Ny Fiheveran’ny Baiboly
Lalana Samy Hafa Mankany Amin’Andriamanitra ve ny Fivavahana Rehetra?
“TENA sarotra amiko ny mino hoe fivavahana iray monja no nofidin’ilay Andriamanitr’izao rehetra izao”, hoy i Marcus Borg, mpanoratra. Hoy i Desmond Tutu, nahazo ny Loka Nobel ho An’ny Fandriampahalemana: “Tsy misy fivavahana afaka milaza ho manana ny tena fahamarinana momba ny zava-miafin’ny” finoana. Ny fomba fihevitra mahazatra ny hindoa dia hoe “Jotto moth, totto poth”, izay adika malalaka hoe lalana samy hafa mitarika ho amin’ny toerana iray ihany ny fivavahana rehetra. Miombon-kevitra amin’io koa ny Bodista. Olona an-tapitrisany maro tokoa no mino fa lalana samy hafa mankany amin’Andriamanitra ny fivavahana rehetra.
Hoy i Geoffrey Parrinder, mpahay tantara: “Misy milaza fa ny fivavahana rehetra dia mitovy zava-kendrena, na samy lalana mankany amin’ny fahamarinana, na mampianatra foto-pampianarana iray ihany.” Mitovitovy tokoa ny fampianarana sy ny fombafomba ary ny andriamanitr’ireo fivavahana. Miresaka momba ny fitiavana ny ankamaroan’ny fivavahana, ary mampianatra fa ratsy ny mamono olona sy ny mangalatra ary ny mandainga. Misy miezaka hanampy ny hafa amin’ny fony manontolo any amin’ny ankamaroan’ireo antokom-pivavahana. Koa tsy mampaninona àry ve izay fivavahana misy ny olona iray, raha toa izy ka manaraka amim-pahatsorana ny fivavahany sy manana fiainana mahitsy? Lalana samy hafa mankany amin’Andriamanitra fotsiny ve ny fivavahana rehetra?
Ampy ve ny fahatsorana?
Diniho ny toe-javatra nisy an’i Saoly, lehilahy iray tamin’ny taonjato voalohany, izay tonga apostoly kristianina fantatra hoe Paoly. Mpanaraka ny Jodaisma nafana fo izy, ka niezaka nanafoana ny fivavahan’ireo mpanara-dia an’i Kristy, izay noheveriny fa diso. (Asan’ny Apostoly 8:1-3; 9:1, 2) Noho ny famindram-pon’Andriamanitra anefa dia nanjary takatr’i Saoly fa nety ho nanana zotom-po ho an’Andriamanitra ny olona tia fivavahana tahaka azy, kanefa nety ho diso hevitra, satria tsy nahalala ny fahamarinana rehetra. (Romana 10:2) Rehefa fantatr’i Paoly tsara kokoa ny sitrapon’Andriamanitra sy ny asany, dia niova izy ka nanomboka niara-nivavaka tamin’ireo mpanara-dia an’i Jesosy Kristy, izay nenjehiny taloha.—1 Timoty 1:12-16.
Milaza ve ny Baiboly fa misy fivavahana an-jatony maro azo fidina, ka na iza na iza fidintsika dia eken’Andriamanitra foana? Nifanohitra tamin’izany ny toromarika azon’ny apostoly Paoly avy tamin’i Jesosy Kristy tafatsangana tamin’ny maty. Naniraka azy tany amin’ny jentilisa i Jesosy mba ‘hampahiratra ny mason’izy ireo hialany amin’ny maizina ho amin’ny mazava, ary amin’ny fahefan’i Satana ho amin’Andriamanitra’. (Asan’ny Apostoly 26:17, 18) Tena zava-dehibe àry ny fivavahana fidintsika. Nanana ny fivavahany ny maro tamin’ireo olona nanirahana an’i Paoly. Tao amin’ny “maizina” anefa izy ireo. Raha lalana samy hafa fotsiny mitarika ho amin’ny fiainana mandrakizay sy ahazoana sitraka amin’Andriamanitra tokoa ny fivavahana rehetra, dia tsy ho nilain’i Jesosy ny nampiofana sy naniraka ny mpanara-dia azy mba hanao mpianatra.—Matio 28:19, 20.
Hoy i Jesosy tao amin’ny Toriteniny malaza teo An-tendrombohitra: “Midira amin’ny vavahady èty hianareo; fa lehibe ny vavahady, ary malalaka ny làlana izay mankany amin’ny fahaverezana, ka maro ny miditra any. Fa èty ny vavahady, ary tèry ny làlana izay mankany amin’ny fiainana, ka vitsy ny mahita azy.” (Matio 7:13, 14) Milaza mazava ny Baiboly fa “iray ny finoana”. (Efesiana 4:5) Mazava ho azy, fa manana fivavahana ireo olona maro ao amin’ilay lalana “malalaka”. Kanefa, tsy ‘iray ny finoan’izy ireo’. Koa satria iray ihany ny fivavahana marina, dia tsy maintsy miezaka mitady azy io izay maniry hahita ny tena finoana.
Tadiavo ilay Andriamanitra Marina
Efa nolazain’Andriamanitra hatramin’ny vao nisian’ny olombelona izay iriny hataon’izy ireo. (Genesisy 1:28; 2:15-17; 4:3-5) Ankehitriny dia hazavaina tsara ao amin’ny Baiboly ny zavatra takiny, hany ka haintsika ny manavaka ny fivavahana ekeny sy tsy ekeny. (Matio 15:3-9) Nandova ny fivavahany ny sasany, fa ny hafa kosa manara-drian-drano fotsiny. Miankina fotsiny amin’ny fotoana sy ny toerana nahaterahany ny fivavahan’ny maro. Tokony hankininao amin’ny kisendrasendra ve ny fifidiananao ny fivavahanao, sa ny hafa no avelanao hanapa-kevitra ho anao?
Tokony hiorina amin’ny fahalalana tsara miorina amin’ny fandinihana amim-pitandremana ny Soratra Masina ny fifidiananao ny fivavahanao. Tsy nanaiky an-jambany fotsiny izay nolazain’ny apostoly Paoly ny olona nahita fianarana sasany, tamin’ny taonjato voalohany, fa ‘nandinika ny Soratra Masina isan’andro kosa, na marina izany, na tsia’. (Asan’ny Apostoly 17:11; 1 Jaona 4:1) Nahoana ianao raha manao toy izany koa?
Milaza ny Baiboly fa mitady olona hivavaka aminy amin’ny fahamarinana ilay Andriamanitr’izao rehetra izao. Hoy ny fanazavan’i Jesosy, ao amin’ny Jaona 4:23, 24: “Fa avy ny andro, sady tonga ankehitriny, raha ny tena mpivavaka hivavaka amin’ny Ray amin’ny fanahy sy ny fahamarinana; fa ny Ray koa mitady ny mpivavaka aminy ho tahaka izany. Andriamanitra dia Fanahy; ary izay mivavaka aminy tsy maintsy mivavaka amin’ny fanahy sy ny fahamarinana.” Ny “fivavahana madio sady tsy misy loto eo anatrehan’Andriamanitra Ray” ihany no ekeny. (Jakoba 1:27) Navelan’Andriamanitra hahita ny lalana tery mitarika ho amin’ny fiainana ny olona an-tapitrisany maro nitady izany. Ireo tena miezaka hahita ny lalana tery nosoritan’Andriamanitra sy manaraka azy io no homeny ny fiainana mandrakizay, fa tsy ireo tsy miraika akory.—Malakia 3:18.