‘Fahitan-javatra Manjombona Momba ny Fahasalaman’ny Saina’

“Na dia eo aza ny fandrosoana mahatalanjona eo amin’ny lafiny maro amin’ny fitsaboana, dia fahitan-javatra maneran-tany manjombona no atrehintsika momba ny fahasalaman’ny saina”, hoy ny fanamarihan’ny lahatsoratra iray nivoaka tao amin’ny Synergy, gazetikelin’ny Fikambanana Kanadianina Misahana ny Fahasalamana Iraisam-pirenena.

Nanatsoaka hevitra ny tatitra iray fa olona 1 amin’ny 4 maneran-tany no tratran’ny fahavoazan’ny saina, fahavoazana eo amin’ny fihetseham-po, na eo amin’ny fomba fitondran-tena. Nisy fandinihana iray hafa nanondro fa marary 1 amin’ny 3 no nanatona mpiasan’ny fahasalamana noho izy tratran’ny fahaketrahana na ny fitebitebena. Ary mihamitombo ireo tarehimarika ireo, araka ny voalazan’ny mpikaroka.

Fa nahoana? Manamarika ny fandinihana iray nataon’ny Sampan-draharahan’ny Fitsaboana Sosialy, ao amin’ny Oniversiten’i Harvard, fa mihamitombo ny isan’ny olona tratran’ny fahaketrahana hita soritra ho aretina, sy ny schizophrénie, ary ny olona lasa adala, satria “betsaka kokoa ny olona mandroso taona”. Tsy ny fandrosoan’ny taona ihany anefa akory no antony. Eo koa ny olana ara-bola, ary koa ny fihenjanana mihamitombo entin’ny fiainana maoderina.

Ahoana no mety hanovana izany toe-javatra manjombona izany? Eo amin’ireo sehatra maro amin’ny fikarakaram-pahasalamana, dia ny fahasalaman’ny saina no tokony homena ny laharam-pahamehana, satria izy io “no iray amin’ireo sehatra farany azo hatsaraina mba hampivoarana ny toe-piainan’olombelona”, hoy ny manam-pahaizana manokana.