Fiarovana ny Nify Mora Simba

OVIANA no nanomboka niforona ny nifinao? Mety ho gaga ianao hahafantatra fa efa nanomboka izany raha mbola tany am-bohoka ianao — angamba raha mbola tsy fantatry ny reninao akory hoe bevohoka izy! Zava-dehibe ho an’ny vehivavy bevohoka àry ny mihinana otrikaina ampy, anisan’izany ny kalsiôma, ny fôsifôro, ny proteinina, ary ny vitaminina.

Ahoana ny amin’ny zaza vao teraka? Milaza ny manam-pahaizana fa ny zaza omena biberao no tena mora simba nify, ary matetika no manomboka amin’ny nifiny anoloana ambony izany. Ahoana anefa no mahatonga izany? Fahazaran’ny zaza sasany ny matory eo am-pinonoana biberao misy ronono, ranom-boankazo, ranon-tsiramamy ary zava-pisotro toy ny sodà. Misy gliosida mampitombo be ny bakteria ao anatin’ireny ranon-javatra mety mivadika ireny. Ny bakteria indray kosa dia mamokatra asidra mety hanimba ny nifin’ireo zaza — indrindra raha mikasika ny nifiny mandritra ny alina. Banga mbola kely ny zaza sasany, raha simba be ny nifiny, ka izany dia mety hisy vokany ratsy eo amin’ny fiforonan’ireo nifiny izay haharitra.

Ahoana no iarovan’ny ray aman-dreny ny nify mora simban’ny zanany mbola kely? Ampirisihana ny fampinonoan-dreny, indrindra satria tsy misy otrikaretina ny rononon-dreny no sady feno mpisetra. Raha biberao anefa no ampiasaina, dia lazain’ny manam-pahaizana fa tokony hajanona izany rehefa feno herintaona sy tapany ilay zaza. Manantitrantitra koa izy ireo fa tsy tokony hampiasaina afa-tsy mba hanomezana sakafo ny zaza ny biberao — fa tsy hampanginana azy akory. Ankoatra izany, raha omena biberao ilay zaza mba hatory, dia ho tsara indrindra raha rano tsotra no atao ao anatiny. Isaky ny avy mamahana ilay zaza, dia azo diovina amin’ny lamba madio sy malefaka ny nifiny.

Azo sorohina ny fahasimban’ny nifin’ny ankizy. Tena ilaina ny fikojakojana tsara ny nify, na dia ho an’ny zazakely aza!