noho izany, ny Baiboly dia miresaka momba ny ankizivavy iray izay nosarahina an-keriny tamin-dray aman-dreniny rehefa nobaboin’ny andiam-pandroba syrianina. — 2 Mpanjaka 5:2.

Mety ho anisan’ireo tanora an-tapitrisany maro tsy manan-dray aman-dreny, mitovy amin’izany koa, ianao. Raha izany no izy, dia fantatrao tsara fa toe-javatra mampahory tokoa izany. Nahoana no nitranga taminao izany?

Tsy fahadisoanao akory

Manontany tena ve ianao raha manasazy anao Andriamanitra? Na angamba ianao tezitra mafy amin-dray aman-dreninao, satria maty izy ireo, toy ny hoe fanahy iniany izany. Voalohany indrindra, dia aoka ho azonao antoka fa tsy tezitra aminao Andriamanitra. Tsy nifidy an-tsitrapo ny handao anao koa ny ray aman-dreninao. Fiafarana mampalahelo miandry ny taranak’olombelona tsy lavorary rehetra ny fahafatesana, ary indraindray izy io dia tonga amin’ny ray aman-dreny, raha mbola kely ny zanany. (Romana 5:12; 6:23). Voaporofo fa na ny tenan’i Jesosy Kristy aza dia namoy an’i Josefa, ray nitaiza azy, izay tiany tokoa.a Azo antoka tokoa fa tsy vokatry ny fahadisoana na inona na inona avy tamin’i Jesosy izany.

Fantaro koa fa miaina amin’ny ‘fotoan-tsarotra tsy mora setraina’ isika. (2 Timoty 3:1-5, NW ). Namono olona tsy an-kanavaka an-tapitrisany maro ny herisetra, ny ady ary ny heloka bevava, tamin’ity taonjato ity. Nisy olona hafa azon’ny “ny fotoana sy ny sampona”, izay mety hanjo ny olona rehetra. (Mpitoriteny 9:11). Na dia mety ho tena hampahory aza ny fahafatesan’ny ray aman-dreninao, dia tsy fahadisoanao tsotra izao fotsiny izany. Aza manome tsiny foana ny tenanao na manaiky ho difotry ny alahelo, fa manovoza fampiononana ao amin’ny fampanantenan’Andriamanitra fitsanganana amin’ny maty.b Izao no nambaran’i Jesosy mialoha: “Aza gaga amin’izany; fa avy ny andro izay handrenesan’ny olona rehetra [ao amin’ny fasam-pahatsiarovana, NW ] ny feony; dia hivoaka izy”. (Jaona 5:28, 29). Hoy i Abelina, voalaza tetsy am-piandohana: “Fanampiana lehibe ho ahy ny fitiavako an’i Jehovah sy ny fanantenana fitsanganana amin’ny maty.”

Ahoana anefa raha toa ka mbola velona any ny ray aman-dreninao, saingy nandao anao izy ireo? Takin’Andriamanitra amin’ny ray aman-dreny ny hitaizany sy ny hamelomany ny zanany. (Efesiana 6:4; 1 Timoty 5:8). Mampalahelo sy manafintohina anefa ny ataon’ny ray aman-dreny sasany izay nampiseho tsy fananana “firaiketam-po voajanahary” ho an-janany. (2 Timoty 3:3, NW ). Ho an’ny hafa indray, ny fahantrana faraidiny, ny fanandevozan’ny zava-mahadomelina, ny figadrana, na ny alkaolisma, tamin’ny farany, dia nitarika azy handao ny zanany. Ekena aloha fa misy koa ray aman-dreny mahafoy zanaka noho ny fitiavan-tena tsotra izao. Na inona na inona antony, dia mampahory mafy foana ny fisarahana amin’ny ray aman-drenin’ny tena. Tsy midika anefa akory izany hoe noho ianao no nahatonga izany, na tokony hampijaly ny tenanao amin’ny fanamelohan-tena ianao. Raha ny marina, dia ny ray aman-dreninao no tsy maintsy hampamoahina eo anatrehan’Andriamanitra ny amin’izay fomba nitondrany anao. (Romana 14:12). Mazava ho azy, fa raha voatery nisaraka taminao ny ray aman-dreninao noho ny tarehin-javatra tsy azony nanoharana, toy ny loza araka ny natiora na aretina, ohatra, dia tsy misy na iza na iza tokony homen-tsiny! Eo foana ilay fanantenana ny hahatafakambana anareo indray, na dia kely dia kely aza izany fanantenana izany indraindray. — Ampitahao amin’ny Genesisy 46:29-31.

Zavatra mampikorontana anaty, nefa tsy maintsy iainana

Mandra-pahatongan’izany aloha, dia mety hiatrika olana lehibe maromaro ianao. Nanao fandinihana iray antsoina hoe Children in War (Ankizy any An’ady) ny Sampan-draharahan’ny Firenena Mikambana Mikarakara ny Reny sy ny Zaza. Izao no ahariharin’io fandinihana io: “Ny ankizy tsy misy miaraka aminy [tsy ampy taona sy tsy misy mpiahy] no ankizy mora iharam-pahavoazana indrindra, dia ireo izay (...) miatrika sakana sarotra indrindra mba hahavelomana hatrany, sy tsy misy mpanohana mba hahafahany hitombo ara-dalàna ary ampijalina. Anisan’ny famoizana mampikorontana anaty indrindra ny ankizy ny fisarahany amin-dray aman-dreniny.” Angamba miady amin’ny fahatsapana fahaketrahana sy fahakiviana ny tenanao.

Tsarovy i Joaquín, voalaza tetsy aloha. Nisaraka ny ray aman-dreniny, ary avy eo, dia nandao azy sy ireo zokiny. Vao herintaona monja izy tamin’izay, ary ireo zokiny vavy no nitaiza azy. Izao no nohazavainy: “Nanontany foana aho taloha hoe nahoana izahay no tsy nanan-dray aman-dreny, toa an’ireo namako. Ary rehefa nahita raim-pianakaviana niara-nilalao tamin-janany lahy aho, dia naniry mafy ny ho zanany aho.”

Fahazoana fanampiana

Na dia mety ho sarotra aza ny hoe tsy tezain-dray aman-dreny, dia tsy midika akory izany fa tsy hahita fahombiazana ianao. Raha mahazo fanampiana sy fanohanana ianao, dia tsy vitan’ny hoe ho afaka ny ho tafavoaka velona, fa ho afaka hivelatra tsara koa. Mety ho toa sarotra aminao ny mino izany, indrindra raha ao anatin’ny alahelo mafy ianao. Fantaro anefa fa ara-dalàna ny fahatsapana ireo fihetseham-po ireo, ary fantaro koa fa tsy hampijaly anao mandrakizay izy ireo. Izao no vakintsika ao amin’ny Mpitoriteny 7:2, 3: “Tsara ny mankamin’ny trano misy fisaonana noho ny mankamin’ny trano misy fanasana (...). Tsara ny alahelo noho ny hehy; fa na dia malahelo aza ny tarehy, mety tsara ihany ny fo.” Eny, ara-dalàna sady mahasoa ny mitomany sy ny mahatsapa alahelo rehefa nisy zavatra nampalahelo mafy nitranga. Mety ho hitanao ho manampy koa ny mitoky amin’ny namana iray mahatakatra ny manjo anao, na amin’ny mpikambana matotra iray ao amin’ny kôngregasiôna, ka miresaka aminy momba ny alahelo tsapanao.

Marina aloha fa mety halaim-panahy hitokantokana ianao. Mampitandrina toy izao anefa ny Ohabolana 18:1: “Izay mitokana ho azy dia mitady ny mahafinaritra ny tenany ihany, misafoaka manohitra izay hevitra mahasoa rehetra izy.” Tsara kokoa ny hitadiavana ny fanampian’ny olona iray tsara fanahy sy mahatakatra ny manjo anao. Hoy ny Ohabolana 12:25: “Ny alahelo ao am-pon’ny olona dia mampitanondrika azy; fa ny teny soa no mahafaly azy.” Tsy afaka ny hahazo izany “teny soa” izany ianao, raha tsy milaza ny ‘alahelo ao am-ponao’ amin’ny hafa.

Iza àry no azonao iresahana? Mitadiava fanohanana ao amin’ny kôngregasiôna kristianina. Mampanantena i Jesosy fa ao no ahitanao “rahalahy sy anabavy sy reny” izay ho tia sy hiahy anao. (Marka 10:30). Izao no tsaroan’i Joaquín: “Nahatonga ahy hanana fomba fijery hafa momba ny fiainana ny fifaneraserako tamin’ireo rahalahy kristianina. Nitarika ahy hanjary ho tia an’i Jehovah bebe kokoa sy haniry hanompo azy ny fanatrehana fivoriana tsy tapaka. Nisy rahalahy matotra nanome fanampiana ara-panahy sy torohevitra ara-panahy anay mianakavy kely. Mpitory manontolo andro ny sasany amin’ireo iray tam-po amiko ankehitriny.”

Tadidio koa fa “rain’ny kamboty” i Jehovah. (Salamo 68:5, 6). Tamin’ny andron’ny Baiboly, dia nampirisika ny vahoakany haneho famindram-po sy hanao ny rariny tamin’ny kamboty, Andriamanitra. (Deoteronomia 24:19; Ohabolana 23:10, 11). Mitovy amin’izany koa amin’izao andro izao ny fiahiany ireo tanora tsy manan-dray aman-dreny. Koa mitodiha any amin’Andriamanitra ka mivavaha aminy, amin’ny fananana toky fa miahy anao izy, ka hamaly ny vavakao. Nanoratra toy izao i Davida Mpanjaka: “Fa ny raiko aman-dreniko efa nahafoy ahy; fa Jehovah kosa no mandray ahy. Miandrasa an’i Jehovah ianao; matokia, ary aoka hahery ny fonao”. — Salamo 27:10, 14.

Na izany aza anefa, ny tanora iray tsy manan-dray aman-dreny dia miatrika zava-tsarotra maromaro eo amin’ny fiainana andavanandro. Aiza ianao no hipetraka? Ahoana no fomba hivelomanao? Hiresaka momba ny fomba azo andresena ny sasany amin’ireo zava-tsarotra ireo ny lahatsoratra iray ho avy.

[Fanamarihana ambany pejy]

a Talohan’ny nahafatesan’i Jesosy, dia nanankina ny fikarakarana an-dreniny tamin’i Jaona mpianany izy; azo inoana fa tsy ho nanao izany izy, raha mbola velona teo i Josefa, ray nitaiza azy. — Jaona 19:25-27.

b Raha mila fanazavana momba ny fahazakana ny fahafatesan’ny ray na ny reny, dia jereo ny lahatsoratra “Manontany ny Tanora Hoe...”, navoaka tao amin’ny nomeraon’ny Mifohaza! (frantsay) tamin’ny 22 Aogositra sy 8 Septambra 1994.

[Teny notsongaina, pejy 13]

“Fanampiana lehibe ho ahy ny fitiavako an’i Jehovah sy ny fanantenana fitsanganana amin’ny maty”

[Sary, pejy 13]

Indraindray, dia mety ho difotry ny fahatsapana ho manirery ianao

[Sary, pejy 14]

Misy namana afaka manampy sy mankahery anao ao amin’ny kôngregasiôna

    Fitehirizam-boky Malagasy (1965-2025)
    Hiala
    Hiditra
    • Malagasy
    • Hizara
    • Firafitra
    • Copyright © 2025 Watch Tower Bible and Tract Society of Pennsylvania
    • Fifanekena
    • Fifanekena Momba ny Tsiambaratelo
    • Firafitry ny Fifanekena
    • JW.ORG
    • Hiditra
    Hizara