Mihazòna Fomba Fijery Voalanjalanja Momba ny Mozika
FANDRAHARAHANA mikirakira vola an’arivony tapitrisa dolara maro ny indostrian’ny mozika amin’izao andro izao. Mahazo vola tsy toko tsy forohana ireo mpahay mozika be mpitia sy ireo mpanohana azy. Na izany aza, dia izao no zava-misy: nanamarika ny fiainan’ny sasany tamin’ireo mpahay mozika tena nahita fahombiazana ny tsy fahasambarana sy ny fahafatesana aloha be ary ny famonoan-tena. Ary nisy porofo ampy nampiseho fa mampietry ara-pitondran-tena sy ara-pihetseham-po ary ara-panahy ny mozika sasany, sady afaka mitarika ho amin’ny fitondran-tena feno herisetra sy manohitra ny fiaraha-monina.
Tsara anefa ny hananana fomba fijery voalanjalanja momba ny mozika. Na dia betsaka aza ny zavatra ratsy sy manimba ao amin’io endriny iray amin’ny zavakanto io, dia mahatonga ny fiainan’ny olona iray ho ampoky ny soa sady mitondra fifaliana sy fahafaham-po, ny mozika sasany. Afaka manatanjaka antsika ara-pihetseham-po sy ara-panahy izy io. Andeha isika handinika ohatra vitsivitsy monja.
Sangan’asa eo amin’ny haisoratra ireo salamo 150 ao amin’ny Baiboly: tononkalo sy hira masina ary vavaka. Vakina amim-pahafinaretana amin’ny fiteny an-jatony maro izy ireo amin’izao andro izao. Tsy hoe namaky fotsiny an’ireo salamo anefa ny Hebreo fahiny, fa nihira azy ireo koa. Matetika no narahiny mozika kanto izany: fomba mahery hampifamatorana ny fahendren’i Jehovah Andriamaniny, fahendrena nambara amin’ny teny, sy ny fihetseham-po izay azon’ireo mpihira voaofana nampitaina tamin’ny mpihaino. Tsy hoe tsotra loatra na tsy nivoatra izany mihitsy ny toetoetra sy ny fomba fiangaly mozika hebreo, fa toa ambony noho ny an’ireo firenena nanodidina tamin’izany fotoana izany.
Tatỳ aoriana, dia nihira salamo sy hira masina hafa ireo Kristianina tamin’ny taonjato voalohany, mba hiderana an’Andriamanitra sy mba hitondrana fahamaivamaivanana ho an’ny fihetseham-po nihenjana. Nahatonga ny fiainany ho ampoky ny soa àry ny mozika. Ary tamin’ny fihirana hira niorina tamin’ny Baiboly, dia naraikitr’izy ireo lalina kokoa tao am-pony ny fahalalana an’Andriamanitra, zavatra izay nilain’izy ireo mba hitari-dalana azy teo amin’ny fiainany. — Matio 26:30; Asan’ny Apostoly 16:25.
Nino ireo Grika fahiny fa mampitombo ny toetra maha izy ny olombelona ny mozika, ary mahatonga lehilahy iray ho tena lehilahy, na vehivavy iray ho tena vehivavy. Eto amin’ity tontolo amin’ny taonjato faha-20 ity, izay manantitrantitra ny fianarana siansa, ny toe-karena ary ny firindrana, dia matetika no atao tsirambina ny fampitomboana ny lafin-toetra ara-pihetseham-po, amin’ny alalan’ny zavakanto.
Mahaiza mandanjalanja hatrany
Andraisan-tsoa sady mahafinaritra ny mihaino mozika tsara dia tsara. Fanampin’izany, dia afaka ny hahazo fifaliana bebe kokoa mihitsy aza ny olona iray rehefa mitendry zavamaneno na miara-mihira amin’ny namana vitsivitsy. Mety hanokatra sehatra lehibe hahitana tena fahafinaretana ny fahaizana mozika.
Mazava ho azy fa, toy ny amin’ny zavatra tsara rehetra eo amin’ny fiainana, dia tokony hisy fahalalana ny antonony sy fahaiza-mitsara zavatra ary fahaiza-mifantina eo amin’io lafiny iray amin’ny fialam-boly io. Marina izany, tsy ny amin’ny karaza-mozika fidina ihany, fa ny amin’ny habetsaham-potoana lany amin’ny fihainoana na filalaovana mozika koa.
Raha manomboka manan-kery ratsy eo amin’ny fihetseham-ponao sy ny fihetsikao ary ny fifandraisanao amin’ny hafa ny karaza-mozika iray, dia mifantena karazany iray hafa. Arovy ny sofinao mba hiarovana ny fihetseham-ponao, mba hiarovana ny fonao sy ny sainao!
Marina indrindra izany, raha ny mahakasika ny tonon-kira. Izy ireny dia mety hanomboka hamolavola anao araka ny fanirian’ireo izay tsy mitovy fomba fijery aminao raha ny amin’ny fiainana sy ny fari-pitondran-tena, fa mety hampandroso kosa fomba fiaina tsy misy tahotra an’Andriamanitra sy ratsy ara-pitondran-tena. Amin’ny toe-javatra sasany, na dia ny lohatenin’ny hira iray aza dia afaka miteraka ny karazam-pihetseham-po ratsy.
Mananatra an’ireo izay maniry hampifaly an’Andriamanitra ny Baiboly, Tenin’Andriamanitra, mba ‘hanolotra ny tenany ho fanatitra velona, masina, sitrak’Andriamanitra, dia [fanompoana masina omban’ny fahaizany misaina, NW ]’. (Romana 12:1). Mazava fa anisan’izany “fanatitra velona” izany ny fihetseham-pontsika. Koa raha hitantsika fa manomboka mampihena ny fahaizantsika mitsikera sy misaina ny fihetseham-pontsika, noho ny herin’ny mozika, ka mitarika antsika hanao fihetsika ratsy, dia izay no fotoana tokony hanovana ny fahazarantsika mihaino mozika. Tadidio izao: Afaka manan-kery, na ho amin’ny tsara na ho amin’ny ratsy, eo amin’ny fonao sy ny sainao, ny mozika!
[Efajoro/Sary, pejy 10]
Fanatsarana Fahaiza-mianatra
“Asehon’ny fikarohana fa afaka manatsara ny fahaizan’ny zazakely miana-javatra ny fihainoana tsy tapaka mozika mirindra tsara. Ao amin’ny tokantrano maro anefa dia tsy mba mandre izany mihitsy izy ireo.” — Audio, Martsa 1999.